ទៅជួសជុលម៉ាញ៉េរបស់គាត់
ខេន អេ. រ៉ាស៊ល, រដ្ឋហ្លូរីដា, ស.រ.អា
អ្នកជិតខាងរបស់យើង គឺជាអ្នកគ្រប់គ្រងយុវវ័យនៅព្រះវិហារក្នុងមូលដ្ឋានមួយ ហើយយុវវ័យនៃព្រះវិហាររបស់គាត់ បានមកសួរសុខទុក្ខគាត់ជាញឹកញាប់ ។ វាមិនមានអ្វីភ្ញាក់ផ្អើលទេ ដែលឃើញមានឡានជាច្រើនចតនៅខាងមុខផ្ទះរបស់គាត់ទាំងយប់ទាំងថ្ងៃនោះ ។
យុវវ័យមួយចំនួនទាំងនេះ ចាក់ម៉ាញ៉េឮខ្លាំងៗនៅក្នុងឡានរបស់ពួកគេគ្រប់ពេល ។ យើងអាចឮពួកគេមកពីចម្ងាយ ហើយនៅពេលពួកគេមកកាន់តែជិត នោះបង្អួចផ្ទះរបស់យើងរង្គើរហើយ ។ ជាញឹកញាប់ ភ្លេងខ្លាំងៗនឹងធ្វើឲ្យយើងភ្ញាក់ឡើងទាំងយប់ ។ ភាពធុញទ្រាន់របស់ខ្ញុំបានផ្ដុំច្រើនឡើងៗ ហើយខ្ញុំបានចាប់ផ្ដើមមើលទៅក្មេងៗទាំងនេះ ដូចជាសត្រូវរបស់ខ្ញុំ ។
មានថ្ងៃមួយ ខណៈដែលខ្ញុំកំពុងតែបោសស្លឹកឈើ ខ្ញុំបានឮសម្លេងម៉ាញ៉េឡានចាក់ខ្លាំងៗមកពីចម្ងាយ ។ មិនយូរប៉ុន្មានសម្លេងនោះបានមកកាន់តែជិត ហើយកាន់តែឮខ្លាំងឡើង ។ ពេលដែលអ្នកបើកឡានបត់ឡានត្រង់កាច់ជ្រុង ចូលមកផ្ទះអ្នកជិតខាងខ្ញុំ នោះខ្ញុំខឹង ហើយខ្ញុំបានអធិស្ឋានសុំឲ្យព្រះវរបិតាសួគ៌ បំផ្លាញម៉ាញ៉េនោះ ។
ការអធិស្ឋានយ៉ាងខ្លាំងរបស់ខ្ញុំ បានក្លាយទៅជាការអធិស្ឋានសរសើរ និងដឹងគុណវិញ នៅពេលដែលម៉ាញ៉េនោះឈប់ឮនៅរំពេចដែលគាត់នោះបើកឡានចូលមក ។ ខ្ញុំធ្លាប់ជួសជុលម៉ាញ៉េឡាន ហើយដឹងថា តាមរយៈសម្លេងនោះ ដែលវាពុំត្រូវបានគេបិទ— នោះវានឹងឈប់ដើរ ។
យុវជននោះ ខកចិត្តដែលម៉ាញ៉េឡានគាត់ បានឈប់ដើរ ហើយមិត្តគាត់ជាច្រើនបានមកលួងលោមចិត្តគាត់ ។ ផ្ទុយទៅវិញ ខ្ញុំមានអារម្មណ៍ពេញចិត្តណាស់ ពេលឃើញនូវអ្វីដែលខ្ញុំបានគិតថា គឺជាព្រះហស្តរបស់ព្រះដែលធ្វើឲ្យម៉ាញ៉េនោះឈប់ដើរ ។
ប៉ុន្ដែនៅពេលខ្ញុំបន្ដមើលហេតុការណ៍នោះ ខ្ញុំបានដឹងថា ខ្ញុំកំពុងមើលខ្លួនខ្ញុំ ពេលខ្ញុំមានចារិកដូច្នោះកាលពីច្រើនឆ្នាំកន្លងទៅ ។ ដួងចិត្តខ្ញុំបានទន់ភ្លន់វិញ ហើយខ្ញុំបានចាប់ផ្ដើមគិតថា ក្មេងប្រុសនេះពុំមែនជាសត្រូវរបស់ខ្ញុំទេ ។ បន្ទាប់មកព្រះវិញ្ញាណបានខ្សឹបប្រាប់ថា « ចូរទៅជួសជុលម៉ាញ៉េរបស់គាត់ទៅ » ។
ខ្ញុំបានភ្ញាក់ផ្អើលដោយការបំផុសគំនិតនេះ ហើយព្យាយាមមិនគិតពីវា ។ ហេតុអ្វីក៏ខ្ញុំគួរទៅជួសជុលអ្វីដែលកំពុងតែធ្វើឲ្យជីវិតរបស់ខ្ញុំពុំសុខស្រួលនោះ ? ប៉ុន្តែការបំផុសគំនិតបានកើតមានឡើងម្ដងទៀត ហើយខ្ញុំបានធ្វើតាម ។
បន្ទាប់ពីខ្ញុំបានសុំជួយហើយ រំពេចនោះខ្ញុំបានមើលឃើញប្រភពនៃបញ្ហា ។ ជួសជុលតែមួយភ្លែត ។ មិនយូរប៉ុន្មាន ម៉ាញ៉េបានចាក់ឮម្ដងទៀត ឮខ្លាំងដូចពីដើម ។
យុវជននោះ បានថ្លែងអំណរគុណ ហើយបានសួរ បើសិនជាមានអ្វីដែលគាត់អាចធ្វើសម្រាប់ខ្ញុំវិញ ។ ខ្ញុំបានប្រាប់គាត់ថា ខ្ញុំត្រូវក្រោកពីព្រលឹមទៅធ្វើការ ហើយបើគាត់អាចបិទសម្លេងភ្លេងរបស់គាត់បន្ដិចនៅពេលល្ងាច នោះខ្ញុំពិតជាមានអំណរគុណណាស់ ។ គាត់ញញឹម ហើយអះអាងនឹងខ្ញុំថា គាត់នឹងធ្វើដូច្នោះបាន ។
គាត់មិនត្រឹមតែបន្ថយសម្លេងម៉ាញ៉េរបស់គាត់នៅពេលយប់ប៉ុណ្ណោះទេ គឺគាត់ថែមទាំងបានក្លាយជាប៉ូលីសការពារសម្លេងម៉ាញ៉េរបស់ខ្ញុំ ដែលគាត់ត្រូវមើលឲ្យប្រាដកថា សម្លេងម៉ាញ៉េរបស់មិត្តភិក្តគាត់ត្រូវបន្ថយសម្លេងផងដែរ ។ ចាប់ពីពេលនោះមក យើងពុំដែលមានបញ្ហានឹងតន្ត្រីឮខ្លាំងៗពេលយប់ទៀតទេ ។
ព្រះវរបិតាសួគ៌ ពិតជាបានស្ដាប់ឮ ហើយឆ្លើយការអធិស្ឋានរបស់ខ្ញុំមែន ។ ដំណោះស្រាយរបស់ទ្រង់ ផ្ដល់នូវភាពសុខសាន្ដ និង ភាពស្ងប់ស្ងាត់ ជាមេរៀនដ៏មានតម្លៃមួយ អំពីការធ្វើតាមព្រះវិញ្ញាណ ហើយជាការយល់ដឹងដ៏ល្អប្រសើរមួយអំពីអ្វីដែលមានន័យថា « ឲ្យស្រឡាញ់ខ្មាំងសត្រូវរបស់អ្នក » ( លូកា 6:27 ) ។