សួស្ដី កូនចៀមតូច
ខូលីន សូឡូម៉ូន ទីក្រុងអុនតារីយ៉ូ ប្រទេសកាណាដា
ស្វាមីរបស់ខ្ញុំ និងខ្ញុំ បានជួយកូនស្រីរបស់យើង និងកូនប្រុសពីរនាក់របស់នាងទៅព្រលានយន្ដហោះ ជាកន្លែងដែលពួកគេរៀបចំធ្វើដំណើរត្រឡប់ទៅផ្ទះវិញ ។ យើងបានជួយកូនស្រីរបស់យើង នៅពេលនាងរាប់មើលវ៉ាលី ដាក់លិខិតឆ្លងដែន និងមើលកូនរពឹសអាយុបីឆ្នាំម្នាក់ ។ ថមមី ចៅប្រុសអាយុមួយខួបរបស់យើង គេងលក់នៅក្នុងរទេះរុញរបស់គាត់ ទាល់តែយើងដាស់គាត់ឲ្យភ្ញាក់ឡើង ។ គាត់ភ័យស្លន់ នៅពេលគាត់សម្របខ្លួនទៅនឹងសម្លេង ពន្លឺភ្លើងភ្លឺៗ និង ភាពអ៊ូអរនោះ ។
ខ្ញុំបានឃើញនូវទឹកមុខរបស់គាត់ ហើយបានដឹងនូវអ្វីដែលហៀបនឹងកើតឡើង ដូច្នេះខ្ញុំបានស្រែកប្រាប់កូនស្រីរបស់ខ្ញុំ ។ នាងបានមកជាប្រញាប់ ដាក់បាតដៃនាងផ្ទប់មុខថមមី ហើយមើលសម្លឹងទៅចំគាត់ រួចនិយាយដោយក្ដីស្រឡាញ់ថា « សួស្ដី កូនចៀមតូច » ។
ភ្លាមនោះ គាត់ឈប់ជ្រួញចិញ្ចើម ឈប់ស្រែក ហើយឈប់ចំកោងខ្លួន ដែលរាងកាយទាំងមូលឲ្យសញ្ញាថា ធូរស្បើយហើយ ។ គាត់បានញញឹមមុនពេលបិទភ្នែកគេងទៅវិញ ។ ភាពភ័យខ្លាចរបស់គាត់បានជំនួសដោយការអះអាងដ៏ស្ងប់ស្ងាត់ ហើយសេចក្ដីសុខសាន្ដបានគ្រប់ដណ្ដប់លើគាត់ ។ វាជារឿងតូចមួយ ប៉ុន្តែជាការសម្ដែងឲ្យឃើញប្រកបដោយអានុភាពអំពីការទុកចិត្តរបស់ ថមមី ទៅលើម្ដាយរបស់គាត់ ។ ការប៉ះ សម្លេង និង វត្តមានរបស់នាង បានជួយលួងលោមគាត់ ។
ដូចជា ថមមី យើងទាំងអស់គ្នាមានអារម្មណ៍ភ័យខ្លាច មិនពិតប្រាកដ ហើយច្របូកច្របល់ ។ វាជាការលួងលោមចិត្ត ពេលដឹងថា ព្រះយេស៊ូវគ្រីស្ទ ជាអ្នកគង្វាលល្អ ស្រែកហៅរកយើង ។ ទ្រង់ស្គាល់ហ្វូងរបស់ទ្រង់ ហើយយើងអាចទុកចិត្តលើទ្រង់ទាំងស្រុងបាន ។ ទ្រង់មានបន្ទូលដោយក្ដីស្រឡាញ់ថា « ខ្ញុំទុកសេចក្ដីសុខនៅនឹងអ្នករាល់គ្នា គឺខ្ញុំឲ្យសេចក្ដីសុខសាន្ដរបស់ខ្ញុំដល់អ្នក ។… កុំឲ្យចិត្តអ្នករាល់គ្នាថប់បារម្ភ ឬ ភ័យឡើយ » ( យ៉ូហាន 14:27 ) ។
ខ្ញុំដឹងថា អំឡុងពេលនៃភាពមិនពិតប្រាកដ នោះយើងអាចទទួលបានការលួងលោមចិត្ត និង ការអះអាង នៅពេលយើងងាកបែរទៅរកអ្នកគង្វាលល្អ ដោយក្ដីជំនឿ និង ការទុកចិត្ត ។ នៅពេលខ្ញុំទទួលបាននូវពរដោយការលួងលោមនៅក្នុងកណ្ដាលនៃភាពអ៊ូអែ នោះខ្ញុំចូលចិត្តគិតអំពីគ្រាដែលនៅព្រលានយន្ដហោះជាមួយនឹងកូនស្រី និង ចៅប្រុសរបស់ខ្ញុំ ។ ដូចជា ថមមី ខ្ញុំអាចដកដង្ហើមរសាយ នៅពេលបន្ទុករបស់ខ្ញុំត្រូវបានលើកចេញ ។ អំឡុងពេលនោះ ខ្ញុំមានអារម្មណ៍ផ្ទាល់មួយថា « សួស្ដី កូនចៀមតូច » មកពីអ្នកគង្វាលរបស់ខ្ញុំ ។