2017
Founga ʻOku Lava ai ʻe ha Pōpoaki Konifelenisi ʻo Liliu Hoʻo Moʻuí
October 2017

Founga ʻOku Lava ai ʻe ha Pōpoaki Konifelenisi ʻo Liliu Hoʻo Moʻuí

Fai ʻe Hadley Griggs

ʻOku nofo ʻa e tokotaha naʻá ne faʻú ʻi ʻIutā, USA.

Te ke lava moʻoni ke hoko lahi ange ʻo hangē ko Sīsū Kalaisí. ʻE tokoni atu ʻa e ngaahi meʻangāué ni ke ke ʻilo hono foungá.

ʻĪmisi
desk with laptop and general conference issue

ʻOkú ke fie maʻu ha fakaake fakalaumālie? ʻOkú ke pehē te ke ala fakaʻaongaʻi ha kiʻi fakahinohino fakalaumālie? ʻOkú ke monūʻia, koeʻuhí ʻe lava ʻo hoko ʻa e konifelenisi lahí ko ha tokoni! Kuo pehē ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá: “Ki he kāingalotu kei talavou ʻo e Siasí, ʻoku ou palōmesi atu kapau te ke fakafanongo [ki he konifelenisi lahí], te ke ongoʻi moʻoni e Laumālié. ʻE fakahā atu ʻe he ʻEikí Hono finangalo ki hoʻo moʻuí.”1

Pea ʻoku ʻikai ngata ia ʻi he fakaʻosinga ʻo e uike konifelenisí—te ke lava ʻo kei ongoʻi ʻa e Laumālié ʻaki haʻo ako e ngaahi malangá ʻi heʻene ʻosí!

ʻOku tokoniʻi kitautolu ʻe he konifelenisí ʻi ha ngaahi founga lahi. Mahalo ko e mahuʻinga tahá, ko ʻene ʻai ke tau ʻunu ʻo ofi ange ki he Fakamoʻuí ʻaki hono akoʻi kitautolu ki he founga ke hoko lahi ange ʻo hangē ko Iá. Ko ha founga lelei ke maʻu ha meʻa lahi ange mei he konifelenisí ke te tokanga makehe ki he ngaahi akonaki fekauʻaki mo e ngaahi ʻulungaanga faka-Kalaisí—ʻo tatau ai pē pe ʻoku ʻi he lolotonga ʻo e fakamafolá pe lolotonga hoʻo ako ʻa e ngaahi leá ʻi heʻene ʻosí. ʻI hoʻo fanongo pe lau ʻaki ha faʻahinga ʻulungaanga faka-Kalaisi ʻi ho ʻatamaí, ʻe lava ʻa e fakaleá mo e Laumālié ke ne tokoniʻi koe ke ke ʻilo ʻa e founga ke anga faka-Kalaisi lahi ange aí.

Te ke lava ʻo fakahoko ʻa e kiʻi sivi vave ko ʻení ke ʻiloʻi pe ko e hā ha ʻulungaanga ʻe taha pe ua te ke fie tokanga taha ki ai ʻi haʻo ako ʻa e ngaahi pōpoaki konifelenisí. (Ke maʻu ha kiʻi sivi loloto ange, vakaiʻi ʻa e makasini ʻo ʻOkatopa 2016 New Era pe vahe 6 ʻo e Malanga ʻAki ʻEku Ongoongoleleí.)

ʻI he ngaahi ʻulungaanga faka-Kalaisi ʻe hiva ʻi laló, fili e fakamatala te ne fakamatalaʻi lelei taha koé.

  1. Tuí:

    1. ʻOku ʻikai ke u fakapapauʻi pe ko Sīsū Kalaisi hoku Fakamoʻuí.

    2. ʻOku ou tui kia Sīsū Kalaisi mo tali Ia ko hoku Fakamoʻui.

    3. Fakatauange ko Sīsū Kalaisi hoku Fakamoʻuí.

  2. ʻAmanaki leleí:

    ʻĪmisi
    young man

    1. ʻOku ou ongoʻi nonga mo fakatuʻamelie ki he kahaʻú.

    2. ʻOku ou manavahē ʻi he kahaʻú!

    3. ʻOku ou faʻa tukunoaʻi pē ʻe au ʻa e kahaʻú—kapau he ʻikai ke u fakakaukau ki ai, he ʻikai ke u hohaʻa ki ai.

  3. Manavaʻofá mo e ʻOfá:

    1. ʻOku ou feinga ke ʻofa ʻi he kakai kehé, ka ʻoku ʻi ai ha kakai ʻe niʻihi ʻoku hangē ʻoku nau fakatupu ʻita maʻu peé.

    2. ʻOku ou fuʻu femoʻuekina he feinga ke ngāueʻi ʻeku moʻuí ʻo faingataʻa ai ke u toe fakakaukau ki ha taha kehe.

    3. ʻOku ou fie maʻu ke tuʻunga lelei taʻengata mo fiefia ʻa e kakai kehé.

  4. Angamaʻá:

    1. Ke maʻa ʻi he fakakaukau mo e ngāue.” ʻOku ʻikai ke fuʻu ongo fakafiefia fēfē!

    2. ʻOku maʻa mo haohaoa hoku lotó.

    3. ʻOku faingataʻa ke u maʻa mo haohaoa maʻu pē.

  5. ʻIló:

    ʻĪmisi
    young woman reading scriptures with younger sister

    1. ʻOku fuʻu lahi e meʻa ʻoku ou faí pea ʻoku ʻikai faʻa lava ʻo maʻu ha taimi ke u kumi e tali ki heʻeku ngaahi fehuʻí.

    2. Hooi. Ko hoʻo ako? ʻI he taimi ʻe niʻihi ʻoku fuʻu taʻeoli e feinga ke ako ha meʻa.

    3. ʻOku ou feinga fakamātoato ke mahino kiate au e moʻoní mo maʻu e tali ki heʻeku ngaahi fehuʻí.

  6. Faʻa-kātakí:

    1. ʻOku ou lava ʻo tatali ki ha ngaahi meʻa taʻe ʻita pe loto mamahi.

    2. Mahalo te u lava ʻo tatali ki ha ngaahi meʻa, ka ʻoku lava pē ke u ʻita ai.

    3. Ko e meʻa kovi tahá ʻa e tatali ki ha meʻa. ʻOku ou fie maʻu e meʻa kotoa he taimí ni.

  7. Loto fakatōkilaló:

    1. ʻOku ou loto ke fakapapauʻi ʻoku ou fai e meʻa kotoa pē ʻiate au pē.

    2. ʻOku ou falala ki he ʻEikí ke maʻu ha tokoni.

    3. ʻI heʻeku ngāue ʻi ha faʻahinga meʻa, ʻoku faʻa ngalo ʻiate au te u lava ʻo kole tokoni ki he Tamai Hēvaní.

  8. Faivelengá:

    1. ʻOku ou fakamoleki e meimei kotoa hoku taimí ʻi he sio TV, ʻeva mo hoku ngaahi kaungāmeʻá, mo fakaʻehiʻehi mei he fatongiá!

    2. ʻOku ou faʻa faingataʻaʻia ke tokanga ki he ngaahi meʻa mahuʻinga ʻi heʻeku moʻuí, ka ʻoku ou feinga.

    3. ʻOku ou fakamoleki hoku taimí mo hoku iví ʻi he ngaahi meʻa mahuʻinga tahá.

  9. Talangofuá:

    1. ʻOku ou muimui loto fiemālie ki he faleʻi ʻa ʻeku kau takí mo ʻeku mātuʻá.

    2. ʻOku meimei ko au pē ʻoku pule kiate aú—ʻoku faʻa faingataʻa ke u fanongo ki ha toe taha kehe.

    3. ʻOku ou muimui ki he faleʻi ʻa ʻeku kau takí mo ʻeku mātuʻá, ka ʻoku ou faʻa ngulungulu he taimi ʻe niʻihi.

ʻĪmisi
young woman

Vakai he taimí ni ki hoʻo ngaahi talí. Ko e fē ʻa e ʻulungaanga ʻokú ke fie ngāueʻí? Te ke lava ʻo fili ha taha pe ua pea tokanga ki ai he lolotonga hoʻo fanongo ki he konifelenisí, ke ke ʻilo mo fakatupulaki kinaua.

Pea kapau ne ke tali ʻokú ke sai ʻi he meʻa kotoa pē, pukepuke ia! Te ke kei lava pē ʻo fili ha taha pe ua ne hā mahino kiate koe he lolotonga ʻo e kiʻi siví pea tokanga ki ai ʻi he lolotonga hoʻo ako e konifelenisí. Ko e fē pē ho tuʻunga ʻi hoʻo fononga ke anga faka-Kalaisí, te ke lava maʻu pē ke vakai ki he ngaahi akonaki hoʻo kau takí ke tokoni atu ʻi ho halá.

Kapau he ʻikai ke ke lava ʻo fili ha ʻulungaanga he taimí ni, ʻoua te ke hohaʻa! Te ke lava maʻu pē ke fanongo ki he konifelenisí mo fakatokangaʻi ai e meʻa ʻe mahuʻinga mālie kiate koé.

Hili pē hoʻo fili ʻa e ʻulungaanga ʻokú ke fie maʻu ke ke tokanga ki aí, mahalo te ke fie hiki ia ke ke lava ʻo mateuteu ke maʻu ha fakahā fekauʻaki mo ia lolotonga hoʻo fanongo ki he konifelenisí pe ʻi hoʻo ako e ngaahi leá ʻi heʻene ʻosí. Lolotonga hoʻo fanongo mo akó, tuku ke tataki koe ʻe he Laumālié ki ha ngaahi founga mahino te ke lava ai ʻo ngāueʻi ʻa e ʻulungāngá. Vakai ki he sīpinga ʻi laló!

Maʻuʻanga Fakamatalá

  1. Robert D. Hales, “Konifelenisi Lahi: Ko e Fakamālohia ʻo e Tuí mo e Fakamoʻoní,” Liahona, Nōvema 2013, 6.