Ngaahi ʻAta ʻo e Tuí
ʻIliā Totasi
Tulesa, ʻAlapēnia
ʻOku vakavakaiʻi ʻe ʻIliā ʻene ngaahi meʻangāué lolotonga hono fua ʻe hono fohá hono māʻolungá.
ʻOku tūʻulutui ʻa ʻIliā mo hono uaifi ko Kilisitiná ʻo lotu mo ʻena fānaú.
Kuo tā ʻe he ngāue fakapīsope ʻa ʻIliaá ha sīpinga lelei ki hono fohá, ʻa ia ʻokú ne pehē “ʻOku ʻi ai ʻeku fakamoʻoni mālohi. ʻOku ou ʻofa ʻi hoku fāmilí mo lotua ʻi he ʻaho kotoa pē siʻi kakai fie maʻu tokoní.”
ʻOku fononga ʻa ʻIliā mo hono fohá ʻi he ngaahi hala lalahi ʻo Tulesí.
Kuo hoko ʻa ʻIliā mo Kilisitina ko ha ongo mēmipa ʻo e Siasí ʻi ha taʻu ʻe 10.
ʻOku ʻikai tokamālie maʻu pē ʻa e ngāué, ka ʻi heʻene hoko ko e tamai mo e pīsopé, kuo feinga maʻu pē ʻa ʻIliā Totasi ke fakahaaʻi ki heʻene fānaú ʻoku kei mahuʻinga maʻu pē ia.
Cody Bell, taha faitaá
Naʻe ʻi ai ha foʻi ngungu ʻi he kete ʻo ha fefine matuʻotuʻa ʻi he uōtí pea ne fie maʻu tokoni ʻi he ʻaho kotoa pē koeʻuhí he naʻe ʻikai toe lava ʻo mavahe mei hono mohengá. Ne faifai pē, pea ne kole mai pe te u lava ʻo ʻalu ange, kae ʻikai ko ha toe taha maʻu lakanga fakataulaʻeiki pe ha toe taha kehe, he naʻe fuʻu puke pea ʻe mate. Naʻá ne ongoʻi fiemālie ʻi he tokoni ange ʻene pīsopé.
Naʻe tafa hoku mafú ʻi ha ʻaho ʻe taha, pea naʻe ʻikai ke u lava ʻo ʻaʻahi ki ai ʻi ha kiʻi vahaʻa taimi nounou. Naʻá ne pehē ʻi heʻeku foki atu ke vakaí, “ʻE pīsope, ʻe lava fēfē ke ke haʻu ʻo tokoniʻi au kapau naʻe toki tafa koe?”
Naʻá ku talaange ki ai, “Ko hoku uiuiʻí ke tokoniʻi ʻa e niʻihi kehé.”
Naʻe vave ke mālōlō pea naʻe kamata ke hōloa hono sinó. Naʻe faingaʻata ke sio ki ai ʻi he tuʻunga ko iá, ka naʻe ʻikai ilifia ia ke mate. Naʻá ne ʻofa ki he ʻOtuá mo ʻiloʻi e palani ʻo e fakamoʻuí. Naʻá ne pehē, “ʻOku ou ʻiloʻi ʻoku ʻi ai ha palani fakaʻofoʻofa ʻa e ʻOtuá maʻaku.”
Naʻá ku fakakaukau ʻi siʻene mālōloó ki he ngaahi aʻusia naʻá ku maʻu mo iá mo e lelei ʻo hoku fatongia ko e pīsopé. ʻOku ou houngaʻia ke ngāue maʻá e niʻihi kehé, ʻofa he niʻihi kehé, mo faitokonia kinautolu. ʻOku ou ʻofa ʻi he ongoongoleleí.