Mobati Pag-usab og Kakomportable

Judy Rascher, Colorado, USA

Wala ko kaandam sa tawag sa telepono sa akong igsoong lalaki. “Si Mama bag-o lang namatay,” miingon siya. “Natumba siya ug nabagok ang iyang ulo.”

Nakalitan ko. Wala na ang akong mama, ug bag-o lang kong nakigsulti niya sa miaging gabii. Kanunay kong nangutana sa akong kaugalingon nganong nahitabo kini. Wala ko makasabut nganong kinahanglan siyang mobiya nako. Nasuko ko! Gihunahuna nako ang akong kasuko sulod sa pipila ka semana.

Sa katapusan, nakahukom ko kinsa ang angayang basulon. Sayop kadto sa Dios. Sayo ra kaayo Niyang gikuha si mama kanako. Daghang importanting mga panghitabo sa akong kinabuhi ang wala makita ni Mama, ug nagtuo ko nga tungod kini Kaniya. Dili pa ko miyembro sa Simbahan niadtong panahuna, apan usa ko ka diboto nga Kristiyano. Imbis nga mosalig sa Dios alang sa kalig-on, mipalayo ko Kaniya ug gisalikway Siya sa akong kinabuhi.

Gimingaw ko og maayo sa akong inahan. Sa akong pagdako, ang akong panimalay uban sa akong mga ginikanan usa ka luwas nga dapit. Bisan asa pa ko o bisan unsay akong gibuhat, sa matag higayon nga nakig-istorya ko sa akong mama o migahin og panahon uban kaniya, mibati ko og kakomportable. Karon kana nga pagbati sa “kakomportable” nga akong ganahan nahanaw.

Milabay ang katuigan, ug hapit hingpit nga nawala ang akong pagtuo. Gisulayan nako pagsabut nganong kinahanglang mamatay ang akong inahan, apan walay nakahatag kanako og kalinaw. Dayon, sulod sa usa ka semana, ang mosunod nga hunahuna balik-balik nga misulod sa akong utok: kinahanglan kong modangup sa balaang mga tinubdan aron makasabut. Gisulti nako kini sa usa ka minahal nga higala kinsa usa ka miyembro sa Simbahan. Nangutana siya kon gusto ba ko nga makat-on og dugang mahitungod sa iyang relihiyon.

Wala dayon ako makaamgo niini, apan ang Espiritu mipukaw sa akong kalag gikan sa lawum nga pagkatulog. Sa dihang mas nakat-on ko mahitungod sa ebanghelyo, mas gibati nako nga nakakita ko pag-usab og usa ka luwas nga dapit. Ang pagbati sa “kakomportable” mibalik.

Nabunyagan ko niadtong Mayo 2013. Mapasalamaton ko nga nabalik ang akong pagtuo. Wala na ko motalikod pa sa Dios. Hinoon, gihangup nako Siya. Nasubo gihapon ko sa kalit nga pagkamatay sa akong mama, apan tungod sa akong pagtuo sa Dios, nasayud ko nga sa umaabot mobati ko og “kakomportable” uban sa akong mama ug sa akong pamilya sa kahangturan.