Si Clarence batok sa Kampyon
Si Clarence nagtambo sa bintana sa sakyanan samtang nakita ang pantalan. Ang mga barko naglulaw sa tubig atubangan sa mabulukon nga mga balay ug mga tindahan. Ang Copenhagen, Denmark, usa ka maanindot nga siyudad nga puno sa mga palasyo, mga mansyon, ug mga parke. Dili gayud kini sama sa yutang natawhan ni Clarence didto sa Utah, USA. Mahulagway ni Clarence ang abog nga mga karsada diin makiglumba siya og dagan niadtong bata pa siya. Karon usa na siya ka sakop sa United States Track team, ug inig ka ugma iya nang maatubang ang labing inila nga Danish runner diha sa importanting lumba.
Ang awto mihunong sa usa ka gamayng chapel diin ang miting sa Simbahan nagsugod na.
Samtang si Clarence hilum nga misulod agi sa luyo nga lingkuranan diha sa miting, usa sa mga misyonaryo nga naglingkod sa atubangan nakabantay niya gikan sa artikulo sa pamantalaan mahitungod sa lumba inig ka ugma. Ang presidente sa branch mihangyo ni Clarence sa pag-adto sa atubangan ug mamulong.
Human si Clarence misulti nganong mibisita siya, ang usa ka batang lalaki mibarug ug miisa sa iyang kamot. “Sa imong hunahuna mapildi kaha nimo ang Danish nga kampyon?” siya nangutana.
Wala makahibalo si Clarence unsa ang iyang isulti. Ang Danish nga runner nakahimo og mas maayo nga oras sa gilay-on nga milya nga nadagan nianang tuiga.
“Siyempre makahimo siya,” matud pa sa usa sa mga misyonaryo nga diha sa atubangan ni Clarence sa wala pa siya makatubag. “Tungod kay nagsunod siya sa Pulong sa Kaalam.” Miabli siya sa iyang mga kasulatan ngadto sa Doktrina ug mga Pakigsaad 89. Iyang gibasa ang saad nga kadtong nagsunod sa Pulong sa Kaalam “modagan ug dili maluya, og molakaw ug dili makuyapan” (bersikulo 20).
Unsay ikasulti ni Clarence? Siya nasayud nga ang Pulong sa Kaalam tinuod. Ug isip usa ka bata misaad siya nga kanunayng mosunod niini. Apan sa kana lang wala magpasabut nga makadaug na siya sa lumba. Ang pagdaug nagkinahanglan usab og praktis ug kahanas. Sa pagbiya ni Clarence sa miting, naghunahuna siya “Total, wala man bitaw usa nga gikan sa simbahan ang moadto sa lumba ugma.”
Pagkasunod gabii samtang si Clarence nag-warm up para sa iyang lumba, sa pagtan-aw niya ug nakita ang duha ka mga misyonaryo uban sa usa ka grupo nga mga 17 ka mga batang lalaki. Sila miabut na!
Samtang nagkaduol na, usa sa mga misyonaryo mihunghong ngadto ni Clarence, “Kon nakadagan man ka sukad sa imong kinabuhi, mas maayo modagan ka karong gabhiuna.” Kadaghanan sa mga batang lalaki dili mga miyembro sa Simbahan apan mianhi uban sa ilang mga higala aron makita kon ang Pulong sa Kaalam tinuod ba gayud.
Nabalaka si Clarence. Dinhi niining lumba, ang iyang kinamaayohan tingali dili pa igo. Apan modagan siya alang sa usa ka baruganan sa ebanghelyo ni Jesukristo. Siya kinahanglan gayud modaug. Wala pa siya sukad nag-ampo nga modaug, apan nakakita siya og bakanting lawak aron maka-ampo.
Nag-ampo siya, “Amahan sa Langit, nasayud ko nga ang Pulong sa Kaalam tinuod, ug wala gyud ko misupak niini. Palihug panalangini ako uban sa kadaugan niining lumba.” Samtang naglakaw siya padulong sa starting nga linya, nasayud siya nga ang Langitnong Amahan nakadungog sa iyang pag-ampo. Misalig siya sa kabubut-on sa Langitnong Amahan.
Ang gabii ulanon ug lapukon. Samtang nagsugod na si Clarence sa lumba, ingon og sama ra kini sa ubang lumba nga iyang gidagan. Ang kapaspas kusog, ug ang kampyon nga Danish nag-una. Apan sa paghuman ni Clarence sa ika-tulo nga lap, kalit lang nga nawala ang iyang kakapoy. Mipaspas ang iyang dagan, ug dili kini sakit. Gipaspasan pa gayud og dyutay wala gihapon kini sakiti. Iyang naapsan ang kampyon nga Danish ug padayon ang kakusgon.
Samtang padulong na si Clarence nga motuyok, ang iyang coach misinggit, “Hinay lang! Dili unya ka makaabut sa finish line!” Apan si Clarence nasayud nga makapadayon siya og dagan. Ug sa dihang natapos niya ang lumba, nag-una siya og 50 ka yarda (46 m) sa Danish nga runner! Nasayud siya nga makadaug siya tungod kay gitubag sa Langitnong Amahan ang iyang pag-ampo ug tungod kay tinuod ang Pulong sa Kaalam.