Ngaahi Fakakaukau Maʻá e Efiafi Fakafāmili ʻi ʻApí

ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.

Family sitting on floor studying, playing games together and looking at family history

“Haʻu ʻo Muimui ʻIate Au: Ko hono Akoʻi ʻo e Ngaahi Tefitoʻi Meʻa Īkí ʻi ʻApí,” peesi 28: ʻOku ʻi he fakamatala ko ʻení ha ngaahi fakakaukau ki hono akoʻi mo ako ʻo ha ngaahi tefito ʻe ono. Te ke ala fakaʻaongaʻi ʻi ha efiafi fakafāmili ʻi ʻapi e fakakaukau ʻo e tefito ʻa e toʻu tupú ki Sānualí, ko e Toluʻi ʻOtuá. Te ke lava foki ʻo toe vakaiʻi mo ho fāmilí ʻa e ngaahi founga ako ʻoku fakamatalaʻi ʻi he fakamatalá pea aleaʻi pe ko e fē e ngaahi meʻa kuo tautautefito ʻene tokoniʻi ho fāmilí. Te ke ala fakaafeʻi ʻa e kau mēmipa ho fāmilí ke nau fakaʻaongaʻi ʻa e ngaahi founga ko ení ke teuteu ʻaki e ngaahi lēsoni ki he efiafi fakafāmili ʻi ʻapi ʻi he kahaʻú ʻo fakatefito ʻi he ngaahi tefito ʻo e ongoongoleleí ʻi he fakamatala ko ʻení.

“Ko ha Fononga ʻi he Feituʻu Maomaonganoá,” peesi 76: Fakakaukau ke fokotuʻutuʻu ha kiʻi malaʻe tūkiaʻanga (small obstacle course) ʻi ho ʻapí, pe ko hano toe fulihi pē ʻo e ʻū naunau falé pea noʻotaki ha afo ʻo falō ʻi he ʻū vahaʻa lokí. Haʻi e fofonga ʻo e mēmipa takitaha ʻo e fāmilí tukukehe pē ha taha te ne fakahinohino ki he toenga ʻo e fāmilí e founga ke nau hao mai aí. Hili iá te mou ala aleaʻi e founga naʻe tataki mai ai ʻe he Tamai Hēvaní ʻa Nīfai mo hono fāmilí ki he fonua ʻo e talaʻofá. Te mou lava leva ʻo aleaʻi e ngaahi founga kuo ʻoatu ʻe he Tamai Hēvaní maʻau mo ho fāmilí ke tokoniʻi ai kimoutolu ke mou foki hao ange ki ʻapi kiate Ia.