Kōm̧kajļo̧k Jerbal in Lo̧mo̧o̧ren in
Ilo ad karuwaineneik, iakwe, im jerbal n̄an ro jet, jej erom rikaļoor ro rem̧ool an Jisōs Kraist im jipan̄ kōm̧kajļo̧k jerbal in lo̧mo̧o̧r.
Mekarta ewōr ikdelel kōn mijenede ro rej jerbal aolep raan jerbal ilo internōt im kōm̧m̧an kalojooj ko ilo imōn jar ko, oktak kein rej jidik in wōt m̧ōttan pija in ekilep an jerbal in lo̧mo̧o̧r. Men eo eaorōkļo̧k ej ewi wāween an membōr ro ekkejeltok ilowaan pija in ekilep an kōm̧kajļo̧k jerbal in lo̧mo̧o̧ren in. Jab kajjitōk ippād n̄an pād ilo juon būrookraam̧ ekāāl. Em̧ōj baj rōjan̄ kōj n̄an erom rikaļoor ro rem̧ool an Jisōs Kraist. Eddo eo ad ej n̄an kōjadeik kōj make ilo iakwe im jipan̄ ro peļaakid—kainōm̧m̧an juon m̧ōttad rijerbal epād ilo aikuj, karuwaineneik ro m̧ōttad n̄an juon peptaij, jipan̄ juon rūtto ipeļaakid kōn jerbal ko an ilo itōrerein m̧weo, karuwaineneik juon membōr ejaniknik n̄an juon iien m̧ōn̄ā, ak jipan̄ juon ipeļaakid kōn menmenbwij eo an. Men kein rekitbuuj aolep, wāween ko rekam̧ōņōņō n̄an karuwaineneiktok membōr ro rejaniknik im ro rejjab jen tōmak in ad n̄an mour ko ad im eļaptata n̄an lowaan meram in ko̧jpeļ in. Iaio ippāer ilo iien ko rekam̧ōņōņō im iien ko rekwojarjar ilo mour ko ad emaron̄ erom wāween eo ewājepdik jabdewōt iaad emaron̄ jerbale ilo jikin kallib in an Jisōs Kraist n̄an lo̧mo̧o̧ren jetōb ko an em̧m̧aan ro im kōrā ro (D&C 138:56).
Ta in Jerbal in Lo̧mo̧o̧ren?
Jemedwōj Ilan̄ eaar kwaļo̧k bwe jerbal in lo̧mo̧o̧r in ej bōktok mour jab wabanban im mour indeeo an armej (Lale Moses 1:39). Jerbal in eaorōk ekoba jerbal in mijenede, kōkajoorļo̧k rioktak ro, kōro̧o̧ltok membōr ro rejaniknik, jerbal an tampeļ im menmenbwij an baam̧le, im katakin ko̧jpeļ eo.1 Elukkuun emmakijkij, ad ļōmņak bwe jekjek kein an ko̧jpeļ rej jab epaakedoon. Ak ilo Jerbal in Lo̧mo̧o̧ren in: Kadiwōjļo̧k eo an Ritōl Aolepān Laļ in ilo Juun 23, 2013, Elder Russell M. Nelson jen Doulul eo an Jon̄oulruo Rijilōk ro kar katakin bwe “jerbal in elukkuun in jenolo̧k. Kijejeto kein rej jab jenolo̧k; rej aolep m̧ōttan jerbal in lo̧mo̧o̧ren in.”2
Naan eo “Kōm̧kajļo̧k Jerbal in Lo̧mo̧o̧ren in”—ej etan website eo diwōjļo̧k ilo mejatoto (hasteningthework.lds.org)—kōnono kōn kalim̧m̧ur eo an Irooj: eo Enaaj kōm̧kajļo̧k jerbal eo An ilo iien eo (lale D&C 88:73).
Kain̄i ko raorōk an priesthood—peptaij, kapen, ekkapit n̄an priesthood eo n̄an em̧m̧aan ro, im kain̄i ko an tampeļ—rej jutak āinwōt iien ko raorōk ilo iaļ ko ad n̄an ro̧o̧lļo̧k n̄an Jemedwōj Ilan̄. Ilo ad bōk kuņaad ilo jerbal in lo̧mo̧o̧ren in, jej ļoor im im̧we ro jet n̄an ļoor iaļen bujen in.
Membōr ro im Mijenede ro rej Jerbal Ippān Doon ium̧win Kii ko an Priesthood
Iien eo emoottok n̄an bar lukkuun ļōmņak kōn pedped eo eaorōk eo ej membōr ilo Kabun̄ in an Irooj meļeļe n̄an kūr n̄an lukkuun pād ilo jerbal in lo̧mo̧o̧ren in An. Stake būreejtōn ro im bisop ro rej kabwijer kii ko an priesthood kōn jerbal in mijenede ilo iunit ko an Kabun̄ in3 im jipan̄ membōr ro an Kabun̄ in kōm̧m̧ane ta eo rikaļoor ro rem̧ool an Kraist rej kōm̧m̧ane—kwaļo̧k meram eo an ko̧jpeļ eo. Mijen būreejtōn ro rej kabwijer kii ko an priesthood eo ej leļo̧k aer maron̄ tōl jerbal in an mijenede ro rej tōl er.4 Mijenede ro rej jerbal aolep raan rej kamminene n̄an katakin ro raar pojak n̄an bōk ko̧jpeļ eo. Rej jipan̄ membōr ro kōn jerbal in mijenede, jab oktak. Mijenede ro rej jerbal aolep raan rej barāinwōt m̧ōttā ilo bōktok ko̧jpeļ eo n̄an mour ko an ro Irooj eaar kōpooj er n̄an bōke.
Ilo kadiwōjļo̧k eo imejatoto, Būreejtōn Thomas S. Monson eaar ba: “Kiiō ej iien eo n̄an an membōr ro im mijenede ro itok ippān doon, n̄an jerbal ippān doon, n̄an jerbal ilo jikin kallib an Irooj n̄an bōktok jetōb ko n̄an E. Eaar kōpooj jipan̄ ko n̄an kōj n̄an kwaļo̧k ko̧jpeļ eo ilo juon inelep in wāween ko, im E enaaj jipan̄ kōj ilo jerbal ko ad eļan̄n̄e jenaaj m̧akūtkūt ilo tōmak n̄an kakūrm̧ool jerbal eo An.”5
Elder Neil L. Andersen jen Doulul eo an Jon̄oulruo Rijilōk eaar kōnono kōn aorōk in iakwe. Eaar ba, “Jej jerbal ippān doon kōn tōmak im ippān doon—tōmak bwe Irooj enaaj tōl iaļ ko ad. Kuktok ippān doon im ippān mijenede ro, aolep iien kōjparok iakwe eo n̄an E, n̄an bar juon im n̄an ro jet jej jerbal n̄an er.”6
Ward Ko̧o̧njeļ ko Rej Tōl, Ritōl Mijen an Ward ro rej Kōpeļaake
Ium̧win tōl an bisop eo, ward ko̧o̧njeļ ro, rej jipan̄ im lale kijejeto ko an membōr ro ilo ward eo kōn karōk im kōjjekiik jerbal in lo̧mo̧o̧r n̄an ward eo.7
Āinwōt juon membōr in ward ko̧o̧njeļ eo, ritōl an mijen ilo ward “ej kōpļaake jerbal ko n̄an kappok, katakin, im peptaiji rikkatak ro. Ej kōpļaake jerbal in ippān jerbal eo an mijenede ro rej jerbal aolep raan.”8
Kōnono n̄an ritōl ro an mijen ilo ward, Elder Nelson eaar ba: “Jipan̄ kane bok in karōk ko aer kōn iien ko rowāppen, bwe ej jab wōr iien rej aikuj kōļaļļaļ ilo kōjem ko n̄an kappok armej n̄an katakin er. … [Kom̧] rej ikōtaan mijenede ro, ward ko̧o̧njeļ eo, im membōr ro an ward eo.”9
Jon̄ak eo Em̧ool an Wājepdik
Āinwōt Armej ro Rekwojarjar ilo Raan-ko Āliktata jej jeram̧m̧an n̄an mour ilo iien in Irooj ej kōm̧kajļo̧k jerbal in An. Kōnke Anij ewōr an kōttōpar ilo likūt kōj ioon laļ ilo tōre in, ewōr ad kajoor n̄an kōm̧m̧an eļapļo̧k jen ad ļōmņak ke jemaron̄. Toon wōt ad pukōtļo̧k kōn jouj im iakwe n̄an ro rej aikuji jem̧jerā eo ad im jipan̄, jeban likjab. Jeram̧m̧an an mijenede ej itok jen ļoor im̧we eo ej ibeebtok ilo kōļmenļo̧kjeņ ko ad im būruwōd im karuwaineneik ro jet n̄an mour in kūrijin ko ad. Karuwainene eo ej kōkkaļļe in jeram̧m̧an, ejjab n̄e armej rej peptaij ak niknik ilo Kabun̄ in. Āinwōt an Elder Jeffrey R. Holland jen Doulul eo an Jon̄oulruo Rijilōk ro kar ba kōn jarin ritariņae eo eļap an mijenede ro kiiō rej deļo̧n̄eļo̧k jikin mijen ko: “Tōre in epād ippād ilo ad kiiō ba, ‘Rem̧oot tok.’ Kōj aolep aikuj karōk im kōjerbal jipan̄ in jilkintok jen lan̄ ilo wāween eo ekkartata.”10
Eiien kiiō n̄an adwōj meļeļe eļapļo̧k kōn jerbal eo ad ilo kōm̧kajļo̧k jerbal in lo̧mo̧o̧ren in. Ilo ad kōm̧m̧an jerbal in mijenede, kōkajoorļo̧k rioktak ro, kōro̧o̧ltok membōr ro rej janiknik, jerbal an tampeļ im menmenbwij an baam̧le, katakin ko̧jpeļ eo juon m̧ōttan eaorōk an mour ko ad, jenaaj en̄jake eļap lan̄lōn̄ im bōk iood menin letok ko an jetōb ko jej aikuji n̄an kōkajoorļo̧k Kabun̄ in ilo epepen in kein 21.
Kōmeļeļe in pija jen David Stoker
Kōmeļeļe ko an pija jen John Luke im Cody Bell