ʻOku Tokanga ʻa e Tamai Hēvaní ki Heʻeku Pisinisí
Buyisile Zuma
Kuasili-Natala, ʻAfilika Tonga
Tā fakatātā ʻa Allen Garns
Naʻá ku ongoʻi ʻa e fatongia mafatukituki ʻo e tokonaki maʻa hoku fāmilí ʻi heʻeku hoko ko ha faʻē tāutahá. Ko ha tokotaha ngāue tauhi ʻapi au, ka ʻoku ʻikai tokonaki ʻe heʻeku ngāué ha meʻa feʻunga maʻa hoku fāmilí. Naʻá ku kau ki ha kulupu moʻui fakafalala pē kiate kita koeʻuhí ke u lava ʻo ako e founga ke fakaleleiʻi ai hoku tūkungá.
Naʻe ueʻi hake au ʻe he kulupu “Ko Hono Kamata mo Fakatupulaki ʻEku Pisinisí” peá u pehē te u lava ʻo tuitui mo fakatau ha ngaahi kato ʻaofi ki he ngaahi kulo kuki māmālié. Naʻá ku tuitui ʻa e ngaahi kató ʻo aʻu ki he tuʻuapoó,ʻi heʻeku foki mai mei heʻeku ngāue he ʻahó.
Naʻá ku kei ngāue fuoloa ʻi ha pō ʻe taha ʻi ha ʻota lahi naʻe tonu ke ʻosi ʻi he pongipongi hono hokó ka naʻe maumau ʻeku mīsini tuituí. Naʻe tuʻuapō, pea naʻe ʻikai ha toe taha ngaahi mīsini ia ʻe maʻu ke tokoni. Naʻe ʻomi e mīsiní mo ha fanga kiʻi meʻangāue, ka kuo teʻeki ai ke u teitei ngaahi ha mīsini tuitui kimuʻa. Naʻe ʻikai ke u ʻilo pe te u kamata ʻi fē.
Pea haʻu ki heʻeku fakakaukaú ʻa e lēsoni ʻi he tohi lēsoni Ko Hoku Fakavaʻé ko hono tefitó ko e “Ngāueʻaki ʻa e Tui kia Sīsū Kalaisí.” Naʻá ku ʻilo ʻi he taimi ko iá naʻe fie maʻu ke u falala ki he ʻEikí. Ne u tō hifo ʻo tūʻulutui mo tautapa: “Tamai Hēvani, ʻaloʻofa ʻo tokoni mai ke u ngaahi e mīsini ko ʻení ke lava ʻo fakakakato ʻa e ʻotá ke ʻave ʻe he taha fakataú ʻauhu. Tamai Hēvani, tokoni mai kiate au!”
Ne u maʻu leva ha ongo makehe ke toʻo ʻa e sikulutulaivá mei he kato meʻangāué pea fakaʻaongaʻi ia ke tekeʻi ha konga pau ʻi he mīsini tuituí. Naʻá ku fai ia, ʻo falala kakato ki heʻeku tuí. Naʻá ku mihiʻi ʻeku mānavá, ʻi heʻeku fakamoʻui ʻa e mīsiní. Naʻe ngāue!
Naʻá ku lava ʻo fakaʻosi kei taimi e ʻotá. Naʻá ku ʻilo ʻa e tuʻunga ʻo ʻete maʻu e Tamai Hēvaní mo Sīsū Kalaisi ko ha ongo hoa ngāue pisinisí. ʻOku ou ʻiloʻi ʻe kei tāpuakiʻi au kapau te u kumi ha ngaahi faingamālie ke fakaʻaongaʻi ʻa e meʻa kuó u ako ʻi he kulupu moʻui fakafalala pē kiate kitá.