អ្នកត្រូវបានអញ្ជើញ
តើនរណាដែលមិនចូលចិត្តការអញ្ជើញ ? នៅពេលយើងទទួលការអញ្ជើញមួយ ដើម្បីចូលរួមនៅក្នុងពិធីខួបកំណើត ឬពិធីភោជនីយអាហារអាពាហ៍ពិពាហ៍ យើងមានអារម្មណ៍រីករាយដើម្បីអាចសប្បាយរីករាយជាមួយនឹងអ្នកដទៃក្នុងព្រឹត្តការសំខាន់ៗក្នុងជីវិតរបស់ពួកគេ ។ បាវចនាម៉្ញូឆលសម្រាប់ឆ្នាំ 2014 ក៏មាននូវការអញ្ជើញដ៏រីករាយមួយដែលសំខាន់ដ៏អស់កល្បផងដែរថា ៖ « ចូរមករកព្រះគ្រីស្ទ ហើយឲ្យបានល្អឥតខ្ចោះនៅក្នុងទ្រង់ ហើយចូរលះបង់ចោលនូវអស់ទាំងអំពើដ៏ឥតបរិសុទ្ធចុះ » ( មរ៉ូណៃ 10:32 ) ។
ការអញ្ជើញជាច្រើនតម្រូវឲ្យមានការឆ្លើយតបមួយ —ចម្លើយមួយ— ដើម្បីបង្ហាញថាយើងទទួលយកការអញ្ជើញ ឬអត់ ។ តើអ្នកបានឆ្លើយតបការអញ្ជើញនេះនៅក្នុងជីវិតរបស់អ្នកឬទេ ? ការមករកព្រះគ្រីស្ទ មានន័យថា យើងកំពុងរក្សាសេចក្ដីសញ្ញាដ៏ពិសិដ្ឋ ដែលយើងបានធ្វើនៅពិធីបុណ្យជ្រមុជទឹក ។ វាមានន័យថា យើងបានទទួលយកព្រះយេស៊ូវគ្រីស្ទ ជាព្រះអង្គសង្គ្រោះ និងព្រះប្រោសលោះដោយផ្ទាល់របស់យើង ។ វាមានន័យថា យើងទទួលស្គាល់ ហើយជឿនូវអ្វីដែលអាលម៉ា បានបង្រៀនដល់កូនប្រុសរបស់គាត់ ស៊ីបឡុន ៖ « គ្មានផ្លូវ ឬ មធ្យោបាយឯណាផ្សេងទៀតទេ ដែលនាំឲ្យមនុស្សបានសង្គ្រោះ មានតែដោយ និងតាមរយៈព្រះគ្រីស្ទមួយប៉ុណ្ណោះ » ( អាលម៉ា 38:9 ) ។ ការទទួលយកការអញ្ជើញនេះ មានន័យថា យើងមានការតាំងចិត្តដើម្បីដើរតាមគំរូដ៏ឥតខ្ចោះរបស់ព្រះគ្រីស្ទ ដោយការរស់នៅប្រកបដោយគុណធម៌ និងមានជីវិតដែលបានឧទ្ទិស ហើយដោយក្តីស្រឡាញ់ និងការបម្រើដល់អ្នកដទៃ ។
ការអញ្ជើញនេះ គឺពុំមែនសម្រាប់ព្រឹត្តការតែមួយដងនោះទេ វាគឺជាដំណើរការមួយ ។ យើងត្រូវបានអញ្ជើញឲ្យដើរតាមផ្លូវមួយ ដែលនឹងដឹកនាំយើងទៅព្រះវិហារបរិសុទ្ធ ដែលយើងធ្វើសេចក្ដីសញ្ញាបន្ថែមទៀត ជាមួយព្រះវរបិតាយើងនៅស្ថានសួគ៌ ហើយចូលរួមក្នុងពិធីបរិសុទ្ធសំខាន់ចំពោះការលើកតម្កើងរបស់យើង ។ ផ្លូវនេះ អាចរួមមានការបម្រើបេសកកម្ម ។ វានឹងបញ្ចូលទាំងអាពាហ៍ពិពាហ៍ក្នុងព្រះវិហារបរិសុទ្ធ និងការក្លាយទៅជាបុរស និង ស្ត្រីសុចរិតនៅក្នុងនគរនៃព្រះ ។ វាក៏មានន័យផងដែរថាជាការកាន់ខ្ជាប់ដរាបដល់ចុងបំផុត ។ ដូចជាការអញ្ជើញបានថ្លែង នៅពេលយើងមករកព្រះគ្រីស្ទ នោះយើងអាចបានល្អឥតខ្ចោះក្នុងទ្រង់ ។ ព្រះគ្រីស្ទបានធ្វើឲ្យវាកើតឡើងបាន ដើម្បីស្ថិតនៅលើផ្លូវសេចក្ដីសញ្ញានេះ តាមរយៈសេចក្ដីជំនឿទៅលើទ្រង់ និងតាមរយៈការប្រែចិត្ត ។ ដំណើរការនៃការប្រែក្លាយទៅជាល្អឥតខ្ចោះនេះ អាចចាប់ផ្ដើមនៅថ្ងៃនេះ ដង្វាយធួននៃព្រះគ្រីស្ទធ្វើឲ្យវាកើតឡើងបាន ។
ការអញ្ជើញនេះ សុំឲ្យយើងលះបង់ចោលខ្លួនយើងនូវអស់ទាំងអំពើដ៏ឥតបរិសុទ្ធចុះ— ដើម្បីខុសប្លែកពីម៉ូត បទដ្ឋាន និងការអនុវត្តរបស់លោកិយ ។ យើងត្រូវបានអញ្ជើញឲ្យ « ទុកចោលរបស់ទាំងឡាយនៃលោកិយនេះ ហើយចូរស្វែងរករបស់ទាំងឡាយណា ដែលគ្រាន់បើជាងនេះវិញ ( គ និង ស. 25:10 ) ។ យើងសូមថ្លែងទីបន្ទាល់ថា ការទទួលយកការអញ្ជើញដើម្បី « មករកព្រះគ្រីស្ទ ហើយបានល្អឥតខ្ចោះនៅក្នុងទ្រង់ចុះ » នឹងដឹកនាំទៅរកសុភមង្គលក្នុងជីវិតនេះ និងជីវិតដ៏អស់កល្បជានិច្ច នៅក្នុងពិភពខាងមុខ ។ អ្នកត្រូវបានអញ្ជើញឲ្យឆ្លើយតបនៅថ្ងៃនេះ !