Juon Bo̧o̧k in Pija

Cindy Heggie, Alberta, Canada

Jet iiō rem̧ootļo̧k ļeo ippa im n̄a kar julo̧k kobej ko ilo jikin jokbej eo ke iaar kile bwe juon iaan kōrā ro ej jerbal ijeņ ebōk bo̧o̧k eo im likūti ilo kein meme kobej eo. Ejab to ar rup bo̧o̧k eo im peļļo̧k, im jet pija raar wōtļo̧k.

Ke ij reiļo̧k, eaar wōr aō en̄jake eļap bwe in etal im bōk bo̧o̧k in pija ko. Iaar kelo̧k jān wa eo im jipan̄ aini pija ko. Kōrā eo im n̄a kar jim̧or en̄jake bwe pija ko eaar bōd aer juļo̧ki, im Iaar kwaļo̧k m̧ool n̄an e bwe ij būki pija ko n̄an kajieon̄ n̄an pukot ro rekōņaan nejier.

Etale aolep bukwi pija ko ilo bo̧o̧k eo, Iaar lo juon envelope ej jeje n̄an juon ilo Warburg, Alberta, Canada. Ilo iiō ko tok jet, Iaar je jet leta n̄an armej ro kōn ejja āt eo wōt, ak iaar jab bōk uwaak.

Ālkin an baam̧le eo aō maron̄ deļo̧n̄e Intōrnet, Iaar lo bwe ewōr juon history society ilo Warburg. Iaar kajjitōk eļan̄n̄e ewōr ej jerbal ijo ejeļā kajien āt ko Iaar loi ilo likin pija ko.

Juon allōn̄ tok ālik kōm̧ ar bōk juon kūr jān juon em̧m̧aan eo kar tōpare jen historical society. Eaar ba sister eo an ej jokwe epaake kōm̧, im eaar ba ekōņaan loi pija ko. Aaet kōm̧ ar ba em̧m̧an.

Raan eo juon, Floyd im Beth Hawthorn, erro jim̧or Armej ro Rekwojarjar, raar itok im lali pija ko. Ke ij kōpeļļo̧k bo̧o̧k eo, Brother Hawthorn eaar ba, “Ekwe, en̄in ej,” jitōn̄ļo̧k itulōn̄ in pija eo. Eaar pija in jim̧m̧an Sister Hawthorn.

Ke rej lali kajjojo pija, Būratōr im Sister Hawthorn raar jiron̄ kōm̧ bwebwenato ko kōn kajjojo armej ro ilo pija eo. Hawthorn ro raar lōmņak remaron̄ epaake armej eo eaar jūlo̧ki pija ko, im ejjeļo̧k aer jeļā etke pija ko raar pād ilo jikin jokbej eo.

Iaar en̄jake eļap bwe Jemedwōj Ilan̄ eaar jipan̄ eō kōro̧o̧ltok pija ko n̄an baam̧le eo an Hawthorn. Ij kam̧ool bwe jerbal in menmenbwij ej juon iaan jerbal ko raorōk n̄an kadedeļo̧k. Eļan̄n̄e eitok lim̧oid n̄an kōm̧m̧ane jerbal in, Irooj enaaj jipan̄ kōj kōm̧m̧ane.