Unsaon Nako sa Pagkahibalo
Pagkat-on nga Mahimong Kahayag sa Kalibutan
Ang tagsulat nagpuyo sa Dominican Republic.
Natawo ko sa Dominican Republic ug nagdako isip miyembro sa Simbahan. Nagdako ko nga gilibutan og bantugang mga lider kinsa naningkamot sa pagtabang nako sa pagsunod sa matarung nga dalan. Naglaum ko nga makamisyon ug makatabang sa mga tawo.
Tungod kay ang akong amahan mibalhin ngadto sa Estados Unidos aron sa pagpangita og mas maayong kinabuhi alang namo, ang akong inahan mipadako sa akong igsoong mga babaye ug nako nga nag-inusara. Usahay mobati ko nga nag-inusara, apan wala gayud na mahitabo tungod kay makaistorya ko sa bisan unsa nga mga kalisud sa akong kinabuhi ngadto sa akong mga lider sa Simbahan.
Sa dihang mibalhin mi sa Estados Unidos, daghang mga pagsulay ang nagsugod alang nako. Mitambong mi sa gamay nga branch ug duna koy mga lider nga gustong motabang nako, apan ang akong mga higala sa eskwelahan naningkamot sa pagbira nako gikan sa dalan sa ebanghelyo. Sa wala damha, nagsugod ko sa pagsulti sa akong mama sa dili mabination nga paagi ug panagsa na lang maminaw sa iyang tambag.
Mosimba ko kada Dominggo, apan wala gyud koy tinguha sa pag-adto, wala ko kahibalo kon gusto pa ba ko nga magmisyon.
Usa ka buntag akong giablihan ang Basahon ni Mormon, ug naabli kini eksakto sa pahina nga akong paborito nga kasulatan, 3 Nephi 12:14–16:
“Sa pagkatinuod, sa pagkatinuod, Ako moingon nganha kaninyo, Ako mohatag nganha kaninyo aron mahimo nga kahayag niini nga mga katawhan. Usa ka dakbayan nga gitungtong sa usa ka bungtod dili matago.
“Tan-awa, magdagkot ba ang mga tawo og usa ka kandila ug ibutang kini sa ilawom sa tadyaw? Dili, apan sa kandilero, ug kini mohatag og kahayag ngadto sa tanan nga anaa sulod sa balay;
“Busa, himoa nga ang inyong kahayag mohayag sa atubangan niini nga mga katawhan, aron sila makakita sa inyong maayo nga mga buhat ug himayaon ang inyong Amahan kinsa anaa sa langit.”
Nakahatag kini nako og dakong kalipay sa pagbasa niini tungod kay nakatabang kini nako sa paghinumdom unsay akong nakat-unan sa seminary ug unsa ka kahibulongan ang plano sa atong Langitnong Amahan. Mao nga nakahukom ko nga mahimong kahayag sa kalibutan.
Giimbitar nako ang duha ka ig-agaw ngadto sa simbahan. Ang usa dili kaayo aktibo, ug naaktibo siya. Ang usa dili miyembro, ug ako ang nagbunyag niya.
Paglabay sa usa ka tuig nadawat nako ang akong tawag sa misyon nga moserbisyo sa California, USA. Samtang nagserbisyo ko, akong nakita sa walay duha-duha nga kini mao ang tinuod nga ebanghelyo ni Jesukristo. Samtang nagtabang ko sa mga tawo, ang akong pagpamatuod mitubo pa ug mitubo, ug matag higayon nga mobasa ko sa mga kasulatan, kanunay nakong i-recite ang tudling sa 3 Nephi nga mahimong kahayag sa kalibutan.