Ko e Lelei Ange ʻa e Laukongá ʻi he ʻAho Kotoa Pē
ʻOku nofo ʻa e ongo faʻu tohí ʻi ʻIutā, USA, mo Polīvia.
Naʻe huke hake ʻe Siosefa ʻa e lauʻi peesi ʻi heʻene tohí. Naʻá ne mata mamahi. Naʻe toe ʻene peesi ʻe ua ke lau.
“ʻOkú ke SAI PĒ?” Ko e fineʻeikí ange ia.
Naʻe pehē ange ʻe Siosefa, “ʻOku ou manako ke laukonga.” “Ka ʻoku ou tuai ʻaupito. ʻE founga fēfē haʻaku ako ke toe lelei ange ʻeku laukongá?”
Naʻe pehē ange ʻe he Fineʻeikí, “ʻOku ʻi ai ʻeku fakakaukau.” “Lau ha vahe ʻe taha ʻo e Tohi ʻa Molomoná ʻi he ʻaho kotoa pē. Te ne tokoniʻi koe ke lelei ange hoʻo laukongá.”
Naʻe feinga ʻa Siosefa. Naʻe fuoloa ʻi he fuofua taimí. Naʻe pau ke ne puʻaki fuoloa ʻa e ngaahi lea lōloá. Ka naʻá ne tauhi ʻene laukongá he ʻaho kotoa pē. Taimi siʻi pē kuó ne lava ʻo lau ha ngaahi vahe ʻo laka hake ʻi he tahá.
Hili ha uike ʻe ua. Ne hiki e fakaʻilonga-tohi ʻa Siosefá mei he 1 Nīfaí ki he 2 Nīfaí. Hili iá naʻá ne ʻi he tohi ʻa Sēkopé!
ʻI ha pō ʻe taha ne hokosia ai e taimi ke fai ʻe Siosefa ʻa e lēsoni ʻi he efiafi fakafāmili ʻi ʻapí.
Naʻe fakakaukau ʻa Siosefa. “ʻOku ou ʻilo ʻa e meʻa ke faí!” Naʻá ne maʻu ha tohi ʻo e Ngaahi Talanoa ʻo e Tohi ʻa Molomoná. Naʻe ʻi ai e ngaahi foʻi lea mo e ngaahi fakatātā. Naʻá ne huke hake ʻa e ngaahi pēsí kae ʻoua kuó ne maʻu ʻa e talanoa naʻá ne fie maʻú.
Naʻe lau ʻe Siosefa ʻa e talanoá ki hono fāmilí. Naʻá ne lau ʻa e ngaahi foʻi lea nounoú, hangē ko e vaka. Naʻá ne lau ʻa e ngaahi foʻi lea lōloá, hangē ko e fekauʻi. Naʻe hiki ʻa e ngaahi leá ni ʻe he kau palōfita ʻo e taimi fuoloá. Naʻe faingofua hono lau ʻo e ngaahi leá.
ʻI he fakaʻosinga ʻo e talanoá, naʻe loʻimataʻia ʻa e Fineʻeikí.
“Fineʻeiki, ʻokú ke SAI PĒ?” Ko Siosefa atu ia.
Naʻe tali atu ʻe he Fineʻeikí, “ʻIo.” “ʻOku ou fiefia. Kuó ke ngāue mālohi.”
Naʻe malimali taʻetuku ʻa Siosefa.
“Oku ou laukonga ʻi he ʻaho kotoa pē, ʻo hangē pē ko hoʻo talamaí.” Naʻá ne fakahā ange ki he Fineʻeikí ʻene Tohi ʻa Molomoná. Naʻe ʻi he tohi ʻa ʻAlamaá ʻene fakaʻilonga tohí!
ʻE ʻi ai ha ʻaho ʻe ʻi he ngataʻanga ʻo e tohí ai e fakaʻilonga-tohi ʻa Siosefá. Pea te ne toe kamata foʻou leva!