ផ្លូវជោគជ័យ
« ឱ ផែនការនៃព្រះរបស់យើងធំណាស់ហ្ន៎ » ( នីហ្វៃទី 2 9:13 ) ។
អំឡុងនិទារឃរដូវ ស្វាមីខ្ញុំ និងខ្ញុំបានចូលរួមក្នុងការលេងកីឡាបាល់ឱបចៅប្រុសយើង ដែលមានអាយុ 4 ឆ្នាំ ។ យើងមានក្ដីរំភើបខ្លាំងណាស់ នៅពេលចៅរត់គ្រប់ទិសដេញតាមបាល់នោះ ។ នៅពេលចុងបញ្ចប់ កញ្ចែបានផ្លុំឡើង អ្នកលេងទាំងនោះពុំដឹងថានរណាឈ្នះ ឬនរណាចាញ់នោះឡើយ ។ ពួកគេគ្រាន់តែលេងកំសាន្ដប៉ុណ្ណោះ ។
គ្រូបង្វឹកសុំឲ្យអ្នកលេង ចាប់ដៃជាមួយនឹងក្រុមដទៃ ។ បន្ទាប់មក យើងបានមើលឃើញអ្វីមួយដ៏អស្ចារ្យណាស់ ។ គ្រូបង្វឹករបស់ពួកគេបានប្រកាសពីផ្លូវជោគជ័យ ។
ឪពុកម្ដាយ យាយតា និងនរណាដែលបានមកមើលកីឡា បានក្រោកឈរឡើង ហើយបានឈរជាពីរជួរទល់មុខគ្នា ។ បន្ទាប់មកគេបានលើកដៃឡើងបង្កើតជាទ្វារកោងមួយ ។ កុមារទាំងឡាយបានសើច នៅពេលពួកគេរត់នៅក្រោមដៃរបស់មនុស្សពេញវ័យដែលអបអរ ហើយចូលតាមផ្លូវនោះ ។
មិនយូរប៉ុន្មាន កុមារមកពីក្រុមផ្សេងបានសម្រេចចិត្តចូលរួមសប្បាយដែរ ។ អ្នកលេងទាំងអស់បានទទួលការអបអរដោយមនុស្សពេញវ័យ នៅពេលពួកគេរត់តាមផ្លូវជោគជ័យ ។
នៅក្នុងគំនិតរបស់ខ្ញុំ ខ្ញុំអាចមើលឃើញរូបភាពផ្សេងទៀត ។ ខ្ញុំមានអារម្មណ៍ថា ខ្ញុំកំពុងមើលកុមារទាំងនេះ រស់នៅតាមផែនការរបស់ព្រះវរបិតាសួគ៌ ដែលបានបង្កើតសម្រាប់កុមារគ្រប់រូប ។ ពួកគេរត់នៅលើផ្លូវតូច និងចង្អៀត ក្រោមដៃរបស់មនុស្សដែលស្រឡាញ់ពួកគេ ។ កុមារម្នាក់ៗមានអារម្មណ៍រីករាយក្នុងការនៅលើផ្លូវនោះ ។
ព្រះយេស៊ូវគ្រីស្ទ បាន « គូសផ្លូវ ហើយដឹកនាំផ្លូវ » សម្រាប់យើងម្នាក់ៗ ។1 បើសិនជាយើងធ្វើតាមការដឹកនាំរបស់ទ្រង់ នោះយើងទាំងអស់គ្នា ត្រឡប់ទៅកាន់គេហដ្ឋានសួគ៌របស់យើង ហើយមានសុវត្ថិភាពនៅក្នុងព្រះហស្តរបស់ព្រះវរបិតាសួគ៌ ។