Kaminyoon, Kwarta, ug Hugot nga Pagtuo
Ang tagsulat nagpuyo sa Ashanti Region, Ghana.
Ang akong pangasaw-unon ug ako gamay ra kaayo og panahon sa wala pa ang among kasal, ug mas gamay pa og kwarta, apan aduna kami usa ka butang nga mas importante: hugot nga pagtuo.
Mitambong ko sa komperensya sa mga young single adult sa Kumasi, Ghana, dili tungod kay nagkinahanglan ko og uyab—hapit na ko maminyo—apan tungod kay gibati nako nga nagkinahanglan ko og dugang kadasig ug nga ang komperensya mao ang saktong dapit nga makakita niini. Sa pagkatinuod, ang akong mga pag-ampo natubag diha sa komperensya human si Sister Call, usa ka senior nga misyonaryo nga gi-assign nga motrabaho uban sa mga young single adult, namulong kabahin sa kaimportante sa kaminyoon sa templo.
Sa hinapos nga bahin sa diskusyon, ang iyang panagway kalit lang nausab ug miingon siya, “Wala kamo magkinahanglan og kwarta aron maminyo—ang inyong gikinahanglan mao lang ang hugot nga pagtuo.” Gibati nako nga direkta siyang nakig-istorya kanako, apan wala ko maghunahuna nga mahimo kini kanako tungod kay nagkinahanglan kami nga mopalit og pipila ka mga butang agig pagpangandam sa kasal. Miingon ko sa akong kaugalingon, “Unsaon man nga dili ko magkinahanglan og kwarta apan pagtuo lang?”
Gibalik-balik nako kini sa paghunahuna sa tibuok semana. Niana nga proseso nangutana ko sa akong kaugalingon, “Limitado ba ang Dios sa unsay Iyang mabuhat?” Sa sinugdanan, naghunahuna ko nga dili, apan pagkahuman nakahunahuna ko nga oo. Dayon miabut ang usa ka follow-up nga pangutana, “Sa unsang paagi Siya malimitahan kon gamhanan Siya sa tanan?” Ang Espiritu mitudlo kanako sa tubag: ang mga panalangin sa Dios mag-agad sa atong pagkamasulundon Kaniya. Dili Siya limitado sa Iyang abilidad sa pagpanalangin kanato, apan kinahanglang atong dapiton kadto nga mga panalangin pinaagi sa pagpakita og pagtuo sa pagbuhat sa unsay Iyang ipabuhat kanato.
Sa wala madugay, akong gitawgan ang akong pangasaw-unon, si Priscilla, aron hisgutan ang among mga plano sa kaminyoon. Bisan pa sa kakulang sa among kwarta, nakahukom kami nga mopili og petsa alang sa among kasal, apan wala kami makapili og partikular nga petsa. Nagkauyon kami nga iyang pangutan-on ang iyang bishop unsa nga mga petsa ang pwede diha sa mga calendar sa ward ug stake. Sa duha ka petsa nga iyang gitanyag, gipili namo ang Septyembre 27, 2014—nga nagpasabut nga kami adunay pito lang ka semana sa dili pa ang adlaw sa kasal!
Nangutana si Priscilla, “Obim [nagpasabut nga “akong kasingkasing” sa pinulongan nga Igbo], duna ka bay kwarta? Mubo na lang kaayo ang panahon.”
Mitubag ko, “Wala, apan aduna akoy pagtuo.”
Mikatawa siya ug miingon, “Ok ra na. Magpuasa ta ug mag-ampo.” Gigamit ang 1 Nephi 3:7, mipadayon siya, “Ang Ginoo moandam og paagi alang kanato tungod kay misugo Siya kanato nga magminyo.”
Sulod nianang semanaha gibayran ko sa usa ka trabaho nga nahuman na nako pipila ka bulan na ang milabay. Dayon si Priscilla misulti kanako nga gusto niyang magsugod og negosyo aron mokita og dugang kwarta. Uban sa kwarta nga akong nakita, mipalit siya og ginamit na nga mga handbag sa babaye ug gibaligya kini og balik. Human mapalit ang pipila sa mga butang nga anaa sa iyang lista sa mga kinahanglanon, aduna gihapon siyay kwarta nga labaw pa sa duha ka pilo sa kwarta nga akong gihatag niya.
Niining panahona, wala pa koy nakuhang trabaho. Ang matag trabaho nga gisaad wala madayon. Duha na lang ka semana ang nahabilin ug aduna gihapoy mga butang nga kinahanglan namong paliton. Misugyot ang akong pangasaw-unon nga i-atras ang petsa. Miingon ra ko, “Adunay milagro nga moabut.”
Duha lang ka adlaw sa wala pa ang among kasal, ang milagro nahitabo: giswelduhan ko sa usa ka trabaho nga gibuhat nako sobra sa duha ka semana ang milabay. Nakat-unan usab nako nga uban sa pagtuo ug kakugi, ang Ginoo mopanalangin kanato sa pagkab-ot sa atong matarung nga mga tumong.
Miadto mi sa banko aron sa pagpailis sa tseke ug gikan didto miadto sa merkado aron mopalit sa nahabiling kinahanglanon taliwala sa kusog nga ulan, nga among gitan-aw isip pag-aprubar sa langit sa among buhat sa pagtuo.
Wala kaabut og 24 oras, naminyo mi. Sa dihang gihangyo mi nga magbinayloay og mga panumpa, ang pagbati dili gayud sama sa bisan unsa nga akong nabati sa akong kinabuhi sukad. Gibati nako nga daghan kaayo mi og nahimo nga nagtuo ko nga makahimo ko sa tanang butang sugod nianang puntoha pinaagi sa hugot nga pagtuo. Sa kaulahian na-seal mi didto sa Accra Ghana Temple.
Bisan kon nagkinahanglan kamo og pila ka kwarta aron mangandam alang sa kaminyoon, ang labing importanting butang nga inyong gikinahanglan mao ang hugot nga pagtuo.