Mga Hulagway sa Hugot nga Pagtuo

Rakotomalala Alphonse

Sarodroa, Madagascar

Sa dihang si Rakotomalala nainteresado sa ebanghelyo, ang labing duol nga simbahan anaa sa Antsirabe, usa ka siyudad nga 30 ka milya (50 km) gikan sa iyang baryo sa Sarodroa. Si Rakotomalala ug usa ka higala nakakita og paagi aron mahimo ang biyahe matag Dominggo.

Karon, ang Sarodroa adunay gamay nga meetinghouse diin sobra sa 100 ka mga miyembro ang magtambungan matag Dominggo. Nakita ni Rakotomalala ang iyang baryo nga mihangup sa ebanghelyo. Upat ka mga misyonaryo ang nakaserbisyo gikan sa Sarodroa ug ang Simbahan padayon nga naglambo.

Cody Bell, litratista

Sa dihang nasakit ang akong lolo, mibiyahe ko ngadto sa Antsirabe aron makauban siya. Ang mga misyonaryo mibisita sa iyang panimalay sa daghang higayon. Si lolo ug ako dili mga miyembro sa Simbahan, apan ganahan siyang makig-istorya sa mga misyonaryo. Usa ka gabii, gipanalanginan nila si lolo, ug human sa usa ka family home evening, ila kaming gihatagan og Basahon ni Mormon.

“Palihug basaha kini nga libro ug pangutan-a ang Dios kon tinuod kini,” miingon sila.

Sa dihang mibalik ko sa Sarodroa, dili ko gusto nga mobasa sa Basahon ni Mormon tungod kay nagtuo ko nga dili kini tinuod. Dayon, usa ka adlaw nasakit ko og maayo nga natanggong ko sa balay sulod sa pipila ka adlaw. Samtang nangita ko og akong mabuhat, akong nakit-an ang Basahon ni Mormon ug gisugdan kini sa pagbasa.

Wala madugay, mibalik ko sa Antsirabe ug nahimamat ang mga misyonaryo. Gitudloan ko nila og dugang mahitungod sa Basahon ni Mormon ug mahitungod ni Propeta Joseph Smith. Ako silang gisultihan nga wala kita magkinahanglan og mga propeta ug nga walay propeta karon. Gihangyo ko sa mga misyonaryo nga mag-ampo ngadto sa Dios ug mangutana kon aduna bay propeta karon. Misaad sila nga ang Dios motubag kanako. Nag-ampo ko ug mibati nga ang gisulti sa mga misyonaryo tinuod.

Gusto ko nga motambong sa simbahan, apan wala koy kwarta para sa bus. Nakigsulti ko sa akong higala, si Razafindravaonasolo, ug miingon siya nga mahimo namong sakyan ang akong bisiklita. Mibisiklita mi og duha ka oras gikan sa Sarodroa padulong sa Antsirabe matag Dominggo. Kon kapuyon ko sa pagsikad, mosakay ko sa luyo ug siya ang mosugod sa pagsikad. Dayon kon kapuyon siya, magbaylo na usab kami og pwesto.

Sa katapusan, ang pamilya ni Razafindravaonasolo ug ako nagpamiyembro sa Simbahan. Sa Antsirabe mi magsimbahan hangtud nga usa ka branch ang giablihan diha sa Sarodroa. Malipayon kaayo kami sa dihang makasimba mi sa kaugalingon namong baryo!

Ang amahan ni Razafindravaonasolo mao ang gitawag isip presidente sa branch. Usa ka adlaw nakigkita siya kanako ug miawhag nako nga mangandam alang sa misyon. Wala ko magtuo nga makaserbisyo ko, apan gipaniguro niya kanako nga makahimo ko. Gidawat nako ang tawag nga moserbisyo sa Madagascar Antananarivo Mission. Minyo na ako karon ug adunay duha ka mga bata. Mapasalamaton ko sa akong pamilya, ug daghan kaayo ko og kasinatian kay sa akong mapaambit nga nakatabang kanako nga masayud nga tinuod kini nga Simbahan.