ពួកព្យាការីព្រះគម្ពីរសញ្ញាចាស់
អ័ដាម
« មានមនុស្សពីរបីនាក់បានចូលរួមដោយផ្ទាល់នៅក្នុងភាពអស់កល្បជានិច្ចក្នុងផែនការនៃសេចក្ដីសង្គ្រោះលើសពី…បុរសឈ្មោះអ័ដាម » ។1
មនុស្សភាគច្រើនស្គាល់ខ្ញុំថាជាបុរសទីមួយដែលរស់នៅលើផែនដី ប៉ុន្តែពុំដឹងថាខ្ញុំមានទំនួលខុសត្រូវពិសេសមួយពីមុនខ្ញុំមកកាន់ផែនដីនេះឡើយ ។ នៅជីវិតមុនផែនដី ខ្ញុំបានដឹកនាំទ័ពរបស់ព្រះច្បាំងនឹងទ័ពរបស់សាតាំងក្នុងសង្គ្រាមលើស្ថានសួគ៌2 ហើយខ្ញុំបានជួយព្រះយេស៊ូវគ្រីស្ទបង្កើតផែនដីនេះ ។3 ខ្ញុំត្រូវបានគេស្គាល់ថាជា មីកែល នៅពេលនោះ ដែលមានន័យថា ជាបុរសម្នាក់ « ដែលប្រៀបបាននឹងព្រះ » ។4
ព្រះបានជ្រើសខ្ញុំឲ្យធ្វើបុរសទីមួយនៅលើផែនដី ហើយបានដាក់ខ្ញុំនៅក្នុងសួនច្បារអេដែន ជាស្ថានសួគ៌លោកិយមួយដែលមានរុក្ខជាតិ និងសត្វគ្រប់ប្រភេទ ។ ទ្រង់បានផ្លុំ « ខ្យល់ដង្ហើមនៃជីវិត »5 ចូលទៅក្នុងខ្លួនខ្ញុំ ហើយបានប្រទានឈ្មោះថ្មីមួយឲ្យខ្ញុំថា ៖ អ័ដាម ។6
ព្រះទ្រង់បានប្រាប់ភរិយារបស់ខ្ញុំ អេវ៉ា និងខ្ញុំកុំឲ្យបរិភោគផ្លែឈើដឹងខុសត្រូវ ។7 ប្រសិនបើយើងមិនបរិភោគផ្លែឈើនោះ យើងអាចនៅក្នុងសួនច្បារនោះ ហើយរស់នៅជារៀងរហូត ប៉ុន្តែយើងនឹងមិនអាច « រីកចម្រើនដោយការដកពិសោធន៍នូវភាពផ្ទុយនៅក្នុងជីវិតរមែងស្លាប់ »8 ឬមានកូនចៅឡើយ ។9 ការជ្រើសរើសនោះគឺជាសិទ្ធិរបស់យើង ។
ដោយសារបានជ្រើសរើសបរិភោគផ្លែឈើនោះ យើងត្រូវបានចាកចេញពីសួនច្បារនោះ និងពីវត្តមានរបស់ព្រះ ។ នេះត្រូវបានស្គាល់ថាជាការធ្លាក់ ។ យើងបានក្លាយជាមនុស្សរមែងស្លាប់ ដកពិសោធន៍ទាំងសេចក្ដីល្អ និងសេចក្ដីអាក្រក់ក្នុងជីវិត ហើយបាននាំយកកូនចៅមកផែនដី ។10
ព្រះទ្រង់បានជ្រាបថា ការធ្លាក់នឹងកើតមានឡើង—ទ្រង់បានបញ្ជូនព្រះយេស៊ូវគ្រីស្ទឲ្យធ្វើដង្វាយធួនសម្រាប់អំពើបាបរបស់យើង ហើយយកឈ្នះលើសេចក្ដីស្លាប់ ដើម្បីឲ្យយើង និងកូនចៅរបស់យើងអាចត្រលប់ទៅរកទ្រង់វិញ ។11
អេវ៉ា និងខ្ញុំបានរៀនពីដំណឹងល្អនៃព្រះយេស៊ូវគ្រីស្ទ—រួមមានសេចក្ដីជំនឿជឿលើព្រះយេស៊ូវគ្រីស្ទ ការប្រែចិត្ត បុណ្យជ្រមុជទឹក ការទទួលអំណោយទាននៃព្រះវិញ្ញាណបរិសុទ្ធ និងការកាន់ខ្ជាប់ដរាបដល់ចុងបំផុត—ហើយយើងបានបង្រៀនការណ៍នោះដល់កូនចៅរបស់យើង ។12
ដោយសារតែបទពិសោធន៍របស់ខ្ញុំ ភ្នែករបស់ខ្ញុំត្រូវបានបើក ហើយខ្ញុំមានសេចក្ដីអំណរនៅក្នុងជីវិតនេះ ។13 សូមចងចាំថា អ្នកក៏អាចទទួលអារម្មណ៍ពីសេចក្ដីស្រឡាញ់របស់ព្រះ ហើយត្រលប់ទៅរកទ្រង់ផងដែរ ប្រសិនបើអ្នកដើរតាមព្រះយេស៊ូវគ្រីស្ទ14 ដូចជាខ្ញុំបានរៀនធ្វើវា ។
ពីខាងឆ្វេង ៖ រូបគំនូរដោយ ឌេន បាកស្ទើរ, Adam and Eve in the Garden ( អ័ដាម និង អេវ៉ា ក្នុងសួនច្បារ ) ដោយ ឡូវ៉ែល ប្រ៊ូស ប៊េណេត, Leaving the Garden of Eden ( ការចាកចេញពីសួនច្បារអេដែន ) ដោយ យ៉ូសែប ប្រ៊ីឃី, In Similitude ( និមិត្តរូប ) ដោយ យ៉ូសែប ប្រ៊ីឃី, Adam and Eve Teaching Their Children ( អ័ដាម និងអេវ៉ាកំពុងបង្រៀនកូនចៅខ្លួន ) ដែល ឌេល ផាសុន, Adam Ordaining Seth ( អ័ដាមតែងតាំងសេត ) ដោយ ឌេល ផាសុន, Adam-ondi-Ahman ( អាដាម-អុនដៃ-អាម៉ាន ) ដោយ ឌេល ផាសុន, The Archangel Michael Defeating Satan ( មហាទេវតា មីកែល កំពុងតតាំងនឹងសាតាំង ) ដោយ Guido Reni/Bridgeman Art Library/Getty Images, ផ្ទៃខាងក្រោយមកពី iStockphoto/Thinkstock