Walay Paglubad nga mga Istorya sa Ebanghelyo
Kanang Masanag nga Dominggo sa Buntag
Gikan sa usa ka pakigpulong sa kinatibuk-ang komperensya Oktubre 2006.
Nianang adlawa, ang nabanhaw nga Ginoo mibugto sa mga higot sa kamatayon. Mibangon Siya gikan sa lubnganan ug mipakita sa mahimayaong kadaugan isip Manluluwas sa katawhan.
Nasayud kita kon unsa ang Pagkabanhaw—ang paghiusa pag-usab sa espiritu ug sa lawas sa iyang hingpit nga kahimtang. …
Mahunahuna ba nimo kana? Kinabuhi nga anaa sa labing nindot nga bahin? Dili masakit, dili masakitan, dili mabug-atan sa mga kasakit nga moabut kanato niini nga mortalidad?
Ang Pagkabanhaw anaa sa kinauyokan sa atong pagtuo isip mga Kristiyano. …
… Dihang ang Manluluwas mibangon gikan sa lubnganan, … gibuhat Niya ang butang nga walay laing makahimo. Siya mibugto sa mga higot sa kamatayon, dili lamang alang sa Iyang kaugalingon, apan alang sa tanan nga sukad nabuhi—ang maayo ug ang mangil-ad. …
… Iyang gihimo ang maong gasa nga madawat sa tanan. Ug pinaagi nianang madungganon nga buhat, Iyang gipahumok ang makagun-ob, makapahugno nga kasubo nga nagkutkot sa mga kalag niadtong nawad-an sa mga bililhon nga minahal.
Gihunahuna nako unsa ka itom kadto nga Biyernes dihang si Kristo gilansang sa krus. …
… Ang kalibutan mitay-og ug mingitngit. …
Kadtong mga dautan nga katawhan kinsa nagtinguha sa Iyang kinabuhi nangalipay. …
Nianang adlawa, ang bilo sa templo nangapikas.
Si Maria Magdalena ug si Maria, nga inahan ni Jesus, pulos gisanapan sa kasubo. … Ang talagsaon nga tawo nga ilang gimahal ug gipasidunggan patay na nga nagbitay sa krus. …
… Ang mga Apostoles nangahugno. Si Jesus, ang ilang Manluluwas—ang tawo nga milakaw sa tubig ug mibuhi sa patay—mismo sa Iyang Kaugalingon nahimong ubos sa pagkontrolar sa dautang mga tawo. …
Usa kadto ka Biyernes nga puno sa makapagun-ob, makapahugno nga kasubo. …
Nagtuo ako nga sa tanang adlaw sukad sa sinugdanan sa kasaysayan sa kalibutan, kadto nga Biyernes mao ang pinakangitngit.
[Apan] ang pagkawalay paglaum wala magdugay tungod kay pagka Dominggo, ang nabanhaw nga Ginoo mibugto sa higot sa kamatayon. Mibangon Siya gikan sa lubnganan ug mipakita sa mahimayaong kadaugan isip Manluluwas sa katawhan.
Ug diha-diha ang mga mata nga puno sa walay hunong nga luha nauga. Ang mga ngabil nga mihunghong og pag-ampo sa kasagmuyo ug kagul-anan karon mipuno sa kahanginan uban sa talagsaong pagdayeg, kay si Jesus nga Kristo, ang Anak sa buhi nga Dios, nagbarug sa ilang atubangan isip … kamatuoran nga ang kamatayon mao lamang ang sinugdanan sa bag-o ug talagsaong kinabuhi.
Matag usa kanato adunay atong kaugalingon nga Biyernes—kadtong mga adlaw nga ang kalibutan mismo ingon og nabungkag ug ang mga tipak sa atong kalibutan nagkatag libot kanato nga piniraso. …
Apan akong ipamatuod kaninyo sa pangalan sa Usa kinsa mibuntog sa kamatayon—ang Dominggo moabut. Diha sa kangiub sa atong kasub-anan, ang Dominggo moabut.
… Bisan unsa ang atong kasub-anan, ang Dominggo moabut. Dinhi niining kinabuhia o sa sunod, ang Dominggo moabut.
Ako mopamatuod kaninyo nga ang Pagkabanhaw dili usa ka tumo-tumo nga sugilanon. Anaa kanato ang personal nga pagpamatuod niadtong mga nakakita Kaniya. Liboan sa Karaan ug Bag-ong mga Kalibutan nakasaksi sa nabanhaw nga Manluluwas. Nahikap nila ang mga samad sa Iyang mga kamot, mga tiil ug kilid. …
Human sa Pagkabanhaw, ang mga disipulo nalig-on. Mibiyahe sila sa tibuok kalibutan … maisugong gisangyaw si Jesus ang Kristo, ang nabanhaw nga Anak sa buhing Dios.
Daghan kanila … namatay isip mga martir, ang pagpamatuod sa buhi nga Kristo diha sa ilang mga ngabil sa ilang pagkahanaw.
Ang Pagkabanhaw miusab sa mga kinabuhi niadtong nakasaksi niini. Dili ba usab kini makausab kanato?
Tanan kita mobangon gikan sa lubnganan. …
Tungod sa kinabuhi ug mahangturong sakripisyo sa Manluluwas sa kalibutan, ikauban nato og balik kadtong atong gimahal.
… Niana nga adlaw maglipay kita nga ang Mesiyas mibuntog sa tanan aron kita mabuhi sa kahangturan.
Tungod sa sagrado nga mga ordinansa nga atong nadawat sa balaang mga templo, ang atong pagbiya niining mubo nga mortalidad dili makabulag og dugay sa mga relasyon nga gibugkos uban sa mga higot nga hinimo sa mga bugkos sa kahangturan.
Kini ang akong ligdong nga pagpamatuod nga ang kamatayon dili maoy katapusan sa kinabuhi. …
Unta kita makasabut ug mopuyo sa pagpasalamat alang sa dili mabayran nga gasa nga moabut kanato isip mga anak sa mahigugmaong Langitnong Amahan ug sa saad sa mahayag nga adlaw sa ato unya nga pagbangon nga madaugon gikan sa lubnganan.
… Bisan unsa kangitngit ang atong Biyernes, ang Dominggo moabut.