Pag-ila sa Manluluwas
Ang tagsulat nagpuyo sa Utah, USA.
Samtang magkat-on kamo mahitungod ni Jesukristo, inyong madapit ang Iyang kalinaw ug presensya diha sa inyong kinabuhi.
Detalye gikan sa Hain Man ang Siyam, ni Liz Lemon Swindle
Hunahunaa nga nagbasa sa tanan mahitungod sa Manluluwas diha sa mga kasulatan—ang Balaang Biblia, ang Basahon ni Mormon, ang Doktrina ug mga Pakigsaad, ang Perlas nga Labing Bililhon. Magkinahanglan kana og dakong panahon ug paghago! Apan niadtong Enero 2017, si Presidente Russell M. Nelson mihatag og hagit sa pagbuhat niana—sa pagtuon sa tanan nga gisulti ug gibuhat ni Jesus diha sa sumbanan nga mga basahon. Miingon si Presidente Nelson nga ang pagkompleto sa proyekto nakapahimo kaniya nga “lahi nga tawo.” Wala lamang siya makat-on og dugang mahitungod ni Jesukristo apan mibati usab og nabag-o nga debosyon ngadto Kaniya.1
Kamo usab mas mapaduol kang Kristo samtang magkat-on kamo kaniya. Ang pagtuon sa Iyang kinabuhi ug katuyoan nagdapit sa Iyang kalinaw diha sa inyong kinabuhi ug makatabang kaninyo nga makaila Kaniya ug sa Langitnong Amahan. Basaha kon giunsa pagtubag niini nga mga batan-on ang duha ka mga pangutana: (1) Unsa ang inyong paborito nga istorya diha kasulatan mahitungod sa Manluluwas ug ngano? (2) Ug sa unsang paagi ang inyong mga pagtuon sa ebanghelyo nakahatag kaninyo og kalinaw?
Ganahan ko sa istorya kabahin sa 10 ka sanlahon tungod kay mipakita si Kristo og dakong gugma ngadto sa sanlahon nga mipasalamat Kaniya. Miingon Siya, “Ang imong pagsalig nakapaayo kanimo” (Lucas 17:19; tan-awa sa mga bersikulo 11–19). Ganahan ko sa tinud-anay nga kamabination nga gipakita Niya sa tanan.
Tungod sa pipila ka bag-ong mga trahedya sa akong eskwelahan, ang tanan didto nagkinahanglan og dakong kalinaw ug kahupayan. Makakaplag ko og kalig-on ug kalinaw pinaagi sa akong mga pagtuon sa seminary. Ang mga magtutudlo sa seminary mihimo sa mga kasulatan ug sa ebanghelyo nga personal kaayo alang sa tanan. Nindot kaayo nga makita ang kalainan diha sa seminary classroom kon itandi sa normal nga classroom. Adunay lahi gayud nga pagbati didto nga nagdala og kalinaw.
Gabriel S., edad 16, Colorado, USA
Ang istorya ni Alma kabahin sa hugot nga pagtuo ug sa pulong sa Dios (tan-awa sa Alma 32:18–43) mitudlo kanako nga kon magpugas kita og gugma, makadawat kita og gugma. Sama sa gipasabut ni Alma ngadto sa mga Zoramite, ang hugot nga pagtuo sama sa usa ka binhi. Kini mao ang pagtuo nga ang usa ka butang tinuod bisan kon wala gayud makakita niini. Ang hugot nga pagtuo motubo kon ang usa ka tawo adunay tinguha sa pagtuo ug pagpaminaw sa pulong sa Dios. Kining tanan nakatabang kanako nga mahimong kalma, makalig-on sa akong kasingkasing, ug makaangkon og pagpamatuod nga ang Langitnong Amahan nagtan-aw kanako uban sa mga mata sa gugma ug kalooy.
Samtang nagtuon ko sa mga kasulatan matag adlaw, mas maayo nakong nasabtan ang gugma sa atong Manluluwas alang sa matag usa kanato. Kini nga kahibalo nakatabang kanako sa pagpasabut sa akong mga higala sa eskwelahan nga wala sila mag-inusara kon aduna silay mga problema tungod kay adunay Dios nga nahigugma kanato.
Maria D., edad 17, Guadalajara, Spain
Detalye gikan sa Si Kristo ug ang mga Bata sa Basahon ni Mormon, ni Del Parson
Ganahan ko diha sa 3 Nephi 17 sa dihang ang Manluluwas mibisita sa Amerika ug midapit sa mga bata sa pagduol ngadto Kaniya. Milingkod Siya uban kanila ug tagsa-tagsa nga migahin og panahon uban kanila. Talagsaon kana nga istorya ngari kanako nga nagpakita kon si kinsa si Jesukristo ug unsa ka dako ang Iyang gugma alang sa matag usa kanato. Nagtuo ko nga molingkod usab Siya tupad sa matag usa kanato kon kita magkinahanglan sa Iyang tabang.
Niining tuiga akong gihagit ang akong kaugalingon sa pagbasa og usa ka pahina sa mga kasulatan matag adlaw. Samtang nagbuhat ako niana, midako ang akong kahinam nga mobuhat niini matag adlaw. Daghan kaayo ko og nakat-unan gikan sa mga pulong ug sa mga istorya diha sa mga kasulatan samtang naningkamot ko nga mogahin og panahon sa pagsabut niini, ug mas napaduol ko ngadto sa akong Langitnong Amahan ug Manluluwas samtang nagkat-on usab ako Kanila. Nakahatag kana og dakong kalinaw sa akong kinabuhi.
Anna C., edad 17, Montana, USA
Ganahan ko nga si Kristo miadto sa Amerika, nangutana kon aduna bay mga masakiton ug mga sinakit diha kanila, ug dayon miayo kanila. Dayon gipanalanginan Niya ang gagmayng mga bata. (Tan-awa sa 3 Nephi 17.) Para nako nindot ug gamhanan kaayo kini nga istorya. Ganahan ko sa gagmayng mga bata, ug ganahan ko nga hatagan sila og dugang nga gugma sa mga tawo, tungod kay hilabihan ka putli ang mga bata. Ang istorya nagpakita nako sa kadako sa gugma sa Manluluwas alang kanato. Tungod kay gihigugma Niya og maayo ang mga tawo kaniadto nga gibuhat Niya ang tanan nga Iyang nabuhat, makahimo usab Siya sa paghigugma kanato karon.
Ang Isaias 53:3 nag-ingon nga ang Manluluwas “usa ka tawo sa mga kasub-anan, ug nakasinati sa pag-antus.” Kon maghunahuna ko mahitungod sa Pag-ula ni Jesukristo, sa unsay Iyang nasinati para kanato, ug sa unsang paagi ako mapasaylo kon maghinulsol ko sa akong mga sala, mobati ko nga malinawon kaayo. Daghang mga tawo diha sa Basahon ni Mormon—ang mga anak ni Mosiah, si Ammon, ug si Alma nga Batan-on—nakahimo og mga sayop kaniadto, apan napasaylo sila. Midangup sila kang Kristo, naghinulsol, ug nahimong talagsaong mga ehemplo nga mahimo natong kat-unan karon. Makahupay kanako nga masayud nga mahimo usab akong mapasaylo.
Alina T., edad 18, Oregon, USA
Ang akong paborito nga istorya sa kasulatan mahitungod ni Jesus mao ang Iyang paghimong bino sa tubig panahon sa usa ka kasal, sa pag-aghat sa Iyang inahan (tan-awa sa Juan 2:1–11). Mao kini ang akong paborito tungod kay ang istorya nagpakita sa pagtahud ni Jesus sa mga babaye ug ilabi na sa Iyang inahan. Kini nga istorya nag-awhag sa mga bata sa pagsunod sa ilang mga ginikanan, dili tungod sa kahadlok, apan tungod sa dakong gugma. Ang ehemplo ni Jesukristo mao ang angayng paningkamutan sa tanan. Ang Iyang gugma alang sa Iyang inahan wala gayud mohunong, ug kinahanglang ingon niana usab ang atong gugma alang sa atong mga ginikanan. Paborito ko usab kini nga tudling tungod kay ang Iyang milagro usa ka buhat sa pagserbisyo, ug kita usab makahimo og mga milagro pinaagi sa pagtabang sa uban.
Kini nga istorya ug ubang mga istorya sa kasulatan nakahatag kanako og kalinaw. Makahupay kaayo nga masayud nga kon kanunay kong maningkamot sa pagkat-on mahitungod ni Kristo ug mosunod sa Iyang mga pagtulun-an, makabalik ko ngadto sa atong mahigugmaong Langitnong Amahan sa umaabut.
Anne R., edad 17, Victoria, Australia
Ganahan ko sa istorya nga si Kristo milakaw ibabaw sa tubig. Milakaw siya ngadto sa sakayan diin anaa ang tanan nga mga Apostoles, ug gidapit Niya si Pedro nga moanha Kaniya diha sa tubig. Si Pedro adunay hugot nga pagtuo sa sinugdanan ug makahimo sa paglakaw ibabaw sa tubig, apan nawad-an siya sa iyang pagtuo ug siya misugod sa pagkaunlod. Dayon si Kristo mituyhad sa Iyang kamot ug migunit kaniya (tan-awa sa Mateo 14:25–33). Ang istorya importante kanako tungod kay kanunay nga gituyhad ni Kristo ang Iyang mga kamot diha sa atong kinabuhi—Siya nanalipod kanato.
Ang akong pagtuon nakatabang kanako tungod kay magtuon ko sa mga kasulatan sa buntag ug gihimo niining mas maayo ang adlaw. Kon dili ko magtuon, ang akong adlaw dili ingon ka malipayon o makalingaw—dili gayud kini maayong bation. Kon kanunay ko nga mobasa sa akong mga kasulatan sa buntag, maayo kaayo ang akong pagbati sa adlaw tungod kay akong gidapit ang Espiritu Santo nga mouban kanako nianang adlawa.
James K., edad 17, Alaska, USA
Detalye gikan sa Kristo ug ang Datu nga Batan-ong Magmamando, ni Heinrich Hofmann
Ganahan ko sa istorya ni Kristo ug ang adunahan nga batan-ong lalaki (tan-awa sa Marcos 10:17–22). Naghatag kini kanako og daghang mga ideya ug panglantaw mahitungod sa paghatag og prayoridad sa Dios labaw sa tanan. Ang paghangyo nga ibaligya ang tanang kalibutanong kabtangan lisud kaayo nga hangyo alang sa tanan. Apan naghunahuna ko nga ang kaandam sa pagbutang sa Dios labaw sa mga kabtangan mao ang usa sa mga butang nga angayng kat-unan sa matag usa kanato niining kinabuhia. Ang walay kinutuban nga gugma ni Jesukristo alang kanato tinud-anay nga talagsaon. Sigurado nga mas maayo pa kini kay sa bisan unsa nga kantidad sa kwarta o mga kabtangan nga atong maangkon niining kinabuhia.
Ang pagbasa sa mga kasulatan nakahatag kanako og kalinaw ug kahupayan, ingon man sa dakong kaalam ug panabut. Bisan og dili nako kanunay mabati ang gahum sa pagtuon sa kasulatan diha-diha dayon, nasayud ko nga ang pagbasa sa mga kasulatan positibong nag-impluwensya sa akong kinabuhi ug nagtabang kanako nga mobati sa Espiritu ug moila sa Iyang mga pag-aghat.
Yuzhen C., edad 19, Taichung, Taiwan
Detalye gikan sa Ang Babaye Mihikap sa Sidsid sa Sinina ni Kristo, ni Heidi Daynes Darley
Samtang si Kristo nagpadulong ngadto sa usa ka batan-ong babaye kinsa himatyon, usa ka babaye nga gitalinug-an ang yanong mihikap sa Iyang sinina ug naayo. Si Kristo milingi ug nakigsulti kaniya human makaamgo nga mihikap siya Kaniya (tan-awa sa Lucas 8:43–48). Bisan nagpadulong sa pagtabang og laing tawo, si Kristo migahin usab og panahon alang kaniya. Si Jesukristo mogahin usab og panahon alang kanatong tanan.
Busy kaayo ang akong kinabuhi, magdali ngadto sa eskwelahan o sa mga ballet class o uban pang buluhaton. Panahon nianang tanan, wala koy oras nga makainusara o mobati og kalinaw. Kon mobasa ko sa akong mga kasulatan o mag-ampo, mobati ko og kalinaw. Nindot nga mobati niana ug mopahulay kadiyot sa mga kaguliyang. Niadto nga mga panahon sa kalinaw, mas mapaduol ko sa Manluluwas ug molambo diha sa ebanghelyo.
Zoe B., edad 17, Utah, USA