Kalipay: Mas Labaw Pa Kay Sa Maayong Buot
Gitudloan kita nga ang pagbaton og hingpit nga kalipay mao ang katuyoan sa atong pagpakabuhi (tan-awa sa 2 Nephi 2:25). Busa nganong ang kalipay usahay daw lisud kaayong maangkon? Tingali tungod kay wala kita makasabut kon unsa gayud ang kalipay … ug unsa ang dili kalipay.
Unsa Ang Kalipay?
Sa labing yanong lebel, ang kalipay mao ang temporaryo nga pagsaka sa kahimtang sa inyong panghunahuna ngadto sa ang-ang nga mas taas kay sa inyong naandan nga emosyonal nga balanse.1 Sa laing pagkasulti, nagpasabut kini og maayo nga pagbati.
Adunay daghang paagi aron nindot ang bation—pakigkomedya sa higala, pagdula og makalingaw nga dula, o bisan ang pagkaon og usa ka piraso nga cheesecake—apan dili kini molungtad og dugay. Dali kaayo kitang mobalhin gikan sa usa ka tinubdan sa kalipay ngadto sa lain sa pagsulay nga makuha og balik kadto nga nindot nga pagbati. Apan aduna bay kalipay nga molungtad og dugay?
Oo—apan dili kaayo kini klaro, mao nga kanunay kitang mapakyas sa pag-angkon niini. Ang kalibutan nagtudlo kanato nga ang nindot nga kinabuhi kinahanglang puno sa pagpanimpalad, nga ang inyong mga adlaw kinahanglang puno sa kasayon ug walay hunong nga kalingawan. Apan ang kamatuoran mao nga, wala kamo magkinahanglan og padayon nga kalingawan aron magpuyo “subay sa matang sa pagkamalipayon” (2 Nephi 5:27). Ang malungtarong kalipay—unsay atong gitawag og tinuod nga kalipay—mao ang mas hilum, mapadayunong pagbati sa pagkakontento kay sa usa ka kusog nga pagbati sa kalipay. Ang lingaw-lingaw ug kalingawan mahanaw, apan ang tinuod nga kalipay dili usa ka lumalabay nga maayong buot—molungtad kini og mas dugay. Kon ang pagsinati og kalingawan mao ang pagpasaka sa inyong emosyon ibabaw sa naandang balanse niini, ang pagkab-ot sa tinuod nga kalipay mao ang pagpasaka mismo sa emosyonal nga balanse.2
Tingali maghunahuna mo nga ang makanunayon nga kalipay nagkinahanglan og makanunayon nga prosperidad ug kagawasan gikan sa kasakit o mga pagsulay. Apan ang mga pagtuon nagpakita nga ang maayo nga mga sirkumstansya dili makagarantiya og kalipay, ug ang bati nga mga sirkumstansya dili makapugong niini. Hinoon, taliwala sa tanang mga butang nga makaapekto sa inyong kalipay, ang inyong mga pagpili mao ang adunay pipila sa labing dako nga impluwensya.3 Si Elder Ulisses Soares sa Kapangulohan sa Seventy mitudlo, “Ang kalipay matino pinaagi sa kinaiya, pamatasan, ug mga sundanan sa panghunahuna nga direkta natong makontrolar pinaagi sa tinuyo nga buhat.” Ang kalipay labaw pa kay sa usa ka maayong buot o walay hasol nga kinabuhi—usa kini ka paagi sa panghunahuna ug pagpuyo nga atong makontrolar. Ang kinatibuk-ang mga lebel sa pagbati siguradong naapektuhan sa kaliwat ug giunsa kita sa pagpadako, apan ang atong personal nga mga pagpili adunay mahinungdanong bahin niini. Sa ato pa, “ang kalipay usa ka pagpili nga mahimo ni bisan kinsa.”4
Unsaon Nako Nga Magmalipayon?
Busa unsaon gayud nato sa “pagpili” nga magmalipayon? Unsa man ang sekretong paagi aron makaangkon og kalipay? Sama sa gipasabut ni Elder Soares, ang tinuod nga kalipay magkinahanglan og “mapadayunong paningkamot alang sa mas importanting butang sa kinabuhi.” Sa samang paagi, si Viktor Frankl, usa ka inilang survivor sa Holocaust ug psychiatrist, misugyot nga ang kalipay usa ka “epekto sa personal nga kamaunungon ngadto sa usa ka kawsa nga labaw pa kay sa kaugalingon.”5
Ug unsa man ang mas dakong kawsa kay sa gihan-ay sa Dios alang kanato? Sa atong pagpangita og kalipay, dili na kinahanglang motan-aw kita sa lain gawas sa plano sa Langitnong Amahan. Tutal, gitawag kini og ang “plano sa kalipay” tungod sa usa ka rason! (Alma 42:8, 16). Daghang kasulatan nagpamatuod nga ang pagsunod sa plano sa Dios makahatag og kalipay (tan-awa sa 2 Nephi 2:13; Helaman 13:38). Bisan og ang matarung nga pagpuyo dili makapugong kanato nga mobati og bisan unsang kasakit, mopahimutang kini kanato sa usa ka kahimtang diin mas makasinati kita og kalipay niining kinabuhia, ug mogiya kini ngadto sa atong kahimayaan ug sa mahangturong kalipay diha sa kalibutan nga moabut.
Sama sa pagtuo, ang kalipay mahimong maluya o malig-on, depende sa inyong mga lihok. Kon inyong igahin ang inyong panahon sa pagtinguha sa temporaryong kasadya, ang inyong kalipay “igaliyok-liyok sa tanang hangin” (Mga Taga-Efeso 4:14). Apan kon maningkamot kamo nga magpuyo nga matarung, makapalambo kamo og makanunayon nga pagbati sa sukaranang kalinaw ug pagkakontento nga makasugakod sa bisan unsang unos. Ug kon inyong unahon ang pagtuo kay sa paglingaw-lingaw, makadiskubre kamo og tinuod nga kalipay—ang matang sa kalipay nga makita lamang sa “matinud-anon nga maghinulsol ug mapainubsanon nga nagpangita sa kalipay” (Alma 27:18).