Matu Enaaj ke Ro̧o̧ltok?

Name withheld

Ewōr juon kurup in likao ro rekajoor ilo ward eo am, bōtaab ļaddik eo nejūm̧ Matu ar jino leia ippān juon eo ejjab uwaan kabun̄ in eo ar kwaļo̧k an kōņaan ilo wa ko im jabdewōt kein mechanic. Ejerata, ļaddik in eaar itok jān juon baam̧le eo ejjeļo̧k aorōk in kabun̄. Jinen im jemen raar akōtļo̧k an kadōk im kōbataat ilo m̧weo im̧weer im kar jab tōmak bwe mour erreeo eaorōk.

Matu eaar bōk rāān̄ eo ilōn̄tata ilo Jikaut, bōtaab ar jab pād ilo iien eo en kar bōk nōbar eo an kōnke eaar bōjrak an mour kōn jon̄ok ko an Jikaut. Iaar kobaik aolep nōbar ko ilo Jikaut im iaar kōm̧m̧ane juon nien. Innām iaar kakoņe, kōtmene bwe juon raan enaaj aorōk n̄an e. Ilo tōre eo eaar 16, Matu eaar kōbataat, kadōk, im bōk uno ko rekajoor. Eaar jako an jikuul im eaar jokwe ippān leddik eo jeran. Kōn ruo iiō rem̧ootļo̧k, kōm̧ ar jab maron̄ loe.

Kōm̧ ar aol. Kōm̧ ar jab jeļā eļan̄n̄e en kar ro̧o̧ltok n̄an baam̧le im tōmak eo an, bōtaab kōm̧ ar jokālet n̄an lo̧o̧r waanjon̄ak eo an Alma n̄an etale ļaddik eo nejūm̧ ejako. Alma eaar wōnm̧aanļo̧k wōt im iakwe ļaddik eo nejin im kar jar kōn tōmak bwe en maron̄ “itok n̄an jeļā kōn m̧ool eo” (Mosaia 27:14).

Eaar emakijkij am̧ jar bwe Irooj en kōjeram̧m̧an mour eo an Matu, im kōm̧ ar bōk kajjojo iien em̧m̧an n̄an kwaļo̧k naan in kam̧oolol im jerbal ewi jon̄an am iakwe e. Ke ej itok n̄an m̧weo, kōm̧ ar jab ba jabdewōt bwe emaron̄ ba kōm̧ij ba ņae ak ekajet e. Kōm̧ ar kwaļo̧k am m̧ōņōņō ke kōm̧ij loe.

Juon raan Matu eaar itok n̄an m̧weo im ba ekōņaan kōnono. Eaar ba ar ioon juon leddik ilo bade eo eo ewōr kajjitōk ko kōn Kabun̄ in. M̧okta jen an maron̄ jiron̄ e bwe ejjab jeļā uwaak ko, naan ko raar jino diwōj jān lo̧n̄iin. Eaar make uwaaki kajjitōk ko eaar kajjitōk mōkaj jon̄an an maron̄ ke eaar kajjitōk kaki ippān. Matu eaar ba eaar jab kememej an jeļā men ko ar kōnono, bōtaab eaar jeļā naan ko an rem̧ool. Eaar bwilōn̄ etke ej mour wōt men̄e ej tōmak wōt ko̧jpeļ in.

Ālkin kōļmenļo̧kjeņ em̧wilaļ (ilo an) kōn jilu raan ko, eaar kālet n̄an likūt mour eo ilik me ej tōl e. Eaar ro̧o̧ltok n̄an m̧weo im kajjitōk jipan̄ n̄an jino bar mour kōn ko̧jpeļ in.

Matu eaar kūr eo rilikin ilo bar juon laļ eo im ar anjo̧ ioon ejja kain apan̄ kein im kar kajjitōk eļan̄n̄e emaron̄ in jokwe ippān. Eo rilikin ar errā, im Matu ar jino pād ilo kweilo̧k ko an Kabun̄ in ippān im ioon bisop eo n̄an bōk jipan̄ ilo iaļen ukwelo̧k. Eaar en̄jake iakwe im jipan̄ im ar jino niknik ilo Kabun̄ in.

Ilo tōre eo ej ellā eaar ioon juon jiron̄, eiaboojoj. Raar kōņaan doon im raar m̧are ilo tampeļ eo.

Ke ajri eo m̧oktata nejier ar lo̧tak, Iaar lo̧ļo̧k im bōkļo̧k nine eo iaar kōm̧m̧an kōn nōbar ko an ilo Jikaut. Eaar m̧ōņōņō im laudin̄din̄ katotoiki ilo juon jikin ilo im̧weo im̧ōn.

Juon enjeļ eaar jab waļo̧k n̄an ļaddik eo nejūm̧, āinwōt an kar waļo̧k n̄an Alma eo Edik. Bōtaab Matu eaar jepļaaktok n̄an m̧ool eo āinwōt juon kabwilōn̄lōn̄.