Iaar Pād Kapijuknen

Steven Sainsbury, California, USA

Āinwōt m̧ōttan juon būrojāāk in jipan̄, Iaar etal n̄an Rwanda ippān ļo̧k jet taktō n̄an jipan̄ armej ro ilo Rwanda. Ālkin ruo wiik ko, epaake ļo̧k jem̧ļo̧kin tūreep eo aō, iaar jino o̧o̧n̄ kōn baam̧le eo aō. Iaar o̧o̧n̄ kōn baam̧le eo aō, peet eo aō em̧m̧an, im m̧weo im̧ō.

Ilo Jabōt eo āliktata ilo Africa, iaar maron̄ in karōk jikejuul eo aō bwe in maron̄ pād ilo jar. Men̄e Kabun̄ in eaar jab lukkuun in emejaja ilo Rwanda, Iaar maron̄ in lo juon iien kweilo̧k im wāween jineet ko ilo website eo an Kabun̄ in.

Im ta kar wāween jineet ko: “Etal laļ ļo̧k ilo cobblestone iturājet jān Ministry building eo. Pukot juon kōjem̧ epeļļo̧k. Innām ļoor iaļ eo.”

Ke ij ļoor wāween jineet kein, Iaar jino ron̄ al ko iaar lukkuun jeļā. Iaar etal jān iaļ eo, im naan ko kōn “Bedbed Eo E Bin” (Al, no. 5) ar tōpar lo̧jiln̄ū. Iaļ eo ar jem̧ļo̧k ilo em̧ eo edik, ijo lōn̄ in armej ro rej ettōn̄ dikdik ipeļaakin jikin deļo̧n̄ eo. Men̄e iaar juon ruwamejet n̄an jarlepju eo, Iaar en̄jake āinwōt ij m̧ōttaer. Jon̄oulruo ro jeid im jatid ilo Rwanda raar wōnm̧aantak im idik peiū, im ke rej kōm̧m̧ane, juon eddodo in ajimakeke ar makutļo̧k—Iaar pād kapijuknen!

Deļo̧n̄e im̧weo, Iaar pād ilo ilo kweilo̧k eo jilu awa me eaar jab oktak jān ward eo aō ilo California. Rikabwijer ro ilo Priesthood eo an Aaron raar letok-letak kwojkwoj eo, kōnono ko raar io̧lepen Rilo̧mo̧o̧r, im barāinwōt katak eo ilo Jabōt Jikuul eaar ejja katak eo ilo ward eo aō wiik eo ļo̧k.

Men eo eaorōktata, Iaar lukkuun en̄jake Jetōb in Irooj ilo kweilo̧k ko. Ealikar, bwe Irooj eaar m̧ōņōņō ippān armej rein rem̧m̧an me rej kajieon̄ ijo em̧m̧an ippāer n̄an jerbal n̄an E. Iaar jeļā bwe ilo iiō eo ļo̧k, juon wōt rijipan̄ n̄an Armej in Rwanda ro ar pād ilo kweilo̧k eo ijin. Iaar bwine elōn̄ļo̧k jen 100 armej raar pād, jimettan in er rej ajri.

Kiiō Rwanda em̧ōj aer kōpeļļo̧k jerbal in mijenede, Ijeļā bwe mijenede ro renaaj lo eļap tōprak ilo an Jetōb kam̧ool n̄an kōļapļo̧k oraņ rikatak ro an Rwanda bwe jepļaaktok in Kabun̄ ej aelōn̄ in kiin̄ eo an Anij ilo aolepen laļ in—n̄an kajjojo laļ, n̄an kajjojo armej, im n̄an kajjojo ro nejin Anij. Ewi jon̄an aō m̧ōņōņō kōn Kabun̄ in, men̄e ewaļo̧k ilo central coast in California ak ilaļļo̧k ilo cobblestone ilo central Africa.