Moroni dhe Mekaniku
Nga Plaku Klaudio R. M. Kosta,
i Të Shtatëdhjetëve
“Dhe një fëmijë i vogël do t’i udhëheqë ata” (2 Nefi 30:12).
Shumë vite më parë, familja jonë po shkonte me makinë në shtëpi në San‑Paolo, Brazil, pasi vizituam të afërmit. Pikërisht ndërsa po ngjiteshim në një rrugë të pjerrët, makina jonë u prish.
Ne u përpoqëm për disa minuta ta ndiznim përsëri makinën. Por nuk u ndez. Kaluan makinë pas makine. Asnjë nuk ndaloi të ndihmonte.
Më në fund i thashë familjes sime se duhej të luteshim. Biri im gjashtëvjeçar, Moroni, tha: “Mos u mërzit, babi. Unë u luta tashmë.”
“Për çfarë u lute?” e pyeta.
“Iu luta Atit Qiellor që personi i duhur të kalojë këtu pranë për të na ndihmuar”, tha ai.
Shpejt dy drita të shkëlqyera u shfaqën pas makinës sonë. Ishte një kamion rimorkiues. Shoferi ishte mekanik.
“Jeni me shumë fat”, tha ai. “Unë e mbarova punën për sot dhe po kthehesha në shtëpi.”
Ai e rregulloi makinën tonë. Pastaj na ndoqi për t’u siguruar që të shkonim të sigurt në shtëpi.
E pyeta Moronin nëse e dinte sa e veçantë ishte kjo përvojë. “Sigurisht”, u përgjigj ai. “Ati Qiellor e dëgjoi lutjen time. Prandaj tani unë kam dëshminë time! Mua nuk më duhet ta marr më hua nga ty, babi.” Zemra ime u prek nga shembulli besnik i Moronit.
Moroni është rritur tani, por unë ende e kujtoj shembullin e tij të mirë kur ai ishte i vogël. Edhe si fëmijë, ju mund të jeni shembull për familjen dhe miqtë tuaj.