Kabatan-onan
Magmatinud-anon sa Ilang Tinuohan
Si President Monson naghisgot og istorya mahitungod sa usa ka pamilya nga pioneer ug dayon mikutlo ni Presidente George Albert Smith: “Magmatinud-anon ba kamo sa Tinuohan sa Atong mga Katigulangan? … Paningkamot nga mahimong takus sa tanang mga sakripisyo nga [ilang] nahimo alang kaninyo.” Bisan og kamo dunay pioneer nga katigulangan o unang henerasyon nga miyembro sa Simbahan, nangita ba kamo og mga ehemplo sa hugot nga pagtuo alang sa giya ug kalig-on? Aniay maayong paagi nga kamo makasugod:
1. Paghimo og lista sa mga tawo nga imong gidayeg. Mahimong mga miyembro sila sa imong kaugalingong pamilya (kaniadto o karon), mga higala, mga lider sa Simbahan, o mga tawo nga anaa sa mga kasulatan.
2. Isulat ang mga hiyas nga anaa nila nga imong nagustohan. Ang imo bang mama mapailubon? Tingali ang imong higala mabination ngadto sa uban. Tingali ganahan ka sa kaisug ni Kapitan Moroni.
3. Pagpili og usa ka hiyas gikan sa imong lista ug pangutan-a ang imong kaugalingon, “Unsaon nako nga makaangkon niini nga hiyas? Unsay akong kinahanglan nga buhaton aron molambo kini sa akong kinabuhi?”
4. Isulat ang imong mga plano sa pagpalambo niini nga hiyas ug ibutang kini diin imong makita kini kanunay, sa pagpahinumdom nimo sa imong tumong. Pag-ampo alang sa tabang sa Langitnong Amahan ug susiha kanunay ang imong pag-uswag. Kon gibati na nimo nga igo na ang imong pagpalambo niini nga hiyas, pagpili og bag-ong hiyas nga imong trabahoon.
Hinumdumi nga samtang atong palamboon ang nindot nga mga hiyas sa atong mga kaugalingon, wala lamang nato pasidunggi ang atong mga katigulangan ug sa mga sakripisyo nga ilang nahimo, apan mahimo usab kita nga impluwensya alang sa kaayo niadtong anaa sa atong palibut.