Maʻá e Fānau Īkí
Ko Ha Fononga ʻi he Feituʻu Maomaonganoá
Naʻe nofo ʻa Nīfai mo hono fāmilí ʻi Selusalema. Naʻe hoko ʻa ʻene tamai ko Līhaí, ko ha palōfita. Ko ʻene faʻeé ko Selaia. Ko hono ngaahi tokouá ko Leimana, Lēmiuela, mo Samu.
Naʻe lotu e tamai ʻa Nīfaí. Naʻe folofola ange ʻa e Tamai Hēvaní kiate ia ʻoku fie maʻu ke ne mavahe mo hono fāmilí mei he koló kae lava ke nau hao. Naʻe faingataʻa ke nau mavahe mei honau ʻapí. Ka naʻe talangofua e fāmili ʻo Nīfaí.
Naʻe ō e fāmili ʻo Nīfaí ki he feituʻu maomaonganoá. Pea naʻe folofola leva ʻa e Tamai Hēvaní kia Nīfai mo hono ngaahi tokouá ke nau foki ki he koló ke ʻomi ʻa e ngaahi folofolá. Naʻe faingataʻa ke fakahoko. Ka naʻe hoko ʻa Nīfai ko ha faʻifaʻitakiʻanga lelei ʻi he taimi naʻe ʻikai ke fie talangofua ai hono ngaahi tokouá. Naʻá ne pehē te ne fai e meʻa naʻe kole mai ʻe he Tamai Hēvaní.
Naʻe foaki ange ʻe he Tamai Hēvaní ha kāpasa makehe ki he fāmili ʻo Nīfaí. Naʻe ui ia ko e Liahoná. ʻI he taimi naʻe talangofua ai e fāmili ʻo Nīfaí ki he Tamai Hēvaní, naʻe fakahā ange ai kiate kinautolu e hala ke nau fononga ai ʻi he feituʻu maomaonganoá. Naʻe aʻu foki ki hono fakahā ange kia Nīfai ʻa e feituʻu ke maʻu mei ai ha meʻakai maʻa hono fāmilí.
Te tau lava ʻo hangē ko Nīfaí ʻi he taimi ʻoku tau talangofua ai ki he ngaahi fekaú mo muimui ki he Tamai Hēvaní!