Ngaahi Fehuʻí mo eTalí

“Makehe mei he lotú mo e ako folofolá, ko e hā ʻa e founga lelei taha ke fakamālohia ai ʻeku fakamoʻoní?”

Mahalo he ʻikai ke ke maʻu kotoa hoʻo fakamoʻoní fakaʻangataha pē. ʻE tupu ia ʻi ha aʻusia fakalaumālie ʻe taha ʻi ha taimi—hangē ko e lau ʻa e folofolá, “ʻi he ʻotu lea ki he ʻotu lea, mo e akonaki ki he akonaki” (2 Nīfai 28:30). Kuo pau leva ke ke tanumaki mo fakamālohia hoʻo fakamoʻoní, hangē tofu pē ha tengaʻi ʻakau ʻoku tupú (vakai, ʻAlamā 32:28–43). Pea hangē ko e ʻikai lava ha fuʻu ʻakau ʻo tupu ʻi he vaí ʻataʻatā peé, ʻoku ʻikai ha founga “lelei taha” pē ʻe taha ke fakamālohia ai hoʻo fakamoʻoní. Te ke fie maʻu ha ngaahi founga ʻoku tuifio.

Ko e lotú mo e ako folofolá ko ha ongo founga lelei moʻoni ia ke fafangaʻi ai hoʻo fakamoʻoní. Pea ʻi hoʻo ako ʻa e ongoongoleleí mo lotu ʻi he loto fakamātoato ke ʻiloʻi pe ʻoku moʻoni ha meʻa, ʻe tokoni atu ʻa e Laumālie Māʻoniʻoní ke ke ongoʻi ʻa e moʻoni ʻo e ongoongoleleí (vakai, Molonai 10:4–5).

Te ke lava foki ʻo fakamālohia hoʻo tuí ʻaki haʻo tauhi ʻa e ngaahi fekaú. ʻI he taimi ʻokú ke moʻui ʻaki ai ha tefitoʻi moʻoni ʻo e ongoongoleleí—hangē ko e ʻaukaí, tauhi ʻo e ʻaho Sāpaté ke māʻoniʻoní, pe maʻu ʻa e sākalamēnití—te ke lava leva ke kamata maʻu ha fakamoʻoni ki he founga pea mo e ʻuhinga ʻoku moʻoni aí, kae ʻikai koeʻuhí pē he ʻoku moʻoni. Naʻe folofola ʻa Sīsū ko e taimi te ke fili ai “ke fai hono finangaló, te ke “ʻilo ʻa e akonakí” (Sione 7:17).

Ko ha founga ʻe taha ke tanumaki ai hoʻo fakamoʻoní ko hono vahevahe ia. Naʻe pehē ʻe Palesiteni Poiti K. Peeka (1924–2015), Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, “ʻOku maʻu ha fakamoʻoni ʻi hono vahevahe atu iá!” (“The Candle of the Lord,” Ensign, Sanuali 1983, 54; Tambuli, Siulai, 1983, 34). Te ke lava ʻo fai hoʻo fakamoʻoní ʻi he lotú mo e seminelí, ʻi ʻapi, pea ʻi he ngaahi kaungāmeʻá. ʻE lava ʻe he Laumālie Māʻoniʻoní ke fakamoʻoniʻi atu kiate koe ʻi hoʻo fai iá, ko e meʻa ʻokú ke vahevahé ʻoku moʻoni.

ʻE tupulaki mo fakaloloto hoʻo fakamoʻoní, pea te ke ongoʻi ha nonga mo ha fiefia ʻi hoʻo fakamālohia hoʻo fakamoʻoní ʻi ha ngaahi founga kehekehé.

Ngāue mo e Kau Faifekaú

Kuo hoko ʻa e ngāue fakafaifekaú ko e founga lelei taha ia ke u fakamālohia ai ʻeku fakamoʻoní. ʻI he taimi kotoa pē ʻoku ou ngāue ai mo e kau faifekaú, ʻoku ou ongoʻi e ʻofa ʻa Kalaisí

Joy D., taʻu 19, Leite, ʻOtu Filipainí

Feinga ke ke Hoko ko ha Ākonga

Te ke lava ʻo fakamālohia hoʻo fakamoʻoní ʻaki haʻo feinga ke ke hoko maʻu pē ko ha ākonga moʻoni ʻo Sīsū Kalaisi. ʻOku ngaohi kitautolu ʻe heʻetau talangofua ki he ngaahi fekau ʻa e ʻOtuá ke tau lototoʻa ʻi heʻetau fakamoʻoní, pea ʻokú ne ngaohi leva ʻetau fakamoʻoní ke toe mālohi ange mo mateuteu ki he puleʻanga ʻo e ʻOtuá (vakai, T&F 76:79). Te ke lava foki ʻo fakamālohia hoʻo fakamoʻoní ʻaki hono vahevahe ia.

ʻEletā Muli Saimone, taʻu 23, Misiona Lepāpulika Fakatemokalati ʻo Kongokou Lutumupasí.

Fakafanongo ki he Laumālie Māʻoniʻoní

ʻE toki tokoni pē ʻalu ki he lotú, lau folofolá, fakafanongo ki he ngaahi malanga konifelenisí, mo e ngaahi meʻa peheé ke fakamālohia hoʻo fakamoʻoní kapau te ke fakafanongo ki he Laumālie Māʻoniʻoní. Te ne fakamoʻoniʻi atu ʻa e moʻoní kiate koe. Fakafanongo maʻu pē ki he Laumālie Māʻoniʻoní, he ʻokú Ne ʻi ai ke tokoni atu ke fakamālohia hoʻo fakamoʻoní.

ʻAlisa B., taʻu 16, Vesinia, USA

Vahevahe ʻa e Meʻa ʻOkú ke ʻIlo ʻOku Moʻoní

Kuó u ʻilo ko e taha ʻo e ngaahi founga lelei taha ke fakamālohia ai ʻeku fakamoʻoní ko hono vahevahe ia mo e niʻihi kehé. Ko e taimi kotoa pē ʻoku ou vahevahe ai e meʻa ʻoku ou tui ki ai mo ʻilo ʻoku moʻoní—neongo pe ko e hā ʻene siʻisiʻi—ʻoku ou ongoʻi ha māfana lahi ʻi hoku fatafatá, pea ʻoku haʻu fakataha mo ia ha fakamahino lahi ange ʻi hoku lotó ʻoku moʻoni ʻa e ngaahi meʻa kuó u lea ʻakí! Ko hono fakalea ʻe tahá, ʻoku ou ongoʻi hono fakamālohia ʻeku fakamoʻoní.

Takilisi S., taʻu 20, Sao Paulo, Palāsila

ʻAlu ʻo Ngāue Fakafaifekau

ʻE fakamālohia ʻe he ʻalu ʻo ngāue fakafaifekaú hoʻo fakamoʻoní maʻa koe pea mo e niʻihi ʻokú ke akoʻí. Te ke ako ʻi he ngāue fakafaifekaú ke ke falala kakato ki he ʻEikí kae ʻikai ki ho mālohi ʻoʻoú. ʻE fakamālohia ʻe he ngāue fakafaifekaú koe, pea ʻi hoʻo tokoni ki he ʻEikí mo fai ʻEne ngāué, te ne fakamālohia hoʻo fakamoʻoní.

ʻEletā Peili Pealiʻi Uiliami, taʻu 19, Misiona Singapoá

Hoko ʻo Anga Faka-Kalaisi Ange

Te tau lava ʻo fakamālohia ʻetau fakamoʻoní ʻaki haʻatau anga faka-Kalaisi lahi ange. Kuó u fakamālohia ʻeku fakamoʻoní ʻi he taimi naʻá ku fakahaaʻi ai e ʻofa haohaoa ʻa Kalaisí mo tokoniʻi ʻa e niʻihi kehé ʻo hangē naʻe fai ʻe he Fakamoʻuí.

Kungi Sini P., taʻu 17, Soulu, Kōlea Tonga

Fai Hoʻo Fakamoʻoní

Ko ha founga lelei ʻe taha ke fakamālohia ai hoʻo fakamoʻoní ko hono fakahoko ia. ʻI he taimi ʻe niʻihi ʻokú ke maʻu hoʻo fakamoʻoní, ʻi hoʻo vahevahe iá. Te ke lava foki ʻo ʻaukai ke ke ʻilo ʻiate koe pē pe ko e meʻa ʻokú ke akoʻí ʻoku moʻoni. Kuó u ʻosi fakahoko fakatouʻosi ʻa e ongo meʻá ni, pea kuó na fakamālohia lahi fau ʻeku fakamoʻoní.

Poota S., taʻu 12, ʻAitahō, USA

Tokoniʻi ʻa e Niʻihi Kehé

Makehe mei he lotú mo e ako folofolá, te u pehē ko e founga lelei taha ke fakamālohia ai hoʻo fakamoʻoní ko e ngāue tokoní. ʻI he taimi ʻoku tau tokoni ai ki he niʻihi kehé, ʻoku tau fakahaaʻi ki he ʻOtuá ʻoku tau tokanga ki Heʻene fānaú. ʻIkai ngata aí, te tau lava ʻo maʻu ʻa e Laumālié ʻi he taimi ʻoku tau fai ai e ngāue ʻa e ʻOtuá. ʻOku ou ʻiloʻi ʻoku tuʻo lahi haʻaku maʻu e fakafiemālie ʻi he ngaahi taimi faingataʻá mo ha tali ki he ngaahi fehuʻí ʻi he lolotonga ʻo hono fakahoko e ngāue tokoní.

Kalolaine J., taʻu 18, ʻIutā, USA

ʻOku fakataumuʻa ʻa e ngaahi talí ko ha tokoni mo ha fakakaukau, ka ʻoku ʻikai ko hano fakahaaʻi ʻo ha tokāteline ʻo e Siasí.

Ko Hono Tanumaki ʻo Hoʻo Fakamoʻoní

Palesiteni Henry B. Eyring

“Kae hangē ha ʻakau ʻoku tupú kuo pau ke tanumaki [ha fakamoʻoni] he ka ʻikai ʻe mae. … ʻOku hoko e talangofua ki he ngaahi fekaú ko ha konga ia ʻo e tanumaki kuo pau ke ke fai ki hoʻo fakamoʻoní.

Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “Ko ha Fakamoʻoni Moʻui,” Liahona, Mē 2011, 125.

Fehuʻi Ka Hokó

Te u lava fēfē ke fakaafeʻi ʻa e Laumālié ki hoku ʻapí ʻi he taimi ʻoku kē pe fakafekiki ai ʻa e kakaí?

ʻOmai hoʻo talí, pea kapau ʻe fie maʻu, mo ha laʻi tā ʻata lelei kimuʻa he ʻaho 15 ʻo Nōvema 2017, ki he liahona.lds.org (lomiʻi ʻi he “Submit an Article”) pe ʻīmeili ki he [e-mail].

Kātaki ʻo fakakau mai ʻa e fakamatala ko ʻení: (1) hingoa kakató, (2) ʻaho fāʻeleʻí, (3) uōtí pe koló, (4) siteikí pe vahefonuá, (5) hoʻo tohi fakangofuá, mo e tohi fakangofua ʻa hoʻo mātuʻá kapau ʻokú ke siʻi hifo ʻi he taʻu 18, (ʻe tali pē ʻa e ʻī-meilí) ke pulusi hoʻo talí mo e taá.

ʻE lava ke ʻētitaʻi ʻa e ngaahi talí koeʻuhí ke lōloa feʻunga pe mahino.