Elder Dale G. Renlund: Usa ka Masulundon nga Sulugoon
Wala: litrato sa opisina pinaagi ni Tom Smart, Deseret News; litrato sa babaye pinaagi ni Joy Basso
Busy kaayo ang kinabuhi nila ni Dale ug Ruth Renlund. Hapit na mag treynta anyos ang ilang pangedaron, nagpuyo sa Baltimore, Maryland, USA. Nakahuman na si Dale sa medikal nga kurso sa University of Utah. Siya ug si Ruth mibalhin sa pikas nga bahin sa Estados Unidos aron magsugod sa lisud ug bantugan nga pagbansay isip bag-ong doktor sa Johns Hopkins School of Medicine. Aduna silay maanyag nga batang anak nga babaye, si Ashley. Ang iyang pinalanggang asawa, si Ruth, gipatambalan tungod sa kanser, ug si Dale masulundong midawat sa tawag nga moserbisyo isip bishop.
Mga litrato sa maayong kabubut-on sa pamilyang Renlund, gawas kon gipahibalo; portrait © Busath.com; background gikan sa iStock/Thinkstock
Sa iyang pagbisita sa mga miyembro sa ward, dad-on usahay ni Dale si Ashley. Usa ka adlaw mibisita sila og dili kaayo aktibo nga miyembro. “Nasayud ko nga walay mobalibad sa pagbisita niining makalingaw nga gamayng bata sa akong tupad,” naghinumdum si Elder Renlund. Nanuktok siya sa pultahan sa tawo nga masuk-anong misalikway sa counselor ni Bishop Renlund sa sayo pa.
Sa pag-abli sa tawo sa pultahan, dako siya kaayo nga pareha siya kadak-a sa pultahan. Iyang gisigahan sa mata si Bishop Renlund. Ang kwatro anyos nga si Ashley kalit nga misulti, “Nan, makasulod mi o unsa man?”
Wala damha, ang tawo miingon, “Siguro. Dali sulod.”
Sa dihang naglingkod na sila sa sulod, ang tawo misulti kang Bishop Renlund nga wala siya motuo nga ang Simbahan tinuod, ni siya nagtuo ni Jesukristo. Masuk-anon siyang mipadayon sa pagsulti samtang nagdula sa usa ka dulaan si Ashley. Sa katapusan minaog si Ashley sa lingkuranan, miali sa iyang kamot sa dunggan sa iyang papa, ug kusog nga mihunghong, “Daddy, sultihi siya sa tinuod.”
Busa gihimo niya kini. Si Bishop Renlund mihatag sa iyang pagpamatuod ngadto sa tawo. Nahinumdom siya, “Nahimong maayo ang kinaiya sa tawo, ug ang Espiritu misulod sa iyang panimalay.”
Karon isip usa ka sakop sa Korum sa Napulog Duha ka mga Apostoles, si Elder Renlund adunay oportunidad sa pagsulti sa kamatuoran ngadto sa tibuok kalibutan (tan-awa sa D&P 107:23). “Ang labing hingpit nga kalipay nga moabut,” nag-ingon si Elder Renlund, “mao ang pagtabang sa pagdala sa Pag-ula ni Jesukristo ngadto sa mga kinabuhi sa mga tawo bisan asa. Naghunahuna ko nga kini nga calling naghatag kanako og oportunidad nga mabuhat kana sa mas dako nga paagi, sa mas daghang dapit, isip usa ka saksi ni Kristo ngadto sa tibuok kalibutan.”
Gipadako diha sa Scandinavian nga panulundon
Si Dale Gunnar Renlund natawo sa Siyudad sa Salt Lake, Utah, USA, niadtong Nobyembre 3, 1952. Siya ug ang iyang mga kaigsoonan nagdako nga Swedish ang pinulongan. Ang ilang inahan, si Mariana Andersson, gikan sa Sweden, ug ang ilang amahan, si Mats Åke Renlund, gikan sa usa ka lungsod nga Swedish ang pinulongan sa kasadpan nga bahin sa Finland. Milalin sila gikan sa Sweden padulong sa Utah niadtong 1950.
Ang mga ginikanan ni Dale nagkaila sa simbahan sa Stockholm. Human nakahukom nga magminyo, determinado sila nga buhaton lamang kini sa templo. Tungod kay walay templo sa Europa niadtong higayuna (ang Bern Switzerland Temple gipahinungod niadtong 1955), ang duha miadto sa Utah aron ma-sealed sila sa Salt Lake Temple.
Ang igsoon ni Elder Renlund nga si Linda C. Maurer, kinsa manghod og pito ka tuig, namahayag nga samtang nagdako ang upat ka mga anak, “sila nakaamgo unsa ka talagsaon ug kamatinud-anon sa ilang mga ginikanan nga molalin sa laing lugar nga walay kahanas sa pagsulti og Inenglis ug wala kaayoy suporta aron lang makaangkon sa mga panalangin sa ebanghelyo ug kaminyoon sa templo.”
Sa dihang 11 anyos si Dale, ang iyang amahan, usa ka hanas nga karpintero ug tigtukod, gitawag sa pagserbisyo isip building missionary sa Sweden sulod sa tulo ka tuig. Ang pamilya migahin og panahon sa Helsinki, Finland, ug Gothenburg, Sweden. Mitambong sila sa usa ka gamay nga branch sa Simbahan, ug ang mga bata mitambong sa Swedish nga pampublikong eskwelahan. Ang igsoon ni Dale nga si Anita M. Renlund, kinsa manghod niya og usa ka tuig, nahinumdom sa kalisdanan sa pagbalhin ngadto sa Sweden: “Nakalitan gyud mi sa sinugdanan tungod kay, bisan tuod Swedish ang among sinultihan sa balay, wala mi masayud sa grammar o spelling sa pinulongan.”
Sa dihang bata pa adunay kasinatian si Dale nga nakapalig-on sa pagpamatuod human mobasa sa Basahon ni Mormon. Ang mission president sa Sweden midapit sa mga batan-ong lalaki sa Aaronic Priesthood sa pagbasa sa Basahon ni Mormon, mao nga ang magulang ni Dale, nga si Gary, kinsa 12 anyos niadtong higayuna, midawat sa maong hagit. Ang onse anyos nga si Dale midawat usab sa hagit. Human mobasa sa Basahon ni Mormon, siya nag-ampo ug nangutana kon tinuod ba kini. Si Elder Renlund nahinumdom, “Aduna koy klaro nga impresyon: ‘Gisultihan ko na ikaw nga kini tinuod.’ Ug kadto talagsaon kaayo nga kasinatian.”
Si Dale ug ang iyang mga igsoon—Gary, Anita, ug Linda—nahinumdom nga sa dihang ang pamilya mibalik ngadto sa Estados Unidos, mipadayon sila sa pagsulti ug pag-ampo sa Swedish nga pinulongan. Nahinumdom usab sila sa ilang mga ginikanan nga mihatag og talagsaong importansya sa kahibalo sa mga kasulatan. Miingon sila, “Ang labing maayong paagi sa pagpasabut sa among hunahuna ngadto sa among mga ginikanan mao ang paggamit sa mga kasulatan.” Mipasiaw si Anita, “Ang pagkahibalo sa mga kasulatan diha sa among pamilya usa ka kahanas sa pagkaluwas; gikinahanglan kaayo kini.”
Sa talagsaong paagi, si Gary ug Dale gitawag nga moserbisyo sa Swedish Mission sa samang panahon. Wala gayud sila magkakauban, apan ilang gigamit ang ilang mga kahanas sa pagsulti og Swedish aron sa pagserbisyo sa Ginoo isip mga misyonaryo sa sobra duha ka tuig. Si Elder Renlund naghulagway sa iyang misyon isip daghan nga mga buluhaton apan usa ka talagsaon nga kasinatian: “Miusab kini sa akong kinabuhi kabahin sa paghimo og mga pasalig ug sa paghukom nga buhaton ang akong labing maayo aron mahimong usa ka disipulo ni Kristo.”
Ang Labing Talagsaong Panalangin
Human miuli gikan sa iyang misyon niadtong 1974, si Dale mieskwela sa University of Utah. Maayo kaayo siya nga estudyante ug nakadawat og bachelor’s degree sa chemistry. Ang iyang mga igsoon ug suod nga mga higala nakahinumdom tanan sa iyang kapabilidad, konsentrasyon, kakugihan, ug kamatinud-anon sa tanang buluhaton—mga hiyas nga padayon niyang gipakita. Si Gary miingon, “Siya ang labing kugihan nga akong nakita sukad.”
Sa iyang ward si Dale nakahimamat og batan-ong babaye nga ginganlan og Ruth. Siya ang anak sa usa ka sakop sa stake presidency, si Merlin R. Lybbert, nga sa kaulahian miserbisyo diha sa Seventy. Ang nahinumduman ni Dale mao nga siya nakaangkon og kaisug nga mohangyo ni Ruth nga makig-date, apan mibalibad si Ruth. Sa dihang misulay siya pag-usab paglabay sa pipila ka bulan, misugot na si Ruth. Ang bersyon ni Ruth lahi og gamay. Nakahinumdom siya nga samtang namulong si Dale sa sakrament miting kabahin sa iyang misyon, nakadayeg siya og maayo. Mas nagkaila-ila sila, ug nalipay siya sa dihang gihagad siya ni Dale nga mag-date, apan aduna siyay idumala nga party mao nga gikinahanglan niyang mobalibad. Malipayon siyang misugot sa dihang gihagad siya pag-usab.
Wala: mga litrato pinaagi ni Kristen Murphy, Deseret News; litrato sa kasal © Newman Photography
Si Dale ug Ruth nagminyo niadtong 1977 sa Salt Lake Temple samtang nag-eskwela si Dale sa medikal nga kurso sa University of Utah ug si Ruth nagtudlo sa South High School, usab sa Salt Lake City. “Gawas sa desisyon nga mag-aktibo sa Simbahan,” si Elder Renlund namahayag uban sa hingpit nga kasiguroan, “ang pagpakigminyo kang Ruth maoy labing talagsaong butang sa akong kinabuhi.” Ang ilang anak, si Ashley, natawo usa ka semana human si Elder Renlund migradwar sa medikal nga kurso niadtong 1980.
Si Elder Renlund dayon malipayon nga nadawat sa Johns Hopkins Hospital, ang iyang unang gipili aron sa pagpadayon sa iyang medikal nga edukasyon. Ang pamilya mibalhin ngadto sa Baltimore, Maryland, diin nahimo siyang kabahin sa medical staff sa ospital.
Paglambo tungod sa mga Pagsulay
Niadtong Oktobre 1981, si Sister Renlund nahiling nga may ovarian cancer. Misagubang siya sa duha ka operasyon ug siyam ka bulan nga chemotherapy. Nanlimbasug sa pag-atiman kang Ruth ug sa ilang anak nga babaye, si Elder Renlund nahinumdom, “Sakit kaayo ang akong gibati, ug daw ang akong mga pag-ampo dili makaabot sa langit.”
Sa dihang iyang gidala pauli si Ruth gikan sa ospital, luya kini, apan gusto nila nga dungan nga mag-ampo. Iyang gipangutana si Sister Renlund kon siya ang mag-ampo. “Ang iyang unang mga pulong mao ang, ‘Among Amahan sa Langit, nagpasalamat kami Kanimo alang sa gahum sa priesthood nga naghimo niini nga bisan unsay mahitabo, mahimo kami nga magkauban sa kahangturan.’”
Niana nga higayon, mibati siya og espesyal nga kasuod ngadto sa iyang asawa ug ngadto sa Dios. “Ang unsay akong nasabtan kanhi kabahin sa mahangturong mga pamilya diha sa akong hunahuna, nasabtan nako karon diha sa akong kasingkasing,” nag-ingon si Elder Renlund. “Ang sakit ni Ruth miusab sa dagan sa among kinabuhi.”
Aron dili magsige og hunahuna sa iyang sakit, si Sister Renlund nakahukom nga moeskwela og abogasiya. “Naghunahuna lang ko, ‘Mahimo lang kini nga bati nga kasinatian gawas kon aduna mi buhaton nga maayo kabahin niini,’” si Sister Renlund nag-ingon. “Wala sa among plano nga magkakanser ko isip batan-ong babaye ug makabaton lamang og usa ka anak. Ug ang akong pagkaluwas kaduhaduhaan. Apan among gibati nga ang pag-eskwela og abogasiya maoy sakto nga buhaton.”
Mieskwela siya og abogasiya sa samang panahon nga padayon siya nga nagpatambal sa iyang sakit ug ang iyang bana nagpadayon sa iyang espesyal nga pagbansay sa pagka-doktor [residency].
Bishop sa Sentro nga Bahin sa Baltimore
Samtang patapos na ang tulo ka tuig nga termino ni Elder Renlund diha sa medical house staff ug magsugod na sa espesyal nga pagbansay sa natad sa cardiology [cardiology fellowship], gi-interbyu siya aron mahimong bishop sa Baltimore Ward. Si Brent Petty, kinsa maoy first counselor sa Baltimore Maryland Stake niadtong higayuna, nakahinumdom niadto nga interbyu. Siya ug ang stake president, si Stephen P. Shipley, mibati “sa kusog nga impluwensya sa Balaang Espiritu” samtang nag-interbyu sila kaniya.
Nahinumdom si Brother Petty nga “maayo kaayo siya nga bishop,” bisan pa sa malisud nga mga sirkumstansya sa pamilya ug panarbaho nga iyang nasinati. Sa dihang nadawat ni Elder Renlund ang tawag ngadto sa Korum sa Napulog Duha ka mga Apostoles sa miaging tuig, si Brother Petty nakabantay nga ang mga miyembro sa Baltimore Ward ingon man ang medikal nga mga kaubanan ni Elder Renlund, nga kasagaran dili mga Santos sa Ulahing mga Adlaw, nahimuot. Ilang gipadayag ang ilang gugma alang kaniya ug ang ilang pagdayeg alang sa iyang pagserbisyo og talagsaong moral nga kinaiya.
Dungganon nga Panarbaho
Niadtong 1986, human migradwar si Sister Renlund gikan sa University of Maryland School of Law ug nakompleto ni Elder Renlund ang tulo ka tuig nga residency program sa internal medicine ug tulo ka tuig nga cardiology fellowship, namalik sila ngadto sa Utah. Si Sister Renlund misugod og trabaho sa pagka-abogado diha sa Utah attorney general’s office, ug si Elder Renlund nahimong professor sa medicine sa University of Utah. Sulod sa 18 ka tuig siya ang medical director sa Utah Transplantation Affiliated Hospitals Cardiac Transplant Program.
Niadtong 2000 nahimo usab siyang director sa Heart Failure Prevention and Treatment Program sa Intermountain Health Center sa Siyudad sa Salt Lake. Ang programa naglakip og mga implantable cardiac pump [himan nga motabang sa pagbomba og dugo sa sulod sa lawas] ug artipisyal nga kasingkasing. Si Donald B. Doty, M.D., inila nga heart surgeon, usa ka kauban ug higala ni Dr. Renlund sa LDS Hospital. Si Dr. Doty nag-ingon, “Ang iyang talagsaong pagbansay, halawom nga konsentrasyon, inantigo nga pagdumala, ug kapuangod talagsaon.”
Si Dr. A. G. Kfoury, usa ka aktibong Katoliko kinsa suod nga nakigtrabaho ni Dr. Renlund sulod sa daghang katuigan, namahayag nga si Dr. Renlund maoy nag-una nga transplant cardiologist sa rehiyon, “dili hitupngan sa iyang kinaiya, integridad, kamapahiubsanon, ug kapuangod.” Nag-ingon siya nga si Dr. Renlund “mitabang sa uban nga mahimong mas maayo nga mga tawo. Hilum niya kini nga gibuhat. Naminaw siya og maayo ug nagpakabana, ug interesado kaayo siya sa kalampusan niadtong iyang gikatrabaho.” Si Dr. Renlund hilum nga nangulo pinaagi sa ehemplo ug kanunay nga nagpakabana sa mga pamilya sa iyang mga katrabaho.
Labing nabantayan ni Dr. Kfoury ang kapuangod ni Dr. Renlund ngadto sa mga pasyente. Sama pananglit, kon ang usa ka pasyente walay masakyan, si Dr. Renlund mo-drive og layo-layo nga distansya ngadto sa balay sa pasyente, alsahon siya padulong sa sakyanan, ug dad-on ang pasyente ngadto sa ospital. Si Dr. Kfoury miingon nga kini talagsaon.
Pagserbisyo diha sa Seventy
Human miserbisyo isip stake president sulod sa lima ka tuig sa Salt Lake University First Stake, si Elder Renlund gitawag niadtong 2000 sa pagserbisyo isip Area Seventy diha sa Utah Area. Dayon niadtong Abril 2009 gitawag siya nga mahimong usa ka General Authority Seventy. Ang iyang unang assignment mao ang pagserbisyo diha sa Africa Southeast Area Presidency, usa ka area nga adunay mga unit sa Simbahan sa 25 ka lain-laing mga nasud.
Si Sister Renlund nanugid sa ilang reaksyon sa calling: “Usa kadto ka surprisa, siyempre. Ug ang mga tawo miingon, ‘Gibiyaan ninyo ang inyong mga panarbaho nga misulbong na sa pinakanindot nga punto.’ Ug tinuod tingali kana. Apan kon ang Ginoo nagkinahanglan sa pagsulbong sa among panarbaho ug mao kini ang panahon nga kami makaserbisyo, nan kini ang saktong panahon sa pagserbisyo.”
Namulong kabahin sa iyang asawa nga maoy iyang bayani, si Elder Renlund nag-ingon, “Siya ang mihimo og mas dakong sakripisyo.” Gibiyaan ni Sister Renlund ang iyang trabaho isip presidente sa iyang law firm ug gibiyaan ang mga posisyon sa pipila ka inila nga mga board [board of directors nga nagdumala sa lain-laing mga grupo, organisasyon, ug mga kompaniya] aron moserbisyo uban kaniya. “Gipadala mi ngadto sa Africa ug gitudloan sa mga Santos kabahin sa mga butang nga maoy tinud-anay nga mahinungdanon,” nag-ingon si Elder Renlund.
Usa ka Dominggo sa central Congo iyang gipangutana ang mga miyembro kon unsa nga mga hagit ang ilang giatubang, apan wala silay mahunahunaan nga mga hagit. Nangutana siya pag-usab. Sa katapusan, usa ka edaran nga lalaki sa luyo sa kwarto mibarug ug miingon, “Elder Renlund, unsaon namo pagkabaton og mga hagit? Naa namo ang ebanghelyo ni Jesukristo.” Namalandong niana nga kasinatian, si Elder Renlund nagpasabut: “Gusto nako nga mahimong sama nini nga Congolese nga mga Santos, kinsa nag-ampo alang sa pagkaon kada adlaw, mapasalamaton kada adlaw alang sa pagkaon, ug mapasalamaton alang sa ilang mga pamilya. Wala silay bisan unsa, apan aduna sila sa tanan.”
Nagserbisyo sa Area Presidency sulod sa lima ka tuig, si Elder Renlund mibiyahe og liboan ka mga milya sa tibuok halapad nga Africa Southeast Area, nagbisita sa mga miyembro ug mga misyonaryo. Nagtuon siya og French tungod kay mao kini ang sinultihan sa pipila niadto nga mga nasud.
Si Elder Jeffrey R. Holland, kinsa mao ang sakop sa Napulog Duha nga gi-assign nga makigtrabaho sa Africa Southeast Area Presidency niana nga panahon, namulong kabahin ni Elder Renlund: “Walay tawo nga mipahinungod sa iyang kaugalingon diha sa dapit ug sa katawhan niini ug sa ilang panginahanglan nga labaw pa kay sa kang Elder Renlund. Padayon siyang naningkamot nga makaila sa mga tawo, mahigugma sa ilang mga kultura, ug motabang sa mga Santos nga molambo padulong sa katubsanan.”
Gitawag nga Mahimong Linain nga Saksi
Niadtong Septyember 29, 2015, nakadawat siya og wala paabuta nga tawag gikan sa Office of the First Presidency. Sa Church Administration Building, “mainiton akong giabi-abi ni Presidente Thomas S. Monson ug sa iyang duha ka mga magtatambag. Human nga nakalingkod na mi, si Presidente Monson mitan-aw kanako, ug siya miingon, ‘Brother Renlund, among ihatag kanimo ang tawag nga moserbisyo isip usa ka sakop sa Korum sa Napulog Duha ka mga Apostoles.’”
Nakalitan si Elder Renlund. Mapaubsanon niyang gidawat ang calling ug naghinumdom, “Nagtuo ko nga nakabantay si Presidente Monson nga daw naluya ko, ug mao nga mitan-aw siya kanako, ug siya miingon, ‘Ang Dios ang mitawag kanimo; ang Ginoo mipahibalo niini kanako.’”
Si Elder Renlund mibalik ngadto sa iyang opisina, nanirado sa pultahan, ug miluhod aron mag-ampo. Human niya makontrolar ang iyang emosyon, iyang gitawagan ang iyang asawa. “Ang iyang reaksyon mao ang kahikurat,” nag-ingon siya, “apan hingpit ang pasalig ngadto sa Ginoo, sa Iyang Simbahan, ug diha kanako.”
Ang ilang anak, si Ashley, miangkon, “Ang akong papa miusbaw tungod sa panalangin sa langit ug giandam alang niini nga tawag pinaagi sa tibuok kinabuhi nga pagserbisyo. Dako ang iyang kasingkasing; puno kini sa gugma.”
Sa samang paagi, ang igsoon ni Elder Renlund, si Gary, nag-ingon nga si Elder Renlund “dugay na kaayo nga giandam, pinaagi sa mga hagit ug pinaagi sa pagserbisyo alang niana nga tawag nga miabut kaniya. Kabahin kini sa mas dako nga plano nga gihan-ay, ug sayon alang kanako ang pagpaluyo kaniya.”
Wala: litrato sa opisina pinaagi ni Tom Smart, Deseret News; litrato sa babaye pinaagi ni Joy Basso
Samtang naghunahuna sa kaimportansya sa maong calling, si Elder Renlund nag-ingon, “Wala nako gibati nga ako kwalipikado, gawas lang nga ako nasayud nga si Jesukristo mao ang Manluluwas sa kalibutan. Makasaksi ako sa Iyang pagkatinuod nga buhi, nga Siya mao ang akong Manluluwas ug inyong Manluluwas. Ako nasayud nga kana tinuod.”