Pagsagubang sa Sayo nga Pagpauli
Ang tagsulat nagpuyo sa Utah, USA.
Ang pagpauli og sayo gikan sa usa ka misyon, gani tungod sa problema sa kahimsog, mahimong makapahugno nga kasinatian. Lisud kadto para nako. Apan makahimo ka niining usa ka pag-uswag, dili usa ka pag-atras.
Paghulagway sa litrato pinaagi ni Colin Ligertwood
Si Papa adunay biyahe mahitungod sa negosyo, mao nga ang mitagbo nako sa dihang minaog ko sa eroplano nga nagtakiang gikan sa akong misyon mao lang ang akong inahan. Iyaha akong gigunitan ug nanghilak mi.
Miagi ko og daghang medikal nga mga pagsusi kutob sa mahimo, apan ang mga doktor walay makitang problema. Ang pagtangtang sa akong missionary tag nga nasayo og siyam ka bulan maoy kinalisuran nga akong nahimo. Gibati nako nga usa ka pakyas tungod kay wala nako mahuman ang akong misyon.
Kinahanglan gayud nga Mahimong usa ka Misyonaryo
Ang pagkahimong usa ka misyonaryo ang kanunayng anaa gayud sa akong mga plano. Sa dihang ang akong magulang nga lalaki nagmisyon, nagsul-ob ko og akong hinimo nga name tag sa among paghatud niya. Sa dihang gipahibalo nga ang edad sa misyon nausab niadtong 2012, mao pa gyud ang pag-edad nako og 19 ug nasayud nga ang pahibalo maoy tubag sa akong mga pag-ampo. Nakasayaw ko sa kwarto, misulat sa akong mga papeles nianang adlawa, nagpamedikal, ug misumiter sa akong mga papeles sulod sa semana. Nadawat nako ang akong call ngadto sa California Anaheim Mission pag-abut og duha ka semana ug mireport dayon ngadto sa missionary training center duha ka bulan human niana.
Pag-abut nako sa mission field nga usa ka “greenie” puno ako sa kadasig ug dili gusto mohinayhinay. Ang akong trainer ug ako sa tinuoray magdagan aron sa pagtudlo og mga leksyon tungod kay madasigon kaayo mi sa pagtudlo. Alang nako, ang pagka full-time nga misyonaryo mao ang labing natural nga butang sa kalibutan. Dunay mga higayon nga salikwaot ug nanglimbasug ko, apan wala nay molabaw pa kanindot kay sa pagkahimong usa ka misyonaryo.
Mga walo ka bulan sa akong misyon, ang akong mga kauban ug ako nahatagan og mga bisikleta tungod sa kakulang sa sakyanan. Dugay na kong wala makasakay og bisikleta ug dili ko hingpit nga sigurado kon makahimo ba ko nga magsayal, pero lingaw ra gihapon. Human sa pipila ka semana, bisan, nagsakit ang akong kilid nga mawala wala. Gibaliwala kini nako ug nagpadayon sa pagtrabaho.
Ang sakit nagsagunson, ug mas nagkagrabe hangtud nga usa ka gabii ang akong kauban kinahanglan modala nako sa emergency room. Daghang medikal nga pagsusi ang gihimo ngari nako apan ang mga doktor wala makakita sa diin gikan ang akong sakit.
Sa mosunod nga mga semana, nag-ampo ko sa Langitnong Amahan nga wagtangon ang sakit ug nakadawat og pipila ka mga panalangin sa priesthood, apan misamot lang kini. Tanang posible nga posisyon mosakit, ang kasakit nagpermi. Apan mihukom ko nga mag-anad niini ug magpadayon.
Usa ka adlaw nakuyapan ko diha sa daplin sa karsada, dili na makalihok. Gidala ko sa hospital aron mahiling apan wala gihapoy resulta. Misulay ko nga maghinayhinay lang ug molingkod sa mga lingkuranan sa bus-stop uban sa akong mga kauban ug magtudlo sa mga tawo samtang naghulat sa ilang mga bus. Naglingkod ko samtang nagleksyon, nga nagpamahit sa akong mga ngabil tungod sa kasakit. Gipugos nako og maayo ang akong kaugalingon ug misangput sa pagka-ospital na usab. Naka-amgo ko nga basin permanenteng madaut ang akong kaugalingon kon magpabilin ko sa akong mission. Human sa daghang pag-ampo, nakadawat ko og tubag nga kinahanglan ko nga mopauli aron maatiman ang mga isyu sa akong panglawas.
Usa ka Lakang ngadto sa Pag-uswag
Sa dihang nakaamgo ko nga naa gyud ko sa balay, nahugno kaayo ko. Apan naningkamot ko sa labing maayo nga magpabilin sa akong hugot nga pagtuo ug sa pagtuon sa kasulatan. Maayong midala ang akong pamilya niini, apan ang ubang tawo sa akong palibut dili pa sigurado kon unsaon sa pag-react sa akong kahimtang. Kanunay silang nangutana nako, ug maglisod ko og pugong sa kaguol. Usa ka tawo, hinoon, mitawag nako sa wala damha ug miingon nako nga ang iyang anak nga lalaki nauli og sayo gikan sa misyon sa dugay nang panahon. Misulti siya nako nga kini nga pagsulay dunay potensyal sa pagguba sa akong pagtuo ug kalipay ug sa kanunay mahitabo kini diha sa daghang mga misyonaryo nga nauli og sayo. “Unsay imong hinumduman,” siya miingon, “mao nga hangtud maningkamot ka og maayo nga magpakabuhi nga matarung, kanunay kining usa ka lakang sa pag-uswag bisan unsa pa ang nahitabo dili nimo kapugngan.”
Kana nahimo nakong tumong, ug nagsalig ako niini og maayo sulod sa misunod nga tuig. Sulod sa walo ka bulan naglisud ko sa paglakaw, apan ang mga tawo mohukom lang gihapon nako kon mahibaloan nila nga nauli ko og sayo. Moingon sila nga dunay mga tawo nga mas grabe pa og medikal nga kahimtang kinsa mihuman sa pagserbsyo. Wala nila masabti nganong wala ko makahuman, bisan sa medikal nga kalisdanan. Sakit kaayo ang makadungog niini nga unta hilabihan man ang akong pagmahal sa akong misyon, apan aduna koy pagtuo nga ang Langitnong Amahan adunay katuyoan alang sa akong pagsulay ug nga kini mahimong usa ka lakang sa pag-uswag.
Mi-eskwela ko pag-usab ug misugod sa pakig-date. Nakita nako nga mi-uswag ako, apan nabati nako kanunay nga maglantaw sa akong mission uban sa gamayng kapait. Dayon ang usa nako ka higala mipahinumdom nako nga ang Pag-ula sa Manluluwas makaayo sa tanang kasakit ug kapait. Uban sa Iyang tabang mahimo kong malipay sa higayon nga maghunahuna mahitungod sa akong misyon.
Miluhod ko ug nag-ampo ngadto sa akong Langitnong Amahan. Akong gisulti Kaniya ang mahitungod sa akong kasakit ug ang akong mga paningkamot aron mamaayo ug mahupay. Mihangyo ko kon mahimo ba Niyang tangtangonn ang kapait nga akong gibati. Human sa akong pag-ampo, ang Ginoo mibukas sa akong mga mata aron makita ang akong misyon gikan sa Iyang panlantaw. Ang akong pagserbisyo ug ang sayo nga pag-uli kabahin sa plano sa Ginoo aron ako mahimo kon unsay Iyang gusto nga ako mamahimo. Nakakita ko sa mga milagro nga Iyang gihatag sukad nga nauli ko. Nahimo kining malisud nga dalan, apan karon makahinumdom nako sa nangagi sa akong pag-uli og sayo uban sa kalinaw, sa pagkasayud nga gusto sa Dios ang unsay labing maayo para nako.