Baj Ettōn̄ im Ba Jaab
Rijeje eo ej jokwe ilo Metro Manila, Philippines.
Iaar kowaan kajjitōk ko n̄an idaak dān in kadōk, bōtaab kiiō būreejtōn eo an kom̧bani eo eaar letok n̄an eō juon kab in wain.
Kōmeļeļe jen Sudi McCollan
Juon jōm̧m̧ar, iaar bōk kuņaō ilo juon iien ekkatak ilo juon āne ilo Bicol, Philippines. Ilo lale lojet eo eaar aiboojoj, im iaar reim̧aanļo̧k n̄an kajjojo jibbon̄.
Iaar m̧ijak aolep jota, mekarta. Ej tōre eo armej ro ilo kāām eo raar jino idaak dān in kadōk im kōm̧m̧ani bade ko. Kūr ko n̄an bade ko raar emakijkij, im rijikuuļ ro jet m̧ōtta im ña kōmij kar aikuij pād ie, kōnke enaaj kar jaje ņae ñe kōm kar jab kobaļo̧k.
Bade eo m̧oktata kar juon bade in karuwaineneik rijikuuļ ro rekāāl. Iaar mijak n̄an pād ie, kōnke iaar lukkuun jeļā bwe renaaj kar letok n̄an kōm dān in kadōk im iaar jab jeļā ewi wāween jab bōke. Iaar kūr juon m̧ōtta ilo ward eo aō, im eaar litok jet naan in kapilōk ko rem̧m̧an me raar kōļapļo̧k lōke eo aō.
Ke bade eo eaar ijjino, raar letok n̄an kōm dān in kadōk ko, bōtaab, em̧m̧an bwe, raar jab kiel kōm n̄an idaak. Kōnke rijikuuļ ro jet m̧ōtta raar kile ke ikar dim im jab idaak, kaarmijjet eō jen idaak dān in kadōk eaar kiiō pidodo n̄an n̄a—m̧ae juon bon̄. Ilo juon iaan bade ko, būreejtōn eo an kom̧bani eo eaar itok. Eaar bōktok ippān juon bato in lambanog (juon wain kōm̧m̧an in ijo wōt jān nii). Ejjab to ālkin an jikrōktok, iaar lo an tein̄ jidik wain. Innām eaar ba, “Kwoj aikuj katak wāween idaak” im kar letok kab kūlaj eo n̄an juon iaan rijikuuļ ro. Liin eaar m̧ōkaj an idaake.
Būruwō eaar jino kajoor an bam̧. Ejjab to enaaj baj n̄a. Iaar unojdikdik n̄an n̄a make, “Ijjamin naaj idaake. Ijjamin naaj idaake.” Innām iaar lo an būreejtōn eo letok kab kūlaj in wain eo n̄an n̄a. Iaar jab jeļā ta eo n̄an kōm̧m̧ane. Rijikuuļ ro m̧ōtta raar kalimjōk eō, kōttar n̄an lale ta eo inaaj kar kōm̧m̧ane. Iaar ettōn̄ n̄an būreejtōn eo im ilo ettā ba, “Joļo̧k bōd, sir, bōtaab ijjab idaak dān in kadōk.”
Iaar jeļā eaar inepata. Eaar kajjitōk etke ijjab idaak dān in kadōk. Iaar ba, “Ij juon Mormon.”
Eaar ba, “Ijjan̄in kar ron̄ kōn kabun̄ jab in. Ej āinwōt juon in kain m̧ōn̄ā.” Aolep raar ettōn̄.
Iaar ettōn̄ barāinwōt, jab kōnke kōn kōm̧m̧an kōjak eo an ak kōnke iaar jeļā iaar kōm̧m̧ane men eo ejim̧we.
Ejjeļo̧k juon eaar bar n̄an jidik letok n̄an eō juon dān in kadōk. Bōtaab kajirere eo eaar jab jem̧ļo̧k, em̧ool jān ro m̧ōtta make. Juon eaar ba bwe iaar riab im bwe ej juon menin kabwilōñlōñ bwe ro uwaan Kabun̄ in rejjab kadōk. Ilo tōre in iaar en̄jake aeiōr ko rej waļo̧k n̄an ro uwaan Kabun̄ in.
Aō pād ioon āne eo kar katakin eō elōn̄ katak ko, ejjab wōt ilo jikuuļ ak ilo jetōb. Iaar katak bwe kajirere ejjamin bōjrak, bōtaab Jetōb eo an Irooj enaaj iien otemjej tōl kwe n̄an kōm̧m̧ane ta eo ejim̧we.