Ko ha Tali Fakalaumālie ʻi ha ʻInitaviu Ngāue
Gibrair Padilha Dos Santos
Sao Paulo, Palāsila
Tā fakatātā mei he Getty Images
Hili hono vahe mai ke u hoko ko ha taki ʻi he kōmiti moʻui fakafalala pē kiate kita ʻa e siteikí, naʻá ku fakatokangaʻi ʻoku ʻikai feʻunga ʻeku ngāué. Naʻá ku fie maʻu ha meʻa lahi ange ki heʻeku moʻui fakafoʻituituí, ʻi heʻeku ʻiloʻi ení.
Naʻá ku ongoʻi ha loto holi foʻou ke maʻu ha ngāue lelei ange pea kole tokoni ʻi hono faʻu ʻo ha tohi talangāue fakapalofesinale. Naʻá ku ʻave ʻeku tohi talangāue foʻoú ki ha ngaahi pisinisi pea ʻikai fuoloa kuo ui au ki ha ngaahi ʻinitaviu.
ʻI ha ʻinitaviu ʻe taha, ne fakamahino mai ʻe he taha fai ʻinitaviú ha laine ʻi heʻeku tohi talangāué ʻoku hā ai ʻeku ngāué ko ha tokoni ʻi he kau palesitenisī ʻo e siteikí peá ne ʻeke mai, “Te ke lava ʻo fakamatala mai ʻi ha sekoni ʻe nima ʻa e ʻuhinga ʻo e ngāue fakasiasi ko ʻení?”
Naʻá ku talaange ʻoku ou ʻi ha tuʻunga taki ʻo ha faʻunga ʻokú ne fatongiaʻaki hono fakahinohino mo tokangaʻi e tūkunga ʻo ha kakai ʻe toko 2,500 tupu. Naʻe mahuʻingaʻia ʻa e taha fai ʻinitaviú peá ne pehē mai, “ʻOkú ke maʻu ha miniti ʻe taha ke ke fakakaukauʻi ai e founga ke fai mai ha tali sekoni ʻe nima ki he fehuʻi ko ʻení: ʻoku founga fēfē hoʻo fakahinohinoʻi e kakai ʻe toko 2,500?”
Naʻá ku ʻiloʻi ko e momeniti mahuʻinga taha ʻeni ʻi he ʻinitaviú. Naʻá ku lotu ʻo kole ki heʻeku Tamai Hēvaní ha tokoni peá u manatuʻi vave ʻa e ngaahi lēsoni naʻá ku ako mei he kulupu moʻui fakafalala pē kiate kitá. Naʻá ku maʻu ha loto lahi.
Hili pē ha miniti ʻe taha, kuo ʻeke mai ʻe he taha fai ʻinitaviú, “ʻOku founga fēfē hoʻo tataki ʻa e kakai ʻe toko 2,500 ko iá?”
Naʻá ku tali ange, “ʻOku mau tokoni ke nau fokotuʻu ha ngaahi taumuʻa.”
Ne tuʻu leva ʻa e tokotaha fai ʻinitaviú, lulululu mo au, peá ne pehē mai, “ʻOku fakangāueʻi koe.”
ʻOku fakaofo hono tataki au ʻe he toʻukupu ʻo e ʻOtuá mo tali ʻeku lotú. ʻOku ou fakafetaʻi ki hoku Fakamoʻuí ʻi heʻene ueʻi ʻa e kau takí ke nau fokotuʻu e polokalama moʻui fakafalala pē kiate kitá. Kuó ne tāpuekina fakafoʻituitui au, pea kuó u mamata ʻi he founga faingofua mo fakalaumālie hono tāpuakiʻi ʻe he polokalama moʻui fakafalala pē kiate kitá ha tokolahi kehe ʻi homau siteikí. ʻOku ou tui moʻoni ki he lava ʻe he ngaahi tefitoʻi moʻoni ʻo e moʻui fakafalala pē kiate kitá ʻo hiki hake ʻa e moʻuí ʻi he taimi ne u hoko ai ko e taki ki ha kau ngāue ne laka hake he toko 15 ʻi heʻeku ngāue foʻoú, naʻá ku kamata akoʻi kinautolu ʻi he ngaahi tefitoʻi moʻoni ʻo e moʻui fakafalala pē kiate kitá.
Kuó u tupulaki pea ʻoku ou malava lahi ange ʻi he tuʻunga naʻá ku fakakaukau ki aí. ʻOku ou maʻu ʻeni ha vāhenga ʻokú ne tauhi au mo hoku fāmilí. ʻOku tokoni e polokalamá ni ke mau fakalakalaka ʻi he ʻaho takitaha ʻaki ʻene tokoni ke mau moʻui fakafalala lahi ange kiate kimautolu.