6 ka Simbolo sa Pagpalabay Nga Mahimong Mousab sa Inyong Pagsabut sa Pasko sa Pagkabanhaw

Ni Valerie Durrant

Mga Magasin sa Simbahan

Samtang atong hinumduman ang simbolismo sa Pagpalabay, ang atong pagsabut ug kalipay tungod sa reyalidad sa Pagkabanhaw mas molawum.

table set with passover meal

Ganahan ko sa Pasko sa Pagkabanhaw, usa ka holiday nga nagsaulog sa pagpalingkawas ni Jesukristo sa mga anak sa Dios gikan sa higot sa kamatayon ug impyerno.

Apan 1,500 ka tuig sa wala pa ang Pagkabanhaw, usa ka susama nga balaang adlaw nagsaulog sa pagpalingkawas ni Jehova sa mga anak sa Israel gikan sa pagkaulipon sa Ehipto.

Ang Pasko sa Pagkabanhaw naghinumdom sa maulaong sakripisyo sa Manluluwas; ang Pagpalabay unang naghulagway niini. Magdungan, makapalawum kini sa atong pagsabut kabahin sa Pagkabanhaw. Sa ubos mao ang pipila ka koneksyon tali sa Pagpalabay ug sa Pasko sa Pagkabanhaw:

Pagpalabay	Pasko sa Pagkabanhaw
1. Ang Pagpalabay nakasentro diha sa nating karnero [kordero], lalaki nga walay ikasaway (tan-awa sa Exodo 12:5), walay bali nga mga bukog (tan-awa sa Exodo 12:46).	1. Si Jesus mao ang Kordero sa Dios (tan-awa sa Juan 1:29), gawasnon gikan sa sala ug walay nabali nga mga bukog (tan-awa sa Juan 19:36).
2. Ang tinapay nga walay igpapatubo, walay parte nga dautan (tan-awa sa Bible Dictionary, “Leaven”), kabahin sa Pagpalabay (tan-awa sa Exodo 12:8, 15).	2. Si Jesus mao ang Tinapay nga Nagahatag og Kinabuhi, nga walay bisan unsang kahugaw (tan-awa sa Juan 6:35).
3. Ang pait nga mga utanon, usa ka simbolo sa pagkaulipon sa mga Israelite, kabahin sa Pagpalabay (tan-awa sa Exodo 12:8).	3. Mahimo kitang ubos sa pagkaulipon sa sala, apan tungod kay giinom ni Jesus ang mapait nga kopa (tan-awa sa D&P 19:18), makabuntog kita pinaagi sa Iyang Pag-ula (tan-awa sa 1 Mga Taga-Corinto 15:22).
4. Ang pagkaon sa Pagpalabay kinahanglang kaunon nga magdali (tan-awa sa Exodo 12:11).	4. Ang lawas sa Manluluwas gidali-dali sa pag-andam sa paglubong (tan-awa sa Juan 19:31).
5. Ang mga tumutuo kinsa mipintal sa dugo sa karnero diha sa bayanan sa ilang pultahan naluwas gikan sa pisikal nga kamatayon (tan-awa sa Exodo 12:7, 13).	5. Ang mga tumutuo kinsa simbolikanhong miambit sa dugo sa Kordero kada semana panahon sa sakrament ug “sa kanunay mohinumdom kaniya” (D&P 20: 77, 79) mahimo nga maluwas gikan sa espiritwal ug pisikal nga kamatayon (tan-awa sa Mosiah 4:2).
6. Sa adlaw human gipamatay ang mga panganay [unang natawo], ang kagawasan gideklarar ngadto sa bihag nga mga Israelite (tan-awa sa Exodo 12:29–32).	6. Sa adlaw human namatay ang Unang Natawo, si Jesus mipahayag sa kagawasan niadtong mga bihag diha sa Kalibutan sa mga Espiritu (tan-awa sa D&P 138:18, 31, 42).

Unsa Ang Akong Mahimo?

Sa inyong pag-ambit sa sakrament, hunahunaa kon sa unsang paagi makonsiderar kini nga “atong Pagpalabay, pagpahinumdom sa atong kasiguroan ug kaluwasan ug katubsanan” (Jeffrey R. Holland, “This Do in Remembrance of Me,” Ensign, Nob. 1995, 68).

Pagdiskubre og Dugang Pa

Pangita og dugang nga mga paagi nga mapalambo ang panahon sa Pasko sa Pagkabanhaw diha sa Liahona nga artikulo “Ang Katapusan, Nag-inusarang Panaw sa Manluluwas.”