ដំណឹងល្អពីបុរាណ
ក្រុមព្រះដ៏ទេវភាព
ហ្គរដុន ប៊ី ហ៊ិងគ្លី ជាប្រធានទី 15 នៃសាសនាចក្រ បានកើតនៅថ្ងៃទី 23 ខែ មិថុនា ឆ្នាំ 1910 ។ លោកត្រូវបានតែងតាំងធ្វើជាសាវកនៅថ្ងៃទី 5 ខែ តុលា ឆ្នាំ 1961 នៅក្នុងវ័យ 51 ឆ្នាំ ហើយនៅថ្ងៃទី 12 ខែ មិនា ឆ្នាំ 1995 លោកត្រូវបានគាំទ្រជាប្រធាននៃសាសនាចក្រ ។
ដកស្រង់ចេញពី « The Father, Son, and Holy Ghost » Ensign ខែ វិច្ឆិកា ឆ្នាំ 1986 ទំព័រ 49–51; capitalization and punctuation standardized
ជំនឿរបស់យើងជឿលើព្រះជាព្រះវរបិតាដ៏អស់កល្ប លើព្រះរាជបុត្រារបស់ទ្រង់ ព្រះយេស៊ូវគ្រីស្ទ និងលើព្រះវិញ្ញាណបរិសុទ្ធគឺជាកត្តាដ៏សំខាន់នៅក្នុងសាសនារបស់យើង ។
នៅក្នុងការពន្យល់ពីពីកត្តាចម្បងនៃគោលលទ្ធិរបស់យើង នោះព្យាការីយ៉ូសែប បានដាក់ចំណុចនេះជាចំណុចលេខមួយ ៖
« យើងខ្ញុំជឿដល់ព្រះគឺព្រះវរបិតាដ៏គង់នៅអស់កល្បជានិច្ច និង ដល់ព្រះរាជបុត្រាទ្រង់ គឺ ព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ » ( មាត្រានៃសេចក្ដីជំនឿ 1:1 ) ។
[ ព្យាការីក៏បានបង្រៀនផងដែរថា ] ៖ « វាជាគោលការណ៍ទីមួយនៃដំណឹងល្អដើម្បីដឹងពីភាពជាក់លាក់មួយពីបុគ្គលិកលក្ខណៈនៃព្រះ » ( History of the Church, 6:305 ) ។
ការប្រកាសដ៏ចម្បង ហើយសំខាន់បំផុតទាំងនេះ គឺស្របគ្នានឹងព្រះបន្ទូលនៃព្រះអម្ចាស់ថា ៖… ៖ « នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែមួយ និងព្រះយេស៊ូវគ្រីស្ទដែលទ្រង់បានចាត់ឲ្យមកផង » ( យ៉ូហាន 17:3 ) ។ …
ព្រះជាព្រះវរបិតាដ៏នៅអស់កល្បជានិច្ច
ខ្ញុំជឿដោយគ្មានការស្ទាក់ស្ទើរ ឬពោរពេញដោយការតាំងចិត្តលើព្រះ ជាព្រះវរបិតាដ៏នៅអស់កល្បជានិច្ច ។ ទ្រង់គឺជាព្រះវរបិតារបស់ខ្ញុំ ជាព្រះវរបិតានៃវិញ្ញាណខ្ញុំ និងជាព្រះវរបិតានៃវិញ្ញាណមនុស្សទាំងអស់ ។ ទ្រង់គឺជាព្រះដ៏បង្កបង្កើតដ៏អស្ចារ្យ ជាព្រះគ្រប់គ្រងសកលលោកនេះ ។… មនុស្សត្រូវបានបង្កើតឡើងតាមរូបរបស់អង្គទ្រង់ ។ ទ្រង់មានតួអង្គជាក់លាក់ ។ ទ្រង់មានរូបកាយ ។ ទ្រង់មានរូបរាងដូចមនុស្ស ។ ទ្រង់មាន « ព្រះកាយជាសាច់ និងឆ្អឹងដែលជាក់ស្ដែងដូចជារូបកាយមនុស្ស » ( គ. និង ស. 130:22 ) ។
នៅក្នុងដំណើររឿងនៃការបង្កើតផែនដីនេះ « ទ្រង់ក៏មានបន្ទូលថា ចូរយើងធ្វើមនុស្សឲ្យដូចជារូបយើង ឲ្យមានភាពដូចយើង » ( លោកុប្បត្តិ 1:26 ) ។
តើមានភាសាណាទៀតដែលអាចមានភាពជាក់លាក់ជាងនេះទៀតនោះ ? តើវាធ្វើឲ្យព្រះបាត់បង់នូវតម្លៃមែនទេ ដោយសារតែមនុស្សត្រូវបានបង្កើតតាមរូបភាពជាក់លាក់របស់ទ្រង់នោះ ដូចដែលមនុស្សមួយចំនួនបានធ្វើឲ្យយើងជឿ ? ផ្ទុយទៅវិញ វាគួរតែធ្វើឲ្យដួងចិត្តបុរស និងស្ត្រីគ្រប់រូបមាននូវអំណរគុណដ៏ធំធេងមួយចំពោះខ្លួនឯងក្នុងនាមជាបុត្រា ឬបុត្រីម្នាក់នៃព្រះ ។…
… ក្នុងនាមជាអ្នកផ្សព្វផ្សាយសាសនាម្នាក់ ខ្ញុំបាននិយាយ [ នៅទីក្រុង ឡុងដ៏ ប្រទេស អង់គ្លេស នៅពេលអ្នករិះគន់ម្នាក់បានបង្អាក់ ដោយសួរថា ] « ហេតុអ្វីបានជាអ្នកមិនតាមគោលលទ្ធិក្នុងព្រះគម្ពីរប៊ីបដែលបានចែងថាក្នុងយ៉ូហាន ( 4:24 ) ថា ‹ ព្រះទ្រង់ជាវិញ្ញាណ › ? »
ខ្ញុំបានបើកព្រះគម្ពីរប៊ីបរបស់ខ្ញុំទៅរកបទគម្ពីរនោះដែលគាត់បានលើកឡើង ហើយបានអានខគម្ពីរនោះទាំងអស់ឲ្យគាត់ស្ដាប់ ៖ « ព្រះទ្រង់ជាវិញ្ញាណ ហើយអ្នកណាដែលថ្វាយបង្គំទ្រង់ នោះត្រូវតែថ្វាយបង្គំដោយវិញ្ញាណ និងសេចក្ដីពិតដែរ » ។
ខ្ញុំបាននិយាយថា « ពិតណាស់ ព្រះទ្រង់ជាវិញ្ញាណ ហើយអ្នកក៏ដូចគ្នាផងដែរ ដោយការរួមគ្នារវាងវិញ្ញាណ និងរូបកាយទើបធ្វើឲ្យអ្នកក្លាយជាទៅមនុស្សម្នាក់ដែលមានជីវិតរស់ ហើយរួមទាំងខ្ញុំផងដែរ » ។
យើងម្នាក់ៗមានរូបកាយពីរគឺរូបកាយខាងវិញ្ញាណ និងរូបកាយខាងសាច់ឈាម ។ មនុស្សទាំងអស់ស្គាល់ពីជីវិតនៃសេចក្ដីស្លាប់ … ហើយយើងម្នាក់ៗក៏ដឹងផងដែរថា វិញ្ញាណរស់នៅជារូបកាយមួយដាច់ដោយឡែក ហើយថានៅពេលខ្លះ ដោយស្ថិតនៅក្រោមផែនការដ៏ទេវភាពដែលអាចធ្វើទៅបានដោយសារការលះបង់របស់ព្រះរាជបុត្រានៃព្រះ នោះនឹងមានការរួបរួមគ្នាមួយរវាងវិញ្ញាណ និងរូបកាយ ។ ការប្រកាសរបស់ព្រះយេស៊ូវថា ព្រះទ្រង់ជាវិញ្ញាណពុំមែនមានន័យថា ទ្រង់គ្មានរូបកាយនោះទេ ដូចជាការប្រកាសនោះដែរ ខ្ញុំជាវិញ្ញាណពុំមែនមានន័យថា ខ្ញុំគ្មានរូបកាយឡើយ ។
ខ្ញុំពុំបានប្រៀបធៀបរូបកាយរបស់ខ្ញុំនឹងរូបកាយរបស់ទ្រង់នៅក្នុងភាពប្រសើរឡើង សមត្ថភាព ភាពស្រស់ស្អាត និងសិរីល្អឡើយ ។ រូបកាយទ្រង់មានភាពអស់កល្បជានិច្ច ។ រូបកាយខ្ញុំជារូបកាយរមែងស្លាប់ ។ ប៉ុន្តែការណ៍នោះបង្កើតតែការគោរពរបស់ខ្ញុំចំពោះទ្រង់ប៉ុណ្ណោះ ។… ខ្ញុំខិតខំស្រឡាញ់ទ្រង់ដោយអស់ពីដួងចិត្ត កម្លាំង គំនិត និងពលំរបស់ខ្ញុំ ។ ព្រះប្រាជ្ញាញាណរបស់ទ្រង់គឺលើសពីប្រាជ្ញារបស់មនុស្សទាំងអស់ ។… សេចក្ដីស្រឡាញ់របស់ទ្រង់មានចំពោះកូនចៅរបស់ទ្រង់ទាំងអស់ ហើយវាជាកិច្ចការ និង សិរីល្អរបស់ទ្រង់ដើម្បីនាំឲ្យកើតមានអមតភាព និងជីវិតដ៏នៅអស់កល្បជានិច្ចដល់បុត្រា និងបុត្រីរបស់ទ្រង់ … ( សូមមើល ម៉ូសេ 1:39 ) ។ …
ព្រះអម្ចាស់ព្រះយេស៊ូវគ្រីស្ទ
ខ្ញុំជឿលើព្រះអម្ចាស់ព្រះយេស៊ូវគ្រីស្ទ ជាព្រះរាជបុត្រានៃព្រះដ៏មានព្រះជន្មរស់នៅអស់កល្បជានិច្ច ។ ខ្ញុំជឿលើទ្រង់ជាបុត្រច្បងនៃព្រះវរបិតា និងជាបុត្រាបង្កើតតែមួយនៃព្រះវរបិតាក្នុងសាច់ឈាម ។ ខ្ញុំជឿលើទ្រង់ជាព្រះមួយអង្គ ដែលដាច់ដោយឡែកពីព្រះវរបិតាទ្រង់ ។ …
ខ្ញុំជឿថា នៅក្នុងជីវិតរមែងស្លាប់របស់យើង ទ្រង់ជាអង្គល្អឥតខ្ចោះដែលបានរស់នៅលើផែនដីនេះ ។ ខ្ញុំជឿថា ពន្លឺ និងសេចក្ដីពិតដែលនឹងសង្គ្រោះដល់ពិភពលោក ហើយនាំមកនូវភាពតម្កើងឡើងដល់មនុស្សលោកត្រូវបានរកឃើញនៅក្នុងព្រះបន្ទូលរបស់ទ្រង់ ប្រសិនបើបានរកឃើញ ។ ខ្ញុំជឿថា នៅក្នុងបព្វជិតភាពរបស់ទ្រង់មាននូវសិទ្ធិអំណាចដ៏ទេវភាព—ជាអំណាចដើម្បីប្រទានពរ ជាអំណាចដើម្បីព្យាបាល ជាអំណាចដើម្បីគ្រប់គ្រងកិច្ចការរបស់ព្រះលើផែនដី ជាអំណាចដើម្បីចងភ្ជាប់នៅស្ថានសួគ៌នូវអ្វីដែលបានចងភ្ជាប់នៅលើផែនដី ។
ខ្ញុំជឿថា តាមរយៈការលះបង់ដែលធ្វើឲ្យធួនរបស់ទ្រង់ ជាការថ្វាយព្រះជន្មរបស់ទ្រង់នៅលើភ្នំ កាល់វ៉ារី នោះទ្រង់បានធួនចំពោះអំពើបាបរបស់មនុស្សលោក ធ្វើឲ្យយើងរួចផុតពីបន្ទុកនៃអំពើបាប ប្រសិនបើយើងលះបង់អំពើអាក្រក់ចោល ហើយធ្វើតាមទ្រង់ ។ ខ្ញុំជឿលើភាពជាក់ស្ដែង និងអំណាចនៃការរស់ឡើងវិញរបស់ទ្រង់ ។ … ខ្ញុំជឿថា តាមរយៈដង្វាយធួនរបស់ទ្រង់ … យើងម្នាក់ៗត្រូវបានផ្ដល់ឲ្យនូវអំណោយនៃការរស់ឡើងវិញពីសេចក្ដីស្លាប់ ។ ខ្ញុំជឿថែមទៀតថា តាមរយៈការលះបង់នោះគឺបង្កើតឱកាសសម្រាប់ជីវិតដ៏នៅអស់កល្បជានិច្ច និងភាពតម្កើងឡើងនៅក្នុងនគររបស់ព្រះវរបិតាយើង ដល់បុរសស្ត្រី បុត្រាបុត្រីនៃព្រះគ្រប់រូប នៅពេលយើង … គោរពព្រះបញ្ញត្តិទាំងឡាយរបស់ទ្រង់ ។
គ្មានមនុស្សដ៏អស្ចារ្យណាម្នាក់ដែលបានរស់នៅលើផែនដីឡើយ ។ គ្មាននរណាផ្សេងទៀតដែលបានធ្វើការលះបង់ ឬផ្ដល់ពរជ័យដូចនេះឡើយ ។ ទ្រង់គឺជាព្រះអង្គសង្គ្រោះ និងជាព្រះប្រោសលោះនៃពិភពលោក ។ ខ្ញុំជឿលើទ្រង់ ។ ខ្ញុំសូមប្រកាសពីទេវភាពរបស់ទ្រង់… ។ ខ្ញុំស្រលាញ់ទ្រង់ ។ ខ្ញុំសូមនិយាយពីព្រះនាមទ្រង់ដោយការគោរព និងការស្ងើចសរសើរ ។ …
… ព្រះគម្ពីរបានប្រាប់ពីមនុស្សដែលទ្រង់បានបង្ហាញអង្គទ្រង់ ហើយដែលទ្រង់បានមានបន្ទូលជាមួយក្នុងនាមជាបុត្រានៃព្រះដែលបានរស់ឡើងវិញ ហើយមានព្រះជន្មរស់ ។ ដូចគ្នានេះដែរ នៅគ្រាកាន់កាប់ត្រួតត្រានេះទ្រង់បានបង្ហាញអង្គទ្រង់ ហើយមនុស្សដែលបានឃើញទ្រង់បានប្រកាសថា ៖
« ហើយឥឡូវនេះ បន្ទាប់ពីទីបន្ទាល់ជាច្រើនដែលបានថ្លែងអំពីទ្រង់ នេះគឺជាទីបន្ទាល់ចុងក្រោយបង្អស់ ដែលយើងខ្ញុំសូមថ្លែងអំពីទ្រង់ ៖ គឺថាទ្រង់មានព្រះជន្មរស់នៅ !
« ត្បិតយើងខ្ញុំបានឃើញទ្រង់គង់នៅខាងស្ដាំព្រះហស្ដនៃព្រះ ហើយយើងខ្ញុំបានឮសម្លេងដែលថ្លែងទីបន្ទាល់ថា ទ្រង់គឺជាបុត្រាបង្កើតតែមួយនៃព្រះវរបិតា—
« ថាដោយសារព្រះអង្គ និងតាមរយៈព្រះអង្គ ហើយពីព្រះអង្គ នោះពិភពលោកទាំងឡាយមានឡើង ហើយបានបង្កើតមក ហើយបណ្ដាជននៅទីនោះ គឺជាបុត្រាបុត្រីបង្កើតចំពោះព្រះ » ( គ. និង ស. 76:22–24 ) ។
នេះគឺជាព្រះគ្រីស្ទ ជាអង្គដែលខ្ញុំជឿ ហើយថ្លែងទីបន្ទាល់ ។
ព្រះវិញ្ញាណបរិសុទ្ធ
ចំណេះដឹងនោះកើតចេញពីបន្ទូលនៅក្នុងព្រះគម្ពីរ ហើយទីបន្ទាល់នោះកើតចេញតាមរយៈព្រះចេស្ដានៃព្រះវិញ្ញាណបរិសុទ្ធ ។ វាជាអំណោយទានមួយ ពិសិដ្ឋ ហើយអស្ចារ្យ បានថ្លែងតាមរយៈវិវរណៈពីសមាជិកទីបីនៃក្រុមព្រះ ។ ខ្ញុំជឿលើព្រះវិញ្ញាណបរិសុទ្ធជាអង្គនៃវិញ្ញាណដែលគង់នៅជាមួយនឹងព្រះវរបិតា និងព្រះរាជបុត្រា អង្គទាំងបីនេះបានបង្កើតទៅជាក្រុមព្រះដ៏ទេវភាព ។…
ថាព្រះវិញ្ញាណបរិសុទ្ធត្រូវបានរៀបចំឡើងកាលពីបុរាណឲ្យធ្វើជាសមាជិកនៃក្រុមព្រះ គឺមានភស្ដុតាងក្នុងការសន្ទនារវាងពេត្រុស និងអាន្ន៉ានាស នៅពេលគេទុកតម្លៃដីមួយចំណែក ដែលបានមកពីការលក់ដីមួយកន្លែង ។
« តែពេត្រុសសួរថា អាន្ន៉ានាសអើយ ហេតុអ្វីបានជាអារក្សសាតាំងមកនៅពេញក្នុងចិត្តអ្នក … ?
« … អ្នកកាត់ចិត្តធ្វើដូច្នេះ នេះមិនមែនកុហកដល់មនុស្សទេ គឺឈ្មោះថាកុហកដល់ព្រះវិញ » ( កិច្ចការ 5:3–4 ) ។
ព្រះវិញ្ញាណបរិសុទ្ធ [ គឺជា ] អង្គលួងលោមចិត្តដែលបានសន្យាដោយព្រះអង្គសង្គ្រោះថា ជាអង្គដែលនឹងបង្រៀនដល់ពួកអ្នកដើរតាមរបស់ទ្រង់នូវរាល់កិច្ចការទាំងអស់ ហើយធ្វើឲ្យពួកគេចងចាំនូវរាល់កិច្ចការទាំងអស់ … ( សូមមើល យ៉ូហាន 14:26 ) ។
ព្រះវិញ្ញាណបរិសុទ្ធគឺជាអង្គថ្លែងទីបន្ទាល់ពីសេចក្ដីពិត ជាអង្គដែលអាចបង្រៀនមនុស្សនូវកិច្ចការទាំងឡាយដែលពួកគេមិនអាចបង្រៀនគ្នាទៅវិញទៅមកបាន ។… ចំណេះដឹងមួយពីសេចក្ដីពិតស្ដីពីព្រះគម្ពីរមរមនត្រូវបានសន្យា « ដោយព្រះចេស្ដានៃព្រះវិញ្ញាណបរិសុទ្ធ » ។ បន្ទាប់មក មរ៉ូណៃ បានប្រកាសថា « ហើយដោយព្រះចេស្ដានៃព្រះវិញ្ញាណបរិសុទ្ធ នោះអ្នករាល់គ្នាអាចស្គាល់សេចក្ដីពិតនៃគ្រប់ការណ៍ទាំងអស់ » ( មរ៉ូណៃ 10:4–5 ) ។
ខ្ញុំជឿថា អំណាចនេះ អំណោយទាននេះ គឺមានសម្រាប់ពួកយើងនៅសព្វថ្ងៃនេះ ។
ពិត ហើយដាច់ដោយឡែក
…យើងខ្ញុំជឿដល់ព្រះគឺព្រះវរបិតាដ៏គង់នៅអស់កល្បជានិច្ច និងដល់ព្រះរាជបុត្រាទ្រង់ គឺ ព្រះយេស៊ូវគ្រីស្ទ ហើយដល់ព្រះវិញ្ញាណបរិសុទ្ធ ។
ខ្ញុំបានជ្រមុជទឹកនៅក្នុងព្រះនាមនៃអង្គទាំងបីនេះ ។ ខ្ញុំបានរៀបការនៅក្នុងព្រះនាមនៃអង្គទាំងបីនេះ ។ ខ្ញុំគ្មានការងឿងឆ្ងល់ស្ដីពីភាពពិត និងភាពដាច់ដោយឡែករបស់ទ្រង់ឡើយ ។ ភាពដាច់ដោយឡែកនោះត្រូវបានបង្ហាញនៅពេលព្រះយេស៊ូវ ជ្រមុជដោយយ៉ូហាន នៅទន្លេយ័រដាន់ ។ ព្រះរាជបុត្រានៃព្រះបានឈរនៅក្នុងទឹកទន្លេនោះ ។ ព្រះសូរសៀងរបស់ព្រះវរបិតាទ្រង់បានបន្លឺប្រកាស ពីបុត្រាដ៏ទេវភាពនៃទ្រង់ ហើយព្រះវិញ្ញាណបរិសុទ្ធបានបង្ហាញក្នុងរាងជាសត្វព្រាប ( សូមមើល ម៉ាថាយ 3:16–17 ) ។
ខ្ញុំដឹងថា ព្រះយេស៊ូវបានមានបន្ទូលថា ពួកអ្នកដែលធ្លាប់បានឃើញទ្រង់ ហាក់ដូចជាបានឃើញព្រះវរបិតាដូច្នោះដែរ [ សូមមើល យ៉ូហាន 14:9 ] ។ តើការណ៍នេះមិនអាចត្រូវបាននិយាយដូចគ្នាពីសំណាក់កូនដែលមានរូបរាងដូចជាឪពុកម្ដាយខ្លួនទេឬ ?
នៅពេលព្រះយេស៊ូវបានអធិស្ឋានទៅកាន់ព្រះវរបិតា ប្រាកដណាស់គឺទ្រង់ពុំមែនកំពុងអធិស្ឋានទៅអង្គឯងនោះឡើយ !
ការរួបរួមដ៏ល្អឥតខ្ចោះ
ពួកទ្រង់ជាអង្គដាច់ដោយឡែកពីគ្នា ប៉ុន្តែពួកទ្រង់មានគោលបំណង និងកិច្ចខិតខំតែមួយ ។ ពួកទ្រង់បានរួបរួមតែមួយនៅក្នុងការនាំឲ្យកើតមាននូវផែនការដ៏ទេវភាពយ៉ាងធំធេងសម្រាប់សេចក្ដីសង្គ្រោះ និងភាពតម្កើងឡើងដល់កូនចៅនៃព្រះ ។
… ព្រះគ្រីស្ទបានទូលអង្វរជាមួយព្រះវរបិតាទ្រង់ស្ដីពីពួកសាវក ដែលទ្រង់ស្រឡាញ់ ដោយមានបន្ទូលថា ៖
« ទូលបង្គំមិនអធិស្ឋានឲ្យអ្នកទាំងនេះតែប៉ុណ្ណោះទេ គឺឲ្យដល់ទាំងអ្នកណាដែលនឹងជឿដល់ទូលបង្គំ ដោយសារពាក្យរបស់គេថែមទៀតដែរ
« ដើម្បីឲ្យទាំងអស់បានរួមមកតែមួយ ឱព្រះវរបិតាអើយ ដូចជាទ្រង់គង់ក្នុងទូលបង្គំ ហើយទូលបង្គំនៅក្នុងទ្រង់ដែរ គឺឲ្យអ្នកទាំងនោះបានរួមគ្នាតែមួយនៅក្នុងយើង » ( យ៉ូហាន 17:20–21 ) ។
ដោយសារតែសាមគ្គីភាពដ៏ល្អឥតខ្ចោះនោះហើយគឺរវាងព្រះវរបិតា ព្រះរាជបុត្រា និងព្រះវិញ្ញាណបរិសុទ្ធ ទើបធ្វើឲ្យទ្រង់ទាំងបីអង្គមានព្រះទ័យតែមួយនៅក្នុងក្រុមព្រះដ៏ទេវភាព ។
នីហ្វៃទី 3 11:15 ៖ One by One ( ម្ដងមួយៗ ) ដោយ វ៉លធើរ រ៉ែន ទទួលបានសិទ្ធិអនុញ្ញាតពីសារមន្ទីរប្រវត្តិសាស្ត្រសាសនាចក្រ
Prayer at Gethsemane ( ការអធិស្ឋានក្នុងច្បារគែតសាម៉ានី ) ដោយ ឌេល ផាសុន