Erom juon Mijenede an Kwaļo̧k Ko̧jpeļ eo Aō
Jān juon ennaan in nokon kar letok ilo Jikin Kaminene an Mijenede ilo Provo ilo Juun 24, 2011.
Komaron̄ kōm̧m̧ane men in! Irooj eo kwoj bōk jikin im jerbal n̄an e ejeļā komaron̄ kōm̧m̧m̧ane menin. Ijeļā komaron̄ kōm̧m̧ane menin.
Juon Rijilōk ej m̧oktata, ļaptata, im iien otemjej juon mijenede. Kōn un jab in, eļaptata ij m̧ōņōņō in kwaļo̧k n̄an kom̧ āinwōt rijerbal ro m̧ōtta ilo jerbal in ekabwilōn̄lōn̄ ilo raan-ko āliktata.
Ta in Mijenede ej Kwaļo̧k Ko̧jpeļ eo Aō?
Juon mijenede ej Kwaļo̧k Ko̧jpeļ eo Aō ej juon rikarejeran Irooj, kar kūr kōn kanaan im kōmālimi kōn likit pā ko ioon, eo ej kwaļo̧k ko̧jpeļ eo an Rilo̧mo̧o̧r indeeo im kar kōjepļaaktok ilo wāween eo An (lale D&C 50:13–14, 17–24; D&C 68:1).
Un leplep eo an juon mijenede kar kōmeļeļeik ilo Preach My Gospel eo ej n̄an “karuwaineneik ro jet n̄an itok n̄an Kraist kōn jipan̄ er bōk ko̧jpeļ eo kar kōjepļaktok kōn tōmak ilo Jisōs Kraist im Pinmuur eo An, ukweļo̧k, peptaij, bōk menin letok eo an Jetōb Kwojarjar, im niknik n̄an jem̧ļo̧k in.”1
Eddo eo ekwojarjar n̄an kwaļo̧k ilo mālim ko̧jpeļ eo im kōm̧m̧ani kain̄i in lo̧mo̧o̧r ko em̧ōj aer jerbal jān ke kar kadiwōjļo̧k Adam jān Jikin Kallib in Eden im naaj wōnm̧aanļo̧k wōt m̧ae “Jeova Eļap enaaj ba jerbal eo ededeļo̧k.”2
Menin Aikuji n̄an Erom Mijenede ro rej Kwaļo̧k Ko̧jpeļ eo Aō
Ikōņaan ekōnono kōn ļalem men ko aikuji im̧aantata n̄an erom Mijenede ro rej Kwaļo̧k Ko̧jpeļ eo Aō.
Menin aikuj #1: Mijenede ro rej Kwaļo̧k Ko̧jpeļ eo Aō remeļeļe bwe rej jerbal im jutak kōn Jisōs Kraist.
Mijenede ro rej Kwaļo̧k Ko̧jpeļ eo Aō rejeļā im meļeļe wōn eo rej jutak ilo etan, im ta eo rej kōm̧m̧ane. Mijenede ro rej jerbal aolep-raan rej kūr n̄an jerbal im kōjeno̧lo̧k er ilo jejjet im rej itok ilo etan Irooj Jisōs Kraist. Kōmij kam̧ool kōn Etan im kōn m̧ool eo an, kwojarjar eo, im kōttōpar eo an Jisōs Kraist n̄an aolep laļ, bwij, lo, im armej (lale D&C 133:37).
Kōmij Iakwe Irooj. Kōmij jerbal n̄an E. Kōmij ļoor E. Kōmij jutak kōn E.
Jibadbad ko An rej aikuj bar am jibadbad. Kōnaan ko An rej aikuij bar am kōnaan. Jerbal eo An ej aikuj am bar jerbal. Wāween ko An rej aikuj wāween ko am. An Kilaan ej aikuij ļapļo̧k an bar erom an kilaam.
Āinwōt ro rej itok ilo kilaan Rilo̧mo̧o̧r eo, jej kwaļo̧k pedped in katak ko im jekjek ko an ko̧jpeļ eo kar kōjepļaaktok ilo pidodo im alikkar. Jej jab kwaļo̧k ļōmņak ko ad make ak kajidede. Jej kwaļo̧k im kam̧ool kōn m̧ool eo kar kōjepļaaktok ilo alikkar ilo wāween eo an Irooj im kōn kajoor eo in Jetōb eo An.
Mijenede ro rej Kwaļo̧k Ko̧jpeļ eo Aō remeļeļe bwe eddo eo n̄an bōk jikin Rilo̧mo̧o̧r eo im n̄an kwaļo̧k naan in kam̧ool kōn E ejjamin jem̧ļo̧k. Jouj im keememej E ilo aolep men kwoj ļōmņak kaki, ilo aolep men me kwoj kōm̧m̧ane, im ilo aolep men me kwoj kajieon̄ erom, im jutak kōn E ilo jejjet n̄an aolep ajri ro nejin Jemedwōj Ilan̄ me kwoj koba ippāer kiiō im iien otemjeļo̧k.
Menin aikuj #2: Mijenede ro rej erreo n̄an Kwaļo̧k Ko̧jpeļ eo Aō.
Juon menin aikuj eaorōk n̄an erom mijenede ro rej Kwaļo̧k Ko̧jpeļ eo Aō ej erreo eo an juon make im̧aan Rilo̧mo̧o̧r eo.
In kwaļo̧k jet m̧ool ko ralikkar wōt jon̄an aō jeļā.
-
Jej ribōk jikin ro kar kōmālim er an Ripinmuur eo im Rilo̧mo̧o̧r eo an laļ.
-
Kar kūr kōj n̄an kean kōn ko̧jpeļ eo An kar kōjepļaaktok im ej n̄an indeeo.
-
Jejjab maron̄ māār kin lipijinjin ko an laļ in im jutak kōn E ilo kōmālim im jerbal kōn kajoor ilo āt eo Etan ekwojarjar.
-
Jejjab maron̄ jipan̄ ro jet n̄an anjo ioon kōm̧akoko eo an jerawiwi eļan̄n̄e kōj make jej lokjak kōn jerawiwi (lale D&C 88:86).
-
Jejjab maron̄ jipan̄ ro jet jeļā kōn ukweļo̧k eļan̄n̄e kōj make jaar jab katak ukweļo̧k ilo tu-jejjet im tu-likieo in.
-
Jemaron̄ kwaļo̧k im katakin kōn kajoor eo wōt me jaar kajieon̄ erom.
-
Jenaaj bōk eddo im̧aan Anij kōn wānik in ikdelel ko ad im erreo in jerbal āinwōt rijerbal ro An.
Ilo tōre in jejjab aikuij bwe jen wānōk. Bōtaab kar kakien kōj bwe jen erreo im etetal ilo jim̧we im̧aan Ripinmuur eo an Israel. Irooj eaar ba bwe ro me rej ineek jepe ko an Irooj rej aikuj erreo (lale D&C 38:42).
Ukweļo̧k ej juon pedped in kōjatdikdik im kemour—ejjab jen ebbweer im inepata. Ukweļo̧k ilo m̧ool ej kōttā—bōtaab jab leļn̄o̧n̄. Ukweļo̧k ej ilo juon wot iien aikuji im ekaenōm̧m̧an, ekanooj ļap im inem̧m̧an. Ukweļo̧k ej juon menin letok ejjeļo̧k wōņāān kar kapidodoik kōn Pinmuur eo An me jej iakwe, jerbal n̄an e, im ļoore.
Jekdo̧o̧ņ eļan̄n̄e kwar kōm̧m̧ani jerawiwi ko reļļap, kōn Pinmuur eo an Jisōs Kraist im m̧ool in ukweļo̧k, em̧ōj am̧ kar ak maron̄ bar juon alen karreoik eok im erreo.
Ewōr jodikdik ro me rej aikuj in lukkuun in ukweļo̧k. Kiiō ej iien eo. Jouj, jouj, jouj jab kōwaane raan in ukweļo̧k eo ami.
Ewōr jodikdik ro me raar ukweļo̧k im rej wōnm̧aanļo̧k wōt n̄an ukweļo̧k im rej ļōmņak eļan̄n̄e raar kadedeļok aolep men ko rekkar bwe Irooj en bok er (lale D&C 97:8). Jouj keememej, Irooj ej aikuj bwe kwon erreo bōtaab wānōk. Jetōb Kwojarjar ej bar juon alen jerbal ilo mour eo am̧ ej kōkaļļe eo em̧ool tata an jeorļo̧k bōd jān Irooj kōnke “Jetōb eo an Irooj ej jab jokwe ilo temple ko re jakkwojarjar” (Hilamōn 4:24). Im kile bwe kien eo n̄an jeorļo̧k bōd an aolep armej (lale D&C 64:10) ekoba jeorļo̧k am̧ make bōd.
Mijenede ro rej Kwaļo̧k Ko̧jpeļ eo Aō rej rikaļoor ro rej kautiej-bujen im pokake-kien an Irooj Jisōs Kraist. Jouj keememej E iien otemjej im karbōb im erreo n̄an jutak kōn E.
Menin aikuj #3: Mijenede ro rej Kwaļo̧k Ko̧jpeļ eo Aō rej kaorōk naan ko an mour indeeo.
Ij karuwaineneik eok n̄an wōnm̧aanļo̧k wōt ilo kaurōk ilo ļōmņak ko am̧ naan ko an mour indeeo (lale D&C 84:85). Kaorōk naan ko an mour indeeo eļapļo̧k jān katak jidik ak kakilōklōk, āinwōt “m̧ōñā jen naan [ko] an Kraist” (2 Nipai 31:20; bar lale 2 Nipai 32:3) eļapļo̧k jān edjo̧ñ ak m̧ōņā in kōtan awa. Kaorōki ej kwaļo̧k n̄an n̄a ej kalimjekļo̧k wōt im jerbale, ekiti im jeromtok, liñiri, im jar, kobaiktok im katak, kaorōke im kam̧m̧oolol kake, im lem̧ōņōņō kake im dāpiji.
Keememej ekōjkan an ļōm̧aro nejin Mosaia—mijenede ro emen rekabwilōn̄lōn̄ kar etaer Ammon, Aaron, Omer, im Himni—“raar kanooj kajoorļo̧k ilo jeļā m̧ool eo; bwe raar armej in jeļāļo̧kjeņ ejim̧we im raar lin̄ōri jeje rekwojarjar ilo niknik” (Alma 17:2).
Mijenede rein retiljek ilo m̧ool raar wōnm̧aanļo̧k wōt in kaorōk naan ko an mour indeeo. Raar jab kowaan ak baj kakūrm̧ool eddo eo aer n̄an kōm̧m̧ane ekkatak jeje ko rekwojarjar an juon make ak ippān eo m̧ōttan. Jeļāļo̧kjeņ ilo jetōb im meļeļe eo eaar deeil itum̧wilaļ in jetōb ko aer make, im katak ko im pedped ko an ko̧jpeļ eo ear weppen ilo būruwier āinwōt m̧ool kōn kajoor eo an Jetōb Kwojarjar.
Āinwōt jet ro rej itok ilo etan Rilo̧mo̧o̧r eo, kwe im n̄a ewōr an eddo ej wōnmaanļok n̄an jerbal ilo tiljek im n̄an katōk ilo būruwōd im ļōmņak ko ad katak ko raorōk im pedped ko an ko̧jpeļ eo kar kōjepļaaktok eļaptata jān Bok in Mormon. Ilo ad kōm̧m̧an āindein, kōjeram̧m̧an eo kar kallim̧ur kake ej bwe Jetōb Kwojarjar enaaj “kakeememej men otemjej n̄an [kōj]” (Jon 14:26) im kōkkajoor kōj ilo ad katakin im kam̧ool. Bōtaab Jetōb eo emaron̄ jerbal ippād im ilo kōj eļan̄n̄e jej leļo̧k juon men eo emaron̄ jerbale wōt. E ejjab maron̄ jipan̄ kōj keememej men ko jaar jab katak (lale Alma 31:5).
Mijenede ro rej Kwaļo̧k Ko̧jpeļ eo Aō rej wōnm̧aanļo̧k wōt in kaorōk naan ko an mour indeeo, rej pedped ioon wānōk an naan eo, im ewōr aer kajoor in naan eo ilo er. Jouj im keememej E iien otemjej, erreo iien otemjej n̄an jutak ilo Etan, im kaorōk im pedped ioon wānōk an naan eo.
Menin aikuj #4: Mijenede ro rej Kwaļo̧k Ko̧jpeļ eo Aō rej meļeļe Jetōb Kwojarjar ej rūkaki eo eļaptata im m̧ool.
Jetōb Kwojarjar ej eo kein kajilu uwaan Doulul in Anij, im E ej kam̧ool kōn aolep m̧ool im rūkaki eo eļaptata im m̧ool. Katak ko jej katakin im naan in kam̧ool ko jej kwaļo̧ki rej pojak n̄an juon rikkatak eo ej jerbal im katak ñan e make.
Jerbal eo ad āinwōt mijenede ro, juon iaan jerbal ko ad raorōk tata ej n̄an karuwaineneik rikkatak ro n̄an kōjerbal anemkwoj eo aer ilo mour in im jerbal ekkar n̄an katak ko an Rilo̧mo̧o̧r eo. Kōm̧m̧an im kōjparok kallim̧ur ko ilo jetōb, āinwōt jar kōn juon kam̧ool kōn m̧ool eo, ekkatak im jar kōn Bok in Mormon eo, koba lok ilo kweilo̧k ko an Kabun̄, im kōjparok kien ko, ej menin aikuj n̄an juon rikkatak n̄an kōjerbal tōmak, n̄an jerbal, im n̄an oktak.
Jekdo̧o̧n ewi m̧ool in ad jerbal, kwe im n̄a jejjab maron̄ iuuni ak kiene m̧ool eo n̄an buruwōn rikkatak ro. Kijejeto eo ad em̧m̧an tata emaron̄ wōt bōktok ennaan eo kōn m̧ool eo n̄an bōro (lale 2 Nipai 33:1). Ļaptata, juon rikkatak ej aikuj m̧akūtkūt ilo jim̧we im kōn menin karuwaineneik tok m̧ool eo n̄an lowaan būruwōn ļeo ak lio make. Ilo wāween in wōt rikapok m̧ool ro im rioktak ro rej kaddōkļo̧k maron̄ eo ilo jetōb n̄an lo uwaak ko kōn er make.
Kōnke eddo eo ad ej n̄an jipan̄ rikkatak ro katak kōn tōmak im kōn kajoor eo an Jetōb Kwojarjar, jerbal in ejjamin kōn ña im ejjanin kar kōn kwe. Jej aikuj kamaat ad maron̄ n̄an kadedeikļo̧k eddo ko ad mijenede im ilo juon wōt iien “etal jen m̧aan” bwe Jetōb Kwojarjar eo en maron̄ kōm̧m̧ane jerbal eo An ekwojarjar im jerbal. Ilo m̧ool, jabdewōt men eo kwe ak n̄a ej kōm̧m̧ane āinwōt ro rej jutak ilo etan Rilo̧mo̧o̧r eo jeļāļo̧kjeņ eo im ej kijōōrļo̧k kōj make—ilo ennaan ko jej kwaļo̧ki, ilo jekjek ko jej kōjerbali, ak ilo m̧wil eo ad make im paotokid—ej juon jekjek an priestcraft me ej dāpij an jerbal katak ko an Jetōb Kwojarjar.
Ej katakin jen Jetōb in m̧ool ke ak jen bar jet wāween? Im eļan̄n̄e ej jān bar jet wāween ejjab jān Anij (lale D&C 50:17–18).
Jouj im keememej E iien otemjej, erreo n̄an jutak ilo Etan, kaorōk naan eo An, im kōtļo̧k bwe rūkaki eo eļaptata im em̧ool, Jetōb Kwojarjar, n̄an kam̧ool kōn m̧ool otemjej.
Menin aikuj #5: Mijenede ro rej Kwaļo̧k Ko̧jpeļ eo Aō rej meļeļe katakin ej ļapļo̧k jān kōnono im jiron̄.
Āinwōt an kar Rilo̧mo̧o̧r eo jijet ioon Toļ Olives, Eaar kean̄: “Kom̧win jab inepata m̧okta ta eo kom̧ naaj ba: a jabdewōt men eo naaj lewōj n̄an kom̧ ilo awa eo, men in kom̧win kōnono kake: bwe e jab kom̧eo kom̧ij kōnono, ak Jetōb Kwōjarjar” (Mark 13:11).
Rilo̧mo̧o̧r eo ilo raan ko etto an tōre in bōk eddo in eaar kōmeļeļeik mijenede ro n̄an kōpeļļo̧k lon̄ier im renaaj obrak (lale D&C 33:8, 10) im n̄an kotak ainikier n̄an armej. Bwe ta eo rej aikuj ba naaj leļok n̄an er ilo awa eo wōt im ilo iien eo wōt (lale D&C 100:5–6).
Eoon kein rej kalikkar kajjitōk eo eļap an ļap im bun̄tōn eo ejim̧we n̄an kwaļo̧k im jipan̄ rikkatak ro katak m̧ool eo. Mijenede ro rej Kwaļo̧k Ko̧jpeļ eo Aō rejeļā jejjab katakin katak ko; jej katakin armej ro. Jejjab baj wōt riiti ak kwaļo̧k ennaan ko kar kakilōklōki kōn un ko an ko̧jpeļ eo. Jej karuwaineneik rikappok m̧ool ro n̄an en̄jake oktak in bōro eo ekajoor. Jej meļeļe bwe kōnono im jiron̄ make rejjab katakin.
Kwaļo̧k ko̧jpeļ eo ilo wāween eo an Irooj ekoba etale im ron̄jake im kejepelļo̧k āinwōt pedped in kōnono. Laajrak in unin kōnono kein raorōk. Jouj kile bwe etale eo im ron̄jake ej tōl jeļā eo im bwe etale eo, ron̄ajke, im jeļā eo rej m̧okta jān kōnono. Ilo kōjerbal laajrak in ekōm̧m̧an bwe mijenede ro ren kile im katakin n̄an aikuj ko an rikkatak ro.
Ilo ad etale, ron̄jake, im kile, jemaron̄ bōke ilo awa en ijo me em̧ōj ajej e n̄an aolep armij (lale D&C 84:85)—m̧ool ko n̄an kalikkari im uwaak ko n̄an liļo̧k me naaj tōpar aikuj ko renjeno̧lo̧k an juon rikkatak. Kōn wōt etale, ron̄jake, im kile jemaron̄ in tōl jān Jetōb eo n̄an ba im kōm̧m̧ani men ko me naaj ļap aer jipan̄ n̄an ro me jej jerbal n̄an er.
Etale ej juon m̧aanjabpopo aorōk n̄an bōk menin letok ilo jetōb an kile. Kile ej lo kōn māj ko an jetōb im en̄jake eo kōn bōro—lo im en̄jake bōd eo an juon ļōmņak, em̧m̧an eo ilo bar juon armej, ak pedped eo tok juon me ej aikuj n̄an jipan̄ juon rikkatak. Kile ej ron̄jake kōn lojilin̄in jetōb im en̄jake eo kōn bōro—ron̄jake im en̄jake n̄ūrbōktak eo jab kōnono kake ilo juon kallim̧ur ak kajjitōk, m̧ool eo an juon naan in kam̧ool ak katak, ak kam̧ool im aenōm̧m̧an eo me ej itok jān kajoor eo an Jetōb Kwojarjar.
Mijenede ro rej Kwaļo̧k Ko̧jpeļ eo Aō jerbal ilo tōmak im rej tōl jān Jetōb n̄an jipan̄ rikkatak ro katak m̧ool eo. Jouj im keememej E iien otemjej; erreeo n̄an jutak ilo Etan; kaorōk naan eo An; kōtļo̧k bwe Jetōb Kwojarjar eo en kam̧ool aolep m̧ool; im etale, ron̄jake, im kile ilo am̧ kam̧ool kōn Jisōs Kraist n̄an ro rem̧ool rej pukōt m̧ool eo.
Komaron̄ Kōm̧m̧ane Menin!
Komaron̄ riiti ennaan eo aō im tōmak bwe aolep jodikdik ro jet remaron̄ im naaj kōm̧m̧ane ta eo ej kab m̧ōj aō kōmeļeļeik. Bōtaab komaron̄ ļōmņak eļan̄n̄e komaron̄ kōm̧m̧ane. Jouj ron̄ajke. Komaron̄ kōm̧m̧ane menin!
Eļan̄n̄e eaar wōr kōņaan an būruwō, inaaj kar bōk jet iien ko ippam̧i wōj kajjojo. Inaaj kar kōņaan idik peiūm̧, kepaake tok eok, kalimjōk mejam̧, im ba, “Komaron̄ kōm̧m̧ane menin! Irooj eo kwoj bōk jikin im jerbal n̄an e ejeļā komaron̄ kōm̧m̧m̧ane menin. Ijeļā komaron̄ kōm̧m̧ane menin. Im āinwōt Rikarejeran, ij kallim̧ur kwonaaj bōk jipan̄ eo An. Jouj Keememej iien otemjej bwe kōn jipan̄ eo An im ilo kajoor eo An, komaron̄ kōm̧m̧ane menin!”
Ij iakwe kom̧ im jar ilo ami kajieon̄ erom ta eo kom̧ij aikuj erom, kom̧ naaj kile im uwaak ilo tōmak n̄an ainikien im tōl eo an Irooj. Innām kwonaaj kar m̧ool in erom kajoor im wājepedik ribōk jikin Irooj Jisōs Kraist.
Pija ko kōmeļeļe Publishing Services Department; Kwōj Yokwe Eō Eļap Jān rein ke? jen David Lindsley.