Mga Tubag gikan sa mga Lider sa Simbahan
Unsaon sa Pag-angkon ang mga Panalangin sa Templo
Ni Elder Ronald A. Rasband
Sa Korum sa Napulog Duha ka mga Apostoles
Gikan sa usa ka debosyonal nga pakigpulong sa Brigham Young University nga gihatag niadtong Pebrero 10, 2009. Alang sa kompleto nga teksto sa Iningles, bisitaha ang speeches.byu.edu.
Ang mga templo mao ang mga balay sa Ginoo, diin ang mga pagtulun-an sa atong Manluluwas mapamatud-an pinaagi sa sagradong mga ordinansa sama sa bunyag alang sa mga patay ug kaminyoon, nga maghiusa sa mga pamilya sa tibuok kahangturan.
Moingon ko ninyo nga ang pagsimba nganha sa templo usa ka importanting sumbanan nga angayang buhaton alang sa matag usa kaninyo—sa tinagsa ug isip mga pamilya—samtang magkonsiderar kamo kon unsay tutukan ug hatagan og pagtagad, samtang inyong ipahimutang ang lig-ong mga pundasyon sa inyong kinabuhi. Nahibalo ko nga daghan na kaninyo ang naghimo niini, ug gumikan niana nagpasalamat kaayo mi kaninyo.
Ang unang kapangulohan mihimo og pagdapit sa tanang miyembro sa Simbahan, diin kini piho ninyo ug kanako nga magamit: “Kon ang panahon ug ang sitwasyon motugot, ang mga miyembro giawhag nga pulihan ang ilang mga paglingaw-lingaw ngadto sa pagserbisyo sa templo.”
Hinaut nga kita usab mohunahuna sa gisaad nga mga panalangin sa mga propeta, manalagna, ug mga tigpadayag samtang matinud-anon kita nga motambong sa templo. Gikan ni Presidente Thomas S. Monson naggikan kini nga saad: “Adto kamo sa templo ug pangayo og tabang sa Ginoo sa inyong mga palas-anon ug kaninyo mosulod ang bag-ong espiritu ug kamasaligon sa umaabut. Salig sa Ginoo, ug kon kamo mobuhat Siya mogunit ug moagak kaninyo ug motudlo kaninyo lakang sa usa ka lakang subay niana nga dalan padulong sa celestial nga gingharian sa Dios.”1
Laing makahupay nga panalangin sa pagsimba nganha sa templo mao ang kasiguroan sa proteksyon ug kalinaw gikan sa mga unos nga ania kanato karon. Ang pipila sa pinakaluwas nga mga dapit nga gi-establisar sa Langitnong Amahan alang sa pagpundok sa Iyang mga katawhan mao ang mga templo sa Ginoo.
Ang pamahayag diha sa atubangan sa gawas sa templo mabasa: “Kabalaan sa Ginoo / Ang Balay sa Ginoo.” Mopamatuod ko nga ang tanang templo sa Ginoo Iyang mga sanktwaryo dinhi sa kalibutan. Dapiton ko kamong tanan sa pagtambong kanunay sa templo, kutob sa itugot sa inyong kahimtang, ug angkona ang inyong mga panalangin ug mga panalipud nga gisaad diha ninyo sa mga propeta sa Dios.