Etke im Ta eo Ij Aikuj Kōm̧m̧ane n̄an Kwaļo̧k BŪRUWŌ n̄an Bisop eo Aō?
Jipan̄ eok n̄an ukweļo̧k ej juon m̧ōttan eo eaorōk an kūr eo an juon bisop. Am̧ bōklōkōt enaaj jiron̄ eok n̄e kwoj aikuj in kōnono ippān.
Komaron̄ ļōmņak etke rej katakin eok bwe kwōn kwaļo̧k buruōm n̄an bisop eo am̧ ak branch būreejtōn eo n̄e kwar kōm̧m̧ani jerawiwi ko reļļap. Komaron̄ ba n̄an eok make, “Ta ukweļo̧k ejjab juōn men eo ikōtaō im Irooj ke? Eļan̄n̄e iaar bōjrak jen m̧wil nana eo aō im kar kwaļo̧ke n̄an Anij, etke ij aikuj kōnono ippān bisop eo aō?”
Pija ko kōmeļeļeik jen Christina Smith
Etke Bisop eo im Ejjab Bar Juon?
Elōn̄ jodikdik ro epidodolo̧k aer kwaļo̧k bōd ko aer n̄an ro jinier im jemeer ak ritōl ro an jodikdik ro. Men̄e ro jinemi im jememi im ritōl ro ami remaron̄ lewaj jipañ im kapilōk ko rekkar, Irooj eaar kwaļo̧k bwe bisop eo ej juon riekajet ilo Israel (lale D&C 107:72, 74). Ewōr an eddo n̄an kōmelet erreeo eo an ro uwaan ward eo an. Kōn kain̄i im mour jim̧we, bisop eo ej maron̄ bōk revelesōn jān Jetōb Kwojarjar ikkijien ro uwaan ward eo an, ekoba kwe.
Bisop eo emaron̄ jipan̄ kōn ukweļo̧k ilo wāween ko ro jinōm̧ im jemam̧ ak ritōl ro jet rejjab maron̄ lewaj. Eļan̄n̄e jerawiwi eo ebwe an ļap, emaron̄ kōmlet bwe jim̧we ko am̧ ilo Kabun̄ in rej aikuj in mo. N̄an waanjon̄ak, āinwōt m̧ōttan ukweļo̧k eo am̧, emaron̄ kajjitōk ippam̧ n̄an bōjrak jān bōk kwojkwoj eo ak kōjerbal priesthood eo ium̧win juon tōre. Enaaj jerbal ippam̧ im kōmlet n̄e kwoj bar erreeo n̄an bar jino m̧akūtkūt ko rekwojarjar.
Bisop eo am̧ enaaj kapilōk eok kōn ta eo kwōn kōm̧m̧ane n̄an kōkajoorļo̧k maron̄ eo am̧ n̄an jum̧ae kapo. Emaron̄ kōketak eok n̄an ekkatak juon unin kōnono an katak, āinwōt ukweļo̧k, innām n̄an kwaļo̧k ñan e ta eo kwar katak. Emaron̄ kajjitōk ippam̧ n̄an loļo̧k e kajjojo wiik n̄an riboot ewi wāween am̧ kaarmijjet eok make jen jōkjōk ro rekapopo.
N̄āāt eo Ij Aikuj Kōnono Ippān?
Komaron̄ in ļōmņak, “Men kein āinwōt rem̧m̧an, bōtaab ekōjkan aō maron̄ jeļā eļan̄n̄e ta eo iaar kōm̧m̧ane ebwe an ļap bwe in aikuj kōnono ippān bisop eo?” Uwaak eo ekadu: “Am̧ bōklikit enaaj jiron̄ eok.” N̄e kwoj en̄jake im̧we jān bōklikit eo am̧, kōm̧m̧ane ilo iien eo em̧ōkaj tata (lale Alma 34:31–34).
Ikkijien ukweļo̧k, Kiin̄ Benjamin eaar katakin, “Ij jab maron̄ ba n̄an kom̧ aolep men ko kom̧ maron̄ jerawiwi ie; bwe ewōr iaļ ko im wāween ko, em̧ool āindein elōn̄ bwe ij jab maron̄ bwini” (Mosaia 4:29). Kōn menin ijello̧kin leļo̧k juon tipdik in laajrak in men ko me kwoj aikuj kwaļo̧k n̄an bisop eo am̧, in kwaļo̧k jet pedped ko me naaj jipan̄ eok kōm̧m̧ane jokālet jab in.
Ta Eo Ij Aikuj in Kwaļo̧ke?
Ijeļā bwe kwar kajieon̄ in pokake, bōtaab bōlen kwar kōm̧m̧ane jet bōd ko—em̧ool jet bōd ko reļļap. Elōn̄ iaan bōd ko armej rej kōm̧m̧ani remaron̄ in ņa mejļaer kōn jar an juon make im ukweļo̧k em̧ool. Jet bōd ko, eļaptata ko ikkijien mour erreo, ej aikuj in kwaļo̧k n̄an bisop eo m̧okta jān am̧ maron̄ bōk jeorļo̧k bōd eo an Irooj.
Ilo am̧ ļōmņak kōn bōd ko kwar kōm̧m̧ani, komaron̄ en̄jake eliklik, ñak tōt, jab m̧ōņōņō, ak bar jab emman am mour. Eļan̄n̄e kwoj en̄jake jabdewōt iaan en̄jake kein, innām bōlen kwoj aikuj kōnono ippān bisop eo am̧ kōn bōd kein.
Jab kajieon̄ in kōm̧m̧an am̧ jekpen ņae ak jojomare am̧ bōd. Komaron̄ in ļōmņak, “Enaaj kanooj in kajookok n̄an aō jiron̄ bisop eo ta eo iaar kōm̧m̧ane. Ej ļōmņak ij juon armej em̧m̧anļo̧k jān in. Enaaj ilbōk eļan̄n̄e ij jiron̄ e ta eo iaar kōm̧m̧ane. Eban bar kōņaan n̄a.”
Ij kallim̧uri kwe ejjamin na ruōm. Āinwōt juon rikarejeran Irooj, enaaj jouj im meļeļe ilo an ron̄jake eok. Innām enaaj jipan̄ eok kōn laajrak eo an ukweļo̧k. E ej rikwoj meļan an jouj eo an Irooj n̄an jipan̄ erom erreo kōn Pinmuur eo an Jisōs Kraist.
Irooj eaar ba: Bwe n̄e juon armej ej ukweļo̧k, enaaj jeorļo̧k jerawiwi ko aer im jab bar keememeji n̄an jidik.
N̄an maron̄ ukweļo̧k jān jerawiwi ko ad, jej aikuj kwaļo̧ki im julo̧ki (lale D&C 58:42–43).
N̄e kwoj kwaļo̧k im jelļo̧k jen jerawiwi ko am̧, Irooj enaaj jeorļo̧k am̧ bōd. Kwoj jamin naaj kwaļo̧k n̄an E kōn jerawiwi kein n̄e iien eo enaj itok bwe kwōn ekajet.
Akō Ñe Ijjab Kwalok Būruō?
Jet iien juon armej enaaj bōjrak an kōm̧m̧an bōd bōtaab ejjamin naaj kwaļo̧k bōro, n̄āāt emenin aikuj, n̄an bisop eo an lio ak ļeo. Āinwōt juon kaje, armej eo ej wōnm̧aaņļo̧k wōt ilo bōk eddo eo an jerawiwi make, ijello̧kin kōtļo̧k bwe Rilo̧mo̧o̧r eo en bōk eddo eo.
In lewaj juon waanjon̄ak. Juon joten jet iiō ko remootļo̧k, iaar intōrpiuiki rūtto ro n̄an kōkāāl peba in mālim an tampeļ ko aer. Juon kōrā em̧m̧an dettan kar deļo̧n̄ tok n̄an intōrpiu eo an. Eaar m̧are ilo tampeļ im eaar niknik ilo Kabun̄ in aolepān mour eo an.
Iaar kile juon būrom̧ōj em̧wilaļ ilo an. Ke intōrpiu eo eaar wōnm̧aanļo̧k, iaar bōk juon im̧we ilo jetōb. Iaar kajjitōk ippān, “Sister, ewōr juon aō im̧we bwe kwar kōm̧m̧ane juon bōd eļap ke kwar juon jodikdik me kwar jab kwaļo̧ke n̄an juon ritōl an priesthood. Kwōj ke m̧ōņōņō in jiron̄ eō kake?”
Em̧ōkaj an jino kar jan̄. Eaar jiron̄ eō bwe em̧ool, bōtaab iien otemjej eaar kanooj jook in kwaļo̧k n̄an juon bisop. Ke eaar kwaļo̧k ta eo eaar kōm̧m̧ane, eaar kwaļo̧k ebwe meļeļe ko n̄an n̄a n̄an aō kōm̧m̧ane juon jem̧ļo̧k kōn erreo eo an.
Kwaļo̧k jerawiwi eo an n̄an juon ritōl an priesthood eaar kōkaļļeik jem̧ļo̧k in ukweļo̧k eo an ijello̧kin ijjino eo. Ear ineke eddo in im buromōjim jerawiwi in elōñļo̧k jen 30 iiō ko.
Kōnke eaar kadedeļo̧k bun̄tōn eo āliktata ñan ukweļo̧k, emōj bikirļo̧k bōd in an. Ekōn emakijkij aō lo e ālkin bon̄ōn kar intōrpiu eo. Paotokin eaar meramļo̧k, im eaar m̧ōņōņō.
Ikōņaan bwe kwon jeļā bwe ijjab keememej etan. Irooj emaron̄ kōm̧akūt kain ememļo̧kjeņ rōtin jān bisop ro. Ta eo ij kememej ej bwe kōn kwaļo̧k buruōn n̄an ritōl an priesthood eo an, kōrā in em̧m̧an dettan eaar bōjrak jān an eñjake eliklik in bōd ko me eaar ineeki elōn̄ iiō ko.
Jouj jab kōm̧m̧ane bōd in. Eļan̄n̄e kwoj en̄jake eliklik bōtaab kwojjab jeļā eļan̄n̄e kwoj aikuj in kwaļo̧k buruōm n̄an bisop eo am̧, loļo̧k. Kōtlo̧k an jipan̄ eok. Jab ineek juon eddo eo kwōjjab aikuji ilo mour eo am̧, eo enaaj kōm̧m̧an an nana am̧ mour. Ilo am̧ kwaļo̧k buruōm n̄an bisop eo im am̧ ukweļo̧k, Irooj enaaj bōk eddo jab in jān aam̧ (lale Aiseia 1:18).
Etke Ij Aikuj in Ukweļo̧k?
Jisōs Kraist eaar kōļļāik wōņāan jerawiwi ko an aolep armej kōn en̄taan in pinmuur eo An. Ej kūr eok n̄an ukweļo̧k im joļo̧k būrom̧ōj ko im en̄taan ko. Eaar jiron̄ kōj n̄an ukweļo̧k n̄e jaab en̄taan ko ad naaj metak—ewi jon̄an aer metak jej jab jeļā, ewi jon̄an ekkan̄ in jej jab jeļā, ewi jon̄an pen in ineeke jej jab jeļā.
Jisōs eaar ba bwe eaar en̄taan kōn men kein n̄an aolep bwe ren maron̄ jab en̄taan eļan̄n̄e renaaj ukweļo̧k.
Ak eļan̄n̄e rej jab ukweļo̧k rej aikuj en̄taan em̧ool āinwōt Iaar, …
Kōn menin, Ij ba ñan kwe bar juon alen bwe kwon ukweļo̧k, … im bwe kwon kwaļo̧k jerawiwi ko am, ijello̧kin ñe kwōkkōnaan eñtaan kin kaje kein me iaar kenono kaki. (lale D&C 19:15–17, 20).
Ij kam̧ool bwe kōn en̄taan eo An, Jisōs Kraist em̧ōj kadede an kar kōļļāik wōņāan jerawiwi ko am̧. Komaron̄ jeorļo̧k am̧ bōd to̧o̧n wōt am̧ ukweļo̧k. Jab kajieon̄ kōļļāik wōņāān jerawiwi ko am̧. Ejjeļo̧k jon̄an am̧ make eñtaan enaaj lo̧mo̧o̧ren eok; ej kōn Pinmuur eo wōt kwoj bōk jeorļo̧k bōd.
Kōm̧m̧an bwe kwon kōjerbal tōmak eo am̧ ilo Jisōs Kraist im Pinmuur eo An. Ij kam̧ool ilo etan Jisōs Kraist bwe kōn ukweļo̧k, ekoba kwaļo̧k m̧ool n̄an bisop eo am̧ n̄e ekkar, kwonaaj erreo. Ilo kakobaba, kōn meanwōd eo an Rilo̧mo̧o̧r—An kajoor in kemāroñ—komaron̄ kajoorļo̧k ilo maron̄ jum̧ae kapo ilo ilju im jekļaj. Kōn menin, enaaj wōr am̧ aenōm̧m̧an in ļōmņak im m̧ōņōņō ilo mour in, im kwonaaj jolet mour indeeo ilo lal eo ej itok.