ʻOtu Lea ki he ʻOtu Lea
2 Nīfai 31:20
ʻOku tokoni ʻa e kaveinga ʻo e Mutualé ʻi he taʻu ní ke tau vakai ai ki he founga te tau lava ai ʻo vivili atu ki muʻa lolotonga ʻetau tuʻu maʻú.
20 Ko ia, kuo pau ke mou vivili atu ki muʻa ʻi he tui mālohi kia Kalaisi, pea maʻu ʻa e ʻamanaki ʻoku mālohi haohaoa, mo ha ʻofa ki he ʻOtuá mo e kakai fulipē. Ko ia, kapau te mou vilitaki atu, pea keinanga ʻi he folofola ʻa Kalaisí, pea kātaki ki he ngataʻangá, vakai, ʻoku folofola ʻe he Tamaí: Te mou maʻu ʻa e moʻui taʻengatá.
Kātaki ke aʻu ki he ngataʻangá
“Ko e sivi ʻoku tuku mai kiate kitautolu ʻe he ʻOtua ʻofá, ʻoku ʻikai fakataumuʻa ia ke vakaiʻi pe te tau lava ʻo matuʻuaki e faingataʻá. ʻOku fakataumuʻa ia ke vakaiʻi pe te tau lava ʻo kātekina lelei ia. ʻOku tau lava ʻi he siví ʻi heʻetau fakahaaʻi naʻa tau manatuʻi Ia mo e ngaahi fekau naʻá ne foaki maí.”
Palesiteni Henry B. Eyring, Tokoni ʻUluaki ʻi he Kau Palesitenisī ʻUluakí, “In the Strength of the Lord”, Liahona, May 2004, 17.
Te mou maʻu ʻa e moʻui taʻengatá
Kuo talaʻofa mai ʻe he Tamaí kiate kitautolu ʻa e moʻui taʻengatá fakafou ʻi he Fakalelei ʻa Sīsū Kalaisí— ke hoko ʻo hangē ko Iá — kapau te tau fai ʻa e ngaahi meʻa pau. Ko ʻeni ha ngaahi potufolofola ʻoku lau ki ha niʻihi ʻo e ngaahi meʻa ko iá:
Keinanga ʻi he ngaahi folofola ʻa Kalaisí
“ʻOku ʻikai ʻuhinga ʻa e keinangá ki he ʻahiʻahiʻi pē. ʻOku ʻuhinga ʻa e keinangá ke ifoʻia. ʻOku tau ifoʻia ʻi he folofolá ʻi haʻatau ako ia ʻi ha laumālie ʻo e ʻilo ha meʻa pea talangofua faivelenga moʻoni. ʻI heʻetau keinanga he folofola ʻa Kalaisí, ʻoku … hoko leva ia ko e konga pē hotau ʻulungāngá.”
Palesiteni Russell M. Nelson, Palesiteni ʻo e Kōlomu ʻo e Kau ʻAposetolo ʻe Toko Hongofulu Mā Uá, “Living by Scriptural Guidance,” Ensign, Nov. 2000, 17.
Ko ha ʻofa ki he ʻOtuá mo e kakai fulipē
ʻOku kātoi ʻe he “ʻofa ki he ʻOtuá mo e kakai fulipē” ʻa e ongo fekau lalahi ʻe uá (vakai ki he Mātiu 22:37–40). Ko hano toe fakalea ʻe taha ʻo e faʻahinga ʻofa ko ʻení ko e manavaʻofa, pe ko e ʻofa haohaoa ʻa Kalaisí (vakai ki he Molonai 7:47).
Ko e ʻamanaki haohaoa tahá
“Neongo e mavahe e ʻamanaki vaivaí meiate kitautolu tuʻunga he angi hotau lotó mo e ngaahi meʻa ʻoku hokó, ʻoku fokotuʻu mai ʻe he ‘ʻamanaki mālohí’ ia e kakai māmá. ʻOku lava ke mamata ki heʻenau māmá, pea ʻoku ʻiloʻi e ngaahi meʻá ʻe he maama ko iá! … Taimi ʻe niʻihi ʻi he poʻuli lōloó ʻoku ʻikai ha maama [ia] ʻi tuʻa—ka ko ha maama ʻi loto pē ke tataki mo fakapapauʻi.”
Elder Neal A. Maxwell (1926–2004) of the Quorum of the Twelve Apostles, “Brightness of Hope,” Ensign, Nov. 1994, 35.
Vilitaki atu ki muʻa
Ko e hā ʻoku fie maʻu ke ke fai lolotonga hoʻo vilitaki atu ki muʻa ʻi he hala ki he moʻui taʻengatá? Lau ʻa e meʻa ne fai ʻe he kakaí ʻi he misi ʻa Līhai ʻo kau ki he fuʻu ʻakau ʻo e moʻuí (vakai ki he 1 Nīfai 8:30). Te ke lava nai ʻo fakakaukau ki ha ngaahi sīpinga kehe mei he folofolá?
Tui Mālohi kia Kalaisí
ʻOku ʻuhinga ʻa e tui mālohí ki he tuʻu maʻu, taʻemauea. ʻOku ʻuhinga ʻa e tui mālohi kia Kalaisí ki he tui taʻefakaʻalongaua kiate Ia mo talangofua ki Heʻene ngaahi fekaú, ʻo kau ai hono maʻu ʻo e ngaahi ouaú pea fakahoko mo tauhi ʻa e ngaahi fuakavá.