Laka Atu Ki Muʻa
Kuó ke fakakaukau nai ki he feituʻu ʻokú ke taumuʻa ki aí mo e feituʻu ʻokú ke fie iku ki aí? Ko e kaveinga ʻo e Mutualé ki he 2016 ko e 2 Nīfai 31:20, pea ʻoku ʻoatu ʻe he veesi ʻe taha ko ʻení ha ngaahi tefitoʻi akonaki ʻe fitu fekauʻaki mo hoʻo taumuʻa ʻi he moʻuí. Te ke ʻilo ai ʻa e taumuʻa, ngāue, tōʻonga fakakaukau, ako, mo e totongi kuo talaʻofa mai ki hoʻo ngāué. Tau vakai angé ki ha ngaahi foʻi lea ʻi he veesi ko ʻení.
ʻOku ʻuhinga ʻa e vivili atu ki muʻá ki hano fie maʻu koe ke ke fai ha foʻi ngāue lahi ʻo fakafepakiʻi ha ivi tākiekina fehangahangai. Kuo pau ke tau ngāue tōtōivi ke moʻui ʻaki ʻa e ongoongoleleí he ʻoku ʻātakaiʻi kitautolu ʻe ha māmani ʻo e fakafepaki ki he ngaahi fekau ʻa e ʻOtuá.
ʻOkú ke tuʻu maʻu ʻia Kalaisi? ʻOkú ke taʻe-ueʻia ʻi hoʻo tauhi mateaki kiate Iá?
Kapau te ke “nofo ʻiate Ia” (vakai ki he Sione 15:4) mo muimui ki Heʻene ngaahi akonakí, ʻokú ke tui mālohi moʻoni leva pea te ke maʻu ʻa e ngaahi tāpuakí.
ʻOku tupulaki hoʻo ʻamanaki leleí mo e ʻofa ki he ʻOtuá mo e tangatá ʻi hoʻo mahino mo ongoʻi fakatāutaha ʻa e ʻofa ʻa e ʻOtuá. ʻOku tupulaki ʻa e mahino ko ʻení ʻi hoʻo keinanga ʻi he ngaahi folofola ʻa Kalaisí, ʻa ia, ʻoku ʻuhinga ia ki hoʻo fakaʻaongaʻi houngaʻia mo taumuʻa ʻaki ʻa e ngaahi folofola ʻa Kalaisí ʻi hoʻo moʻui fakatāutahá.
Pea ko hono fakamulitukú, kuo pau ke ke kātekina! ʻOku ongo fakataʻelata mo fakamamahi nai ia? Ko hono moʻoní, ʻoku lava ke ʻuhinga ʻa e kātekiná ki he hokohoko atu ʻa e ngāue lelei ʻokú ke fakahokó—ke ke tuʻu maʻu ʻi hoʻo feinga ke vivili atu ki muʻá. ʻOkú ke kātekina ʻi he taimi ʻokú ke nofo maʻu ai ʻi he vaaʻihala ʻo e ongoongoleleí.
ʻOku ʻaonga nai ia? ʻIO! ʻOku finangalo ʻetau Tamai Hēvani ʻofá ke tau foki ange kiate Ia, ʻo maʻu ʻa e moʻui taʻengatá mo Ia koeʻuhí ʻokú Ne ʻafioʻi ko e feituʻu ia te tau maʻu ai ʻa e fiefia moʻoni mo tuʻuloá mo e nēkeneka ʻo ope atu ʻi he tatae ʻo ʻetau fakakaukaú. Ko e ʻuhinga ia ʻokú Ne fakahā mahino mo fakapatonu mai ai ʻi he 2 Nīfai 31:20, ʻa e meʻa ke fai ke foki hake kiate Iá. Te tau lava ʻo fai ʻeni ʻi Heʻene tokoní. Te Ne teuteu maʻu pē maʻatautolu ʻa e hala ke tau fai ai ʻEne ngaahi fekaú.