Sa tibuok Niyang mortal nga kinabuhi, ang Manluluwas misinati og daghang mga biyahe—ang Iyang panaw pagawas sa Betlehem ug ngadto sa Ehipto isip usa ka masuso nga bata, ang Iyang 40 ka adlaw nga panaw sa kamingawan, ang Iyang daghan nga mga panaw ngadto sa mga siyudad, mga baranggay, ug mga panimalay aron sa pagtudlo, pag-ayo, ug pagpanalangin panahon sa Iyang pangalagad, ug daghan pang uban. Apan adunay usa ka panaw nga kinahanglang atubangon sa Manluluwas nga mag-inusara, ug kini mao ang usa ka panaw nga Siya lamang ang makalahutay.
“Sa Dominggo sa Pasko sa Pagkabanhaw atong gisaulog ang labing gipaabut ug mahimayaong hitabo sa kasaysayan sa kalibutan.
“Kini ang adlaw nga nag-usab sa tanan.
“Nianang adlawa, ang akong kinabuhi nausab.
“Ang inyong kinabuhi nausab.
“Ang padulngan sa tanang anak sa Dios nausab.”
Presidente Dieter F. Uchtdorf, Ikaduhang Magtatambag sa Unang Kapangulohan, “Ang Gasa sa Grasya,” Liahona Mayo 2015, 107.
Pag-antus nga Walay Sama
Imahe
Jesus in Gethsemane
O Akong Amahan, ni Simon Dewey
Walay mortal nga hunahuna nga makatugkad sa hingpit nga kahulugan sa gibuhat ni Kristo sa Getsemani.
“Kita nasayud nga Siya nagsingot og daghang dugo sa matag lungag sa panit samtang Iyang gihurot ang linugdang sa mapait nga kopa nga gihatag sa Iyang Amahan ngadto kaniya.
“Kita nasayud nga Siya miantus, sa lawas ug espiritu, nga labaw pa sa posibleng maantus sa usa ka tawo, gawas nga siya mamatay.
“Kita nasayud nga sa pipila ka paagi, dili kini nato masabtan, ang iyang pag-antus nakatagbaw sa mga gipangayo sa kaangayan, mitubos sa mahinulsulong mga kalag gikan sa kasakit ug mga silot sa sala, ug mihimo sa kalooy nga maanaa niadtong kinsa nagtuo sa iyang balaan nga ngalan.
“Kita nasayud nga Siya natumba sa yuta samtang ang mga kasakit ug mga panghingutas sa walay katapusan nga palas-anon nakapakurog kaniya ug buot unta nga dili Siya moinom sa mapait nga kopa.”
Elder Bruce R. McConkie (1915–85) sa Korum sa Napulog Duha ka mga Apostoles, “The Purifying Power of Gethsemane,” Ensign, Mayo 1985, 9.
Personal nga Paggamit: Bisan tuod dili kita kanunay makaamgo niini, giantus sa Manluluwas ang tanang matang sa kasakit panahon sa Pag-ula. Nakasabut siya sa tanang pisikal nga kasakit, gikan sa nabali nga bukog ngadto sa labing grabe nga malungtaron nga sakit. Gibati niya ang kangitngit ug kawalay paglaum tungod sa mga sakit sa hunahuna sama sa depresyon, kabalaka, pagkaadik, kamingaw, ug kasubo. Ug gibati Niya ang matag espiritwal nga samad tungod kay gidala Niya diha sa Iyang Kaugalingon ang tanang sala sa katawhan.
Si Elder David A. Bednar sa Korum sa Napulog Duha ka mga Apostoles mitudlo, “Diha sa higayon sa kahuyang mahimong mosinggit kita, “Walay nahibalo sama sa unsa kini. Walay makasabut.’ Apan ang Anak sa Dios hingpit nga nakahibalo ug nakasabut, kay Iyang nabati ug napas-an ang atong indibidwal nga mga alantuson” (“Makadaug sa Ilang mga Alantuson uban sa Kasayon,” Liahona, Mayo 2014, 90).
Siya Lamang ang Bugtong Makahimo
Imahe
carrying the cross
Prosesyon padulong sa Kalbaryo, ni Bernardo Cavallino, Chrysler Museum of Art
“Ang Iyang nabuhat mahimo lamang mabuhat sa Dios. Isip ang Bugtong Anak sa Amahan diha sa unod, napanunod ni Jesus ang balaanong mga hiyas. Siya ang bugtong tawo nga natawo dinhi sa mortalidad nga makahimo niining labing importante ug balaang buhat. Tungod kay Siya lang ang bugtong Tawo nga walay sala nga sukad nabuhi dinhi sa yuta, dili Siya ubos sa espiritwal nga kamatayon. Tungod sa Iyang pagka-dios, aduna usab Siyay gahum batok sa pisikal nga kamatayon. Sa ingon Iyang gihimo alang kanato ang unsay dili nato mahimo sa atong kaugalingon. Iyang gibugto ang mabugnawng pagkupot sa kamatayon. Gihimo usab Niyang posible alang kanato nga makabaton sa labing taas ug malinawon nga kahupayan sa gasa sa Espiritu Santo.”
Presidente James E. Faust (1920–2007), Ikaduhang Magtatambag sa Unang Kapangulohan, “The Atonement: Our Greatest Hope,” Liahona, Ene. 2002, 20.
Personal nga Paggamit: Pinaagi sa Iyang Pag-ula, ang Manluluwas mibadbad sa mga higot sa kamatayon ug mitubos kanatong tanan gikan sa atong mga sala aron ang kada usa ka tawo makabaton og kinabuhing dayon. Siya lamang ang makahimo sa pagtuman sa ingon ka makahadlok ug imposible nga buhat. Kon mag-atubang kita og grabing mga hagit, makakuha kita og kahupayan sa pagkasayud nga ang Manluluwas sa tinud-anay makahimong posible sa imposible.
Wala Gayud Siya Moatras
Imahe
the burial
Ang Paglubong, ni Carl Heinrich Bloch
“Didto sa bungtod nga gitawag og Kalbaryo, samtang ang walay mahimo nga mga sumusunod nagtan-aw, ang Iyang samdan nga lawas gilansang sa krus. Sa walay kalooy Siya gibugal-bugalan ug gipanghimaraut ug gitamay. …
“Ang makapahingutas nga mga oras milabay samtang nagkaduol na ang Iyang kamatayon. Gikan sa Iyang nag-uga nga mga ngabil migawas ang mga pulong, ‘Amahan, nganha sa imong mga kamot itugyan ko ang akong espiritu: ug sa nakapamulong siya niini, nabugto ang iyang ginhawa.’ …
“Sa katapusang gutlo, ang Manluluwas mahimo ra untang moatras. Apan wala Niya buhata. Nagpaubos Siya sa tanang mga butang nga unta Iyang maluwas ang tanang mga butang. Ang Iyang wala nay kinabuhi nga lawas dali nga gipahimutang sa hinulman nga lubnganan apan sa inanay nga paagi.”
Presidente Thomas S. Monson (1927–2018), “Siya Nabanhaw!” Liahona, Mayo 2010, 87.
Personal nga Paggamit: Miantus Siya og hilabihang kasakit, kamingaw, ug kaguol, apan sa gihapon ang Manluluwas milahutay ug nakahuman sa Iyang mortal nga panaw uban sa kamaayo—gani mihangyo pa sa Iyang Amahan sa pagpasaylo niadtong milansang Kaniya. Tungod sa Iyang hingpit nga ehemplo, makaatubang kita sa atong kaugalingong mga pagsulay ug kalisud uban sa kamaayo, ug uban sa Iyang tabang makalahutay usab kita hangtud sa katapusan.
Ang Daghang mga Saksi sa Iyang Pagkabanhaw
Imahe
Mary at the tomb
Babaye, Nganong Nagahilak Ikaw? ni Mark R. Pugh
“Mituo ko sa daghang mga saksi sa Pagkabanhaw sa Manluluwas kansang mga kasinatian ug mga pagpamatuod makita diha sa Bag-ong Tugon—kang Pedro ug sa iyang kaubanan sa Napulog Duha ug sa minahal, putli nga Maria sa Magdala, taliwala sa uban pa. Mituo ko sa mga pagpamatuod nga makita diha sa Basahon ni Mormon—kang Nephi ang Apostol ug sa wala hinganli nga mga katawhan sa yuta sa Bountiful, taliwala sa uban pa. Ug ako mituo sa pagpamatuod ni Joseph Smith ug ni Sidney Rigdon kinsa, human sa daghan nga mga pagpamatuod, mipahayag sa mahinungdanong pagsaksi niining katapusang dispensasyon ‘nga siya buhi! Kay kami nakakita kaniya.’ Ubos sa Iyang mga mata nga makakita sa tanan, ako mobarug isip usa ka saksi nga si Jesus sa Nazaret mao ang nabanhaw nga Manunubos, ug ako mopamatuod bahin sa tanan nga resulta gikan sa kamatuoran sa Iyang Pagkabanhaw. Unta madawat ninyo ang konbiksyon ug kahupayan nianang samang pagsaksi.”
Elder D. Todd Christofferson sa Korum sa Napulog Duha ka mga Apostoles, “Ang Pagkabanhaw ni Jesukristo,” Liahona, Mayo 2014, 114.
Personal nga Paggamit: Bisan dili kita apil niadtong nakakita sa nabanhaw ug nahingpit nga lawas sa Manunubos, makahimo gihapon kita karon sa pagbarug isip mga saksi Kaniya. Mahimo Siyang kanunay nga sentro sa atong kinabuhi, bisan sa unsang panahon o dapit kita maanaa. Matag higayon nga atong ihalad ang atong kasingkasing ug mga kamot sa pagserbisyo sa uban; sa pagpakita og kalumo, kamabination, ug pagtahud ngadto sa tanan; sa pagpanalipod sa kamatuoran; ug sa pagpaambit sa atong mga pagpamatuod sa ebanghelyo, nagbarug kita isip tinuod nga mga saksi ni Jesukristo.
Dili Kita Angay nga Maglakaw nga Mag-inusara
Imahe
Christ walking along the shores
Detalye gikan sa Lakaw uban Kanako, ni Greg Olsen, dili mahimong pakopyahan
“Usa sa dakong kahupayan niining kasaulugan sa Pagkabanhaw mao nga tungod kay si Jesus mibaktas sa ingon ka taas, masulub-ong agianan nga nag-inusara, dili na kita kinahanglang mohimo pa sa ingon. Ang Iyang biyahe nga nag-inusara naghatag og lapad nga pakig-uban alang sa atong gamay kaayo nga luna niana nga agianan—sa puno sa kalooy nga pag-amuma sa atong Amahan sa Langit, sa walay pagkapakyas nga pakig-uban niini nga Pinalanggang Anak, sa bug-os nga gasa sa Espiritu Santo, sa mga anghel sa kalangitan, sa mga sakop sa pamilya nga anaa sa duha ka bahin sa tabil, sa mga propeta ug mga apostoles, sa mga magtutudlo, sa mga lider, ug sa mga higala. Tanan kini ug daghan pa gihatag isip mga kaubanan sa atong mortal nga panaw tungod sa Pag-ula ni Jesukristo ug sa Pagpahiuli sa Iyang ebanghelyo. Gipalanog gikan sa kinatumyan sa Kalbaryo ang kamatuoran nga kita dili gayud mapasagdan nga mag-inusara o dili mabuligan, bisan kon usahay bation nato ang ingon niini. …
“… Kita mobarug unta kauban ni Jesukristo ‘diha sa tanang panahon ug sa tanang mga butang, ug diha sa tanan nga mga dapit nga [kita] unta maanaa, bisan hangtud sa kamatayon,’ labing tinuod ingon niana kon giunsa Niya sa pagbarug nga kauban kita nga sa pagkatinuod Siya nagpakamatay alang kanato ug dihang Siya mibarug nga hingpit nga nag-inusara.”
Elder Jeffrey R. Holland sa Korum sa Napulog Duha ka mga Apostoles, “Walay Bisan Usa nga Nakig-uban Kaniya,” Liahona, Mayo 2009, 88.
Personal nga Paggamit: Niining Pasko sa Pagkabanhaw, hinumdumi ang katapusan, nag-inusarang panaw sa Manluluwas. Gisakripisyo Niya ang tanan nga anaa Kaniya aron kamo ug ang matag tawo dinhi sa yuta mamahimong limpyo ug makabaton og kinabuhing dayon. Pagkat-on gikan sa Iyang hingpit nga ehemplo. Ibutang Siya kanunay diha sa inyong hunahuna ug diha sa inyong kasingkasing. Ug hinumdumi kanunay nga wala kamo mag-inusara. Tungod kay gilahutay Niya ang Iyang katapusang panaw diha sa hingpit ug tumang pag-inusara, dili Siya mobiya kaninyo. Ang Iyang gugma alang kaninyo walay kinutuban ug walay kausaban, ug andam Siyang mohatag kaninyo og kalinaw, kahupayan, ug paglaum samtang mopadayon kamo sa inyong kaugalingong panaw. Ang Iyang gasa sa Pag-ula walay katapusan, ug gihatag kini nganha kaninyo.