តើការដឹងអំពីក្រុមព្រះ អាចផ្លាស់ប្ដូរខ្ញុំដោយរបៀបណា ?
គោលការណ៍ចំនួនប្រាំអំពីក្រុមព្រះ អាចធ្វើឲ្យមានភាពខុសប្លែកមួយនៅក្នុងរបៀបដែលអ្នករស់នៅ ។
យ៉ូសែប ស្ម៊ីធ បានមានប្រសាសន៍ថា « វាគឺជាគោលការណ៍ទីមួយនៃដំណឹងល្អ ដើម្បីដឹងឲ្យច្បាស់អំពីចរិកលក្ខណៈរបស់ព្រះ » ។1 អ្វីដែលយើងដឹងអំពីក្រុមព្រះ អាចផ្លាស់ប្ដូររបៀបដែលយើងរស់នៅ ពុំមែននៅក្នុងរឿងធំៗទេ ប៉ុន្តែនៅក្នុងរឿងតូចៗជារៀងរាល់ថ្ងៃ ។ ចូរពិចារណាអំពីរបៀបដែលចំណេះដឹងរបស់អ្នក អំពីក្រុមព្រះ មានឥទ្ធិពលមកលើជីវិតរបស់អ្នក នៅពេលអ្នកអានអំពីគោលការណ៍ទាំងប្រាំនេះ ។
ក្រុមព្រះ ស្រឡាញ់យើង ហើយចង់ឲ្យអ្វីដែលល្អបំផុតដល់យើង ។
សមាជិកនៃក្រុមព្រះ គឺអស់កល្ប ហើយគ្មានទីបំផុត ប៉ុន្តែក្រុមទ្រង់ នៅតែយកព្រះទ័យទុកដាក់ ដើម្បីឲ្យយើងសប្បាយ ហើយធ្វើល្អ ។ ប្រធាន ហ្គរដុន ប៊ី ហ៊ិងគ្លី ( ឆ្នាំ 1910– 2008 ) បានថ្លែងទីបន្ទាល់ថា ៖ « ក្រុមទ្រង់ ចាប់ព្រះទ័យចំពោះយើង ហើយយើងជាខ្លឹមនៃកង្វល់ដ៏ខ្លាំងរបស់ទ្រង់ ។ ទ្រង់មានពេលសម្រាប់យើងម្នាក់ៗ ។ យើងទៅរកព្រះបិតា តាមរយៈព្រះរាជបុត្រា ។ ទ្រង់គឺជាអង្គអង្វរជំនួសរបស់យើងនៅឯបល្ល័ង្កនៃព្រះ ។ តើជាការអស្ចារ្យយ៉ាងណាទៅ ដែលយើងក៏អាចទូលទៅកាន់ព្រះបិតានៅក្នុងព្រះនាមនៃព្រះរាជបុត្រា » ។2
ដោយសារសមាជិកនៃក្រុមព្រះ ស្រឡាញ់យើង ហើយចង់ឲ្យអ្វីដែលល្អបំផុតសម្រាប់យើង នោះការជ្រើសរើសរបស់យើងសំខាន់ ជាពិសេសនូវរឿងតូចៗ ដែលយើងធ្វើរាល់ថ្ងៃ ដែលនាំយើងឲ្យខិតទៅកាន់តែជិតពួកទ្រង់ ។ យើងមានសក្ដានុពលគ្មានដែនកំណត់ ហើយព្រះខ្វល់ព្រះទ័យអំពីជោគជ័យរបស់យើង ទោះជានៅក្នុងរឿងតូចៗ ។
ព្រះវរបិតាសួគ៌ ប្រទានឲ្យយើងនូវអ្វីៗទាំងអស់ ។
យើងដឹងថា ព្រះវរបិតាសួគ៌ បានប្រទានដល់យើងអ្វីៗគ្រប់យ៉ាង ដូច្នេះយើងគួរតែព្យាយាមដើម្បីស្គាល់ព្រះហស្ដរបស់ទ្រង់ ហើយមានអំណរគុណ ។ នៅពេលយើងមានអំណរគុណ នោះយើងមានទង្វើផ្សេង ។ ប្រធាន ថូម៉ាស អេស ម៉នសុន បានសន្យាថា « យើងអាចលើកខ្លួនយើងឡើង និង អ្នកដទៃផងដែរ នៅពេលយើងបដិសេធដើម្បីបន្ដនៅក្នុងអណាចក្រនៃគំនិតអវិជ្ជមាន ហើយបណ្ដុះនៅក្នុងដួងចិត្តយើងនូវគំនិតនៃការដឹងគុណមួយនោះ » ។3
ដោយសារអ្វីៗដែលយើងមានគឺបានមកពីព្រះ ( សូមមើល ម៉ូសាយ 2:20–21 គ. និងស. 59:21 )ការដឹងគុណរបស់យើង អាចធ្វើឲ្យយើងមានឆន្ទៈចែករំលែកកាន់តែច្រើនជាមួយអ្នកដទៃ ។ ការណ៍នេះ រួមមានទាំងពេលវេលា និងទេពកោសល្យរបស់យើង ក៏ដូចជាពរជ័យខាងសម្ភាររបស់យើងដែរ ។
ព្រះវរបិតាសួគ៌ គឺប្រកបដោយក្ដីមេត្តាករុណា ។
កិច្ចការរបស់ព្រះ និង សិរីល្អរបស់ព្រះ គឺ « ដើម្បីនាំឲ្យមានអមតភាព និង ជីវិតដ៏នៅអស់កល្បជានិច្ចដល់មនុស្ស » ( ម៉ូសេ 1:39 ) ។ ទ្រង់ចង់ឲ្យយើងមានជោគជ័យ ដូច្នេះទ្រង់បានប្រទាននូវការអភ័យទោសដល់យើង ចំពោះកំហុសដែលយើងបានធ្វើ ។ ក្ដីមេត្តាករុណារបស់ទ្រង់ ក៏បានប្រទាននូវការអភ័យទោស នៅពេលយើងធ្វើកំហុសដដែលៗផងដែរ ។ ព្រះវរបិតាសួគ៌ ព្រះយេស៊ូវគ្រីស្ទ និង ព្រះវិញ្ញាណបរិសុទ្ធ នឹងជួយយើងផ្លាស់ប្ដូរ ។
ក្ដីមេត្តាករុណារបស់ព្រះ បង្រៀនយើងអំពីការអភ័យទោស ។ ប្រធាន ឌៀថើរ អេស្វ អុជដូហ្វ ជាទីប្រឹក្សាទីពីរ នៅក្នុងគណៈប្រធានទីមួយ បានមានប្រសាសន៍ថា « ដោយសារតែព្រះស្រឡាញ់យើងយ៉ាងខ្លាំង ដូច្នេះយើងក៏ត្រូវស្រឡាញ់ និង អភ័យទោសចំពោះគ្នាទៅ វិញទៅមកផងដែរ » ។4 នេះរួមទាំងការអភ័យទោសដល់ខ្លួនយើងផងដែរ ។
ព្រះយេស៊ូវគ្រីស្ទបានរងទុក្ខសម្រាប់យើង ។
តាមរយៈដង្វាយធួន ព្រះអង្គសង្គ្រោះបានទទួលបទពិសោធន៍នូវការឈឺចាប់ និងការសោកសៅទាំងអស់របស់យើង ( សូមមើលអាលម៉ា 7:11–13 ) ។ បើសិនជាយើងមានថ្ងៃមួយដែលលំបាក ហើយមានអារម្មណ៍ដូចជាគ្មាននរណាម្នាក់យល់ពីយើង នោះយើងអាចដឹងថា ព្រះអង្គសង្គ្រោះគឺយល់ពីយើង ។ ហើយនៅពេលយើងមានថ្ងៃល្អ ហើយចង់ចែកចាយវាឲ្យនរណាម្នាក់ ព្រះអង្គសង្គ្រោះ គឺគង់នៅទីនោះសម្រាប់យើង ។ ទ្រង់ចង់ចែកចាយក្ដីអំណររបស់យើង ដូចជាទ្រង់ចែកការឈឺចាប់របស់យើង ។
ព្រះវិញ្ញាណបរិសុទ្ធដឹកនាំយើង ។
ព្រះយេស៊ូវគ្រីស្ទ បានសន្យានឹងសាវករបស់ទ្រង់ថា អង្គលួងលោមចិត្ត ឬព្រះវិញ្ញាណបរិសុទ្ធ អាចគង់នៅជាមួយពួកគេជានិច្ច ដើម្បីបង្រៀន និងលួងលោមចិត្តពួកគេ ( សូមមើល យ៉ូហាន 14:16–17, 26–27 ) ។ យើងក៏អាចមានអំណោយទាននៃព្រះវិញ្ញាណបរិសុទ្ធ ដើម្បីដឹកនាំយើងផងដែរ ។ ហើយយើងអាចទុកចិត្តថា ចម្លើយទាំងឡាយដែលព្រះវិញ្ញាណបរិសុទ្ធប្រទានឲ្យ នឹងជួយដល់យើង ។ ព្រមជាមួយនឹងការដឹកនាំរបស់ទ្រង់ នោះយើងអាចមានទំនាក់ទំនងយ៉ាងខ្ជាប់ខ្ជួនជាមួយនឹងក្រុមព្រះ ។ ហើយនៅពេលយើងធ្វើតាមការបំផុសគំនិតដែលយើងទទួល នោះយើងនឹងចាប់ផ្ដើមស្គាល់ពួកទ្រង់កាន់តែល្អប្រសើរ ។