សំឡេងយុវវ័យ ៖ ពរជ័យទាំងឡាយនៃពង្សប្រវត្តិ

ថ្មីៗនេះ យុវវ័យមកពីទីក្រុង នូវយ៉ោក ស.រ.អា. ត្រូវបានអញ្ជើញដោយគណៈប្រធានស្ដេកទៅស្វែងរកឈ្មោះមួយ ដើម្បីនាំយកទៅព្រះវិហារបរិសុទ្ធ ជាផ្នែកមួយនៃសន្និសីទយុវវ័យពិសេសមួយ ។ ពួកគេបានរកឃើញពរជ័យដ៏មហិមា នៅពេលពួកគេមានអារម្មណ៍ថា ដួងចិត្តរបស់ពួកគេបានបង្វែរទៅកាន់ឪពុករបស់ពួកគេ ( សូមមើល ម៉ាឡាគី 4:5–6 ) ។

នាំឈ្មោះគ្រួសារទៅកាន់ព្រះវិហារបរិសុទ្ធ

« ខ្ញុំធ្លាប់គិតថា ពង្សប្រវត្តិ គឺគ្រាន់តែជារឿងមួយទៀតដើម្បីធ្វើ ប៉ុន្តែឥឡូវខ្ញុំដឹងថា ឈ្មោះទាំងនេះ គឺជាបុគ្គលពិត ដែលកំពុងរង់ចាំអស់រយៈពេលជាច្រើនឆ្នាំហើយ ។ បទពិសោធន៍ព្រះវិហារបរិសុទ្ធរបស់ខ្ញុំ គឺមានភាពខុសប្លែកពេលដែលខ្ញុំនាំឈ្មោះគ្រួសារទៅ ។ ខ្ញុំគិតថា វាគឺដោយសារតែកិច្ចខិតខំ ពេលវេលា និងការអធិស្ឋាន ដែលបានធ្វើ ដើម្បីទៅស្វែងរកឈ្មោះមួយនោះ ។ ប៉ុន្តែឈ្មោះ មួយ គឺមានតម្លៃហើយ ដោយសារនោះជា មនុស្សម្នាក់ ដែលត្រូវការនៅជាមួយព្រះវរបិតាឯស្ថានសួគ៌ » ។ —ហានណា អេ., អាយុ 13 ឆ្នាំ•
« បន្ទាប់ពីការស្វែងរកឈ្មោះបុគ្គលម្នាក់ នោះអ្នកចាប់ផ្ដើមមានទំនាក់ទំនងនឹងបុគ្គលនោះនៅពិភពវិញ្ញាណ ។ ការនាំឈ្មោះផ្ទាល់របស់អ្នក គឺជាវិធីមួយដើម្បីពង្រឹងចំណងនេះ ។ វាជួយអ្នកឲ្យយល់ពីគ្រួសារអស់កល្បជានិច្ចរបស់អ្នក » ។ —ស្ពែនស៊ើរ អេស., អាយុ 15 ឆ្នាំ
« ការនាំឈ្មោះគ្រួសារទៅព្រះវិហារបរិសុទ្ធ ជួយអ្នកដឹងពីភាពពិតថា អ្នកទាំងនោះជានរណា ។ ពួកគាត់មិនមែនគ្រាន់តែជាឈ្មោះនៅលើសន្លឹកក្រដាសមួយនោះទេ ពួកគាត់គឺជាបងប្អូនប្រុសស្រីពិត ដែលចែកចាយប្រវត្តិអ្នក —ហើយជាផ្នែកមួយនៃប្រវត្តិអ្នកនោះ » ។ —លីលី អ៊ិន., អាយុ 16 ឆ្នាំ

ការទទួលពរជ័យ•

« ខ្ញុំបានកត់សម្គាល់ឃើញភាពខុសគ្នាមួយនៅក្នុងជីវិតខ្ញុំ ។ វាគឺជាអារម្មណ៍ដ៏កក់ក្ដៅ និងជាអារម្មណ៍នៃការការពារមួយ » ។ —ណូអេ អ., អាយុ 13 ឆ្នាំ
« អ្នកអាចមានអារម្មណ៍ក្នុងបេះដូងរបស់អ្នកថាអ្នកមានចំណែកនៅ ក្នុងកិច្ចការមួយដែលកាន់តែប្រសើរ ។ ការផ្ដល់ឲ្យគ្រួសាររបស់អ្នកនូវឱកាសដើម្បីទទួលពរជ័យព្រះវិហារបរិសុទ្ធ គឺជាអារម្មណ៍មួយដែលខុសប្លែកពីគេទាំងអស់ » ។ —ខូរីន ស៊ី., អាយុ 17 ឆ្នាំ•
« ខ្ញុំបានមានអារម្មណ៍កាន់តែសុខស្រួល និងស្ងប់ស្ងាត់ ចាប់តាំងពីខ្ញុំបានចាប់ផ្ដើមធ្វើពង្សប្រវត្តិ ។ នៅពេលខ្ញុំនាំឈ្មោះគ្រួសារទៅព្រះវិហារបរិសុទ្ធ នោះវាផ្ដល់នូវអារម្មណ៍នៃក្ដីអំណរដ៏លើលលប់មួយ » ។ —ថៃលើរ អិម., អាយុ 16 ឆ្នាំ
« វាបានបង្កើនសេចក្ដីស្រឡាញ់របស់ខ្ញុំចំពោះព្រះអង្គសង្គ្រោះ ព្រះវរបិតាសួគ៌ និងជីដូនជីតារបស់ខ្ញុំ ។ វាបានជួយខ្ញុំឲ្យកាន់តែខិតទៅជិតគ្រួសារផ្ទាល់របស់ខ្ញុំ ហើយបានបង្កើនទីបន្ទាល់របស់ខ្ញុំអំពីដំណឹងល្អ » ។ —អាឡិចសាន់ដ្រា អេច., អាយុ 14 ឆ្នាំ
« ខ្ញុំសប្បាយរីករាយច្រើនជាងមុន » ។ —រ៉ូស អេស., អាយុ 12 ឆ្នាំ•
« ជាមួយនឹងឈ្មោះនីមួយៗ ខ្ញុំមានអារម្មណ៍នៃក្ដីសុខសាន្ដ និងរំភើបចិត្តដ៏លើសលប់ ដូចជាមានមនុស្សដែលកំពុងរង់ចាំខ្ញុំ » ។ —រីនុន ប៊ី., អាយុ 15 ឆ្នាំ
« ខ្ញុំដឹងថាខ្ញុំមកពីកន្លែងណា ហើយទំនុកចិត្តរបស់ខ្ញុំកំពុងតែស្ថាបនាឡើង » ។ —អេលីស្សា អិល., អាយុ 13 ឆ្នាំ
« ខ្ញុំមិនសូវមានការឈ្លោះទាស់ទែងគ្នានៅក្នុងផ្ទះរបស់ខ្ញុំទេ » ។ —ហ្គេរីហ្គ អិល., អាយុ 12 ឆ្នាំ
« ខ្ញុំយល់អំពីសារៈសំខាន់នៃក្រុមគ្រួសារកាន់តែច្រើនឡើងៗ ។ ខ្ញុំចង់មានភាពកាន់តែជិតស្និតនឹងគ្រួសាររបស់ខ្ញុំនៅលើផែនដី » ។ —អិមម៉ា អិល., អាយុ 15 ឆ្នាំ
« វាបានជួយខ្ញុំឲ្យយល់កាន់តែច្រើនអំពីផែនការរបស់ព្រះចំពោះខ្ញុំ ។ ខ្ញុំមានអារម្មណ៍កាន់តែជិតនឹងព្រះវរបិតា និងដំណឹងល្អ ដោយសារតែខ្ញុំបានយល់កាន់តែច្បាស់ អំពីពិធីបរិសុទ្ធដែលកំពុងកើតមានឡើង » ។ —ណូអេ ស៊ី., អាយុ 14 ឆ្នាំ