Jodikdik ro im Bujen ko an Tampeļ
Kōn wanlaļļo̧k in iiō eo ekkar n̄an jerbal in mijenede aolep raan, ewōr jon̄oul taujin im elōn̄ļo̧k jodikdik ro rej kiiō rej kōm̧m̧an bujen ko rekwojarjar an tampeļ.
Āinwōt rijerbal in tampeļ ro, ewōr am̧ jeram̧m̧an n̄an ioon rūm̧m̧an ded ro rej itok n̄an tampeļ eo n̄an bōk aer make menin letok eo ekwojarjar. Kōm kar loe bwe kūlaj in kōppopo eo n̄an tampeļ ar lukuun jipan̄ er, ak im̧we eo ejim̧we an ro jinen im jemen im ritōl ro eļapļo̧k an aorōk n̄an jipan̄ kōpooj er n̄an kōm̧m̧ani bujen ko an tampeļ. Āinwōt ro jinen im jemān im ritōl ro, jej aikuj in jipan̄ jodikdik ro jab kōpooj wōt er n̄an jerbal in mijenede, eo enaaj jem̧ļo̧k kiteen ilo jejjo wōt allōn̄ ko, ak barāinwōt n̄an kōm̧m̧an im kōjparok bujen ko an tampeļ, eo ej n̄an indeeo. Bun̄tōn ko jinoin remaron̄ ijjino ilo ajri.
Kōpooj Ajri ro
Ro jinen im jemen remaron̄ kwaļo̧k n̄an ajri ro nejier kōn aorōk eo an tampeļ ilo aer kabun̄jar ilo tampeļ im kwaļo̧k naan in kam̧ool ko aer kōn jerbal in tampeļ. Men̄e ilo eria ko emakijkij in etal n̄an tampeļ ejjab maron̄ tōprak, ro jinen im jemān remaron̄ dāpij wōt ikdelel eo ippān ajri ro nejier n̄an etal n̄an tampeļ eo.
Būreejtōn Howard W. Hunter (1907–95) eaar katak jen ro jinen im jemān: “Jen kwaļo̧k ippān ajri ro nejid en̄jake ko an jetōb jaar būki ilo tampeļ eo. Jen kōļapļo̧k ad m̧ool ad katakin er im ļapļo̧k ad aenōm̧m̧an ilo men ko jemaron̄ jejjet ad ba kōn kōttōpar ko an im̧weo im̧ōn Irooj.1 Ajri ro nejid rekōņaan jeļā bwe tampeļ eo ej ijo em̧ōj ad bōk uwaak in jar ko ad im ijo jej en̄jake iakwe eo an Anij.
Ro jinen im jemen remaron̄ barāinwōt katakin ajri ro nejier n̄an reim̧aanļo̧k im mour erreeo kōn peba in mālim an tampeļ bwe en maron̄ wōr aer iien n̄e naaj 12 aer iiō. N̄e iien ej itok n̄an jodikdik rein n̄an aer etal, jej loe aiboojoj im utiej ilo aer kwaļo̧k peba in mālim ko an tampeļ ilo tampeļ eo.
Kōpooj Jodikdik ro
Ro jinen im jemen remaron̄ jipan̄ ajri ro nejier n̄an bōk kūņaer ilo kapukot menmenbwij an baam̧le bwe n̄e enaaj 12 aer iiō remaron̄ bōk etan baam̧le ko aer n̄an tampeļ. N̄an jodikdik ro rej kōm̧m̧an āindein, Elder David A. Bednar jen Doulul eo an Jon̄oulruo Rijilōk ro eaar kalim̧m̧ur: “Ami iakwe im kam̧oolol kōn rūtto ro ami enaaj ļapļo̧k. Im ij kalim̧m̧uri kom̧ bwe naaj kōjparok kom̧ nae ļapļo̧k in kareel an rijum̧ae eo. Im ij kalim̧m̧uri kom̧ bwe naaj kōjparok kom̧ ņae ļapļo̧k in kareel an rijum̧ae eo.”2
Em̧ōj ad lo elōn̄ kam̧ool ko kōn kalim̧m̧ur in em̧ōj an kūrm̧ool. Jem̧aanļo̧k juon jiron̄ ar ba n̄an kōm̧ bwe ālkin an pukōt etan jibūn, eaar itok n̄an tampeļ eo n̄an kōm̧m̧ane jerbal eo kōn e. Jiron̄ in eaar ba bwe ke ekar peptaij kōn jibwun, eaar wōr an jeļā bwe jibwun enaaj karuwaineneik e ilo mour eo ej itok. Kain en̄jake rōt in eaar kōkajoorļo̧k naan in kam̧ool ko im kwaļo̧k juon ikdelel n̄an bōk kūņao ilo kain̄i ko an tampeļ.
Elōn̄ jodikdik ro rej jelm̧ae kapo ko n̄an kōņak nuknuk ko rejekkar. N̄e ro jinen im jemen im ritōl ro rej rekōņak nuknuk ko rem̧m̧an, jodikdik ro remaron̄ kile bwe remaron̄ kōm̧m̧ane barāinwōt. Jodikdik ro rej aikuj in meļeļe paoktok in aer nuknuk im ekōjkan aer kea kake ānbwiniier maron̄ in kwaļo̧k aer rikaļooran.
Ro jinen im jemen remaron̄ jipan̄ jodikdik ro kōppopo n̄an deļo̧n̄e tampeļ eo n̄an jipan̄ er meļeļe bujen ko renaaj kōm̧m̧ani ijeņ. Bujen ko an tampeļ eo ekoba kallim̧ur ko n̄an “etali kakien eo an wānōk im erreo, n̄an iakwe, jouj, meanwōr im kwojarjar; n̄an wūjlepļo̧k jim̧or kapeel im men ko kajjojo an kanniek n̄an kajedeed m̧ool eo im lōn̄aj lōn̄tak [baam̧le an ro nejin armej]; n̄an jerbale m̧aanļo̧k m̧ool in; im n̄an pukot ilo kajjojo iaļen n̄an leļo̧k eļap kōbpopo bwe laļ in en maron̄ pojak n̄an bōk an Kiin̄—eo Irooj Jisōs Kraist.”3 Ro jinen im jemen remaron̄ kam̧ool bwe jodikdik ro renaaj bōk aer make im kōjeram̧m̧an ko rekajoor ilo aolepen mour ko aer ilo aer kōjparok bujen kein, im bujen kein enaaj ļapļo̧k aer wōr meļeļeier n̄an jodikdidk ro ilo an ro jineer im jemeer jipan̄ er meļeļe kōn kōjeram̧m̧an ko jim̧or im bujen ko kar kōm̧m̧ani kōn Pinmuur eo an Jisōs Kraist.
Elōn̄ wāween ko jemaron̄ jipan̄ kōpooj ajri ro nejid im jodikdik ro n̄an bōk kōjeram̧m̧an ko an tampeļ. Toon wōr aer kōppopo, toon wōt aer naaj lo aenōm̧m̧an im en̄jake Jetōb eo im maron̄ in wōr eļap jetōbin en̄jake ilo aer bōk menin letok kwojarjar eo aer. Juon en̄jake in tampeļ eo ekōbbōkkak enaaj kōm̧m̧an bwe en ļapļo̧k aer rikaļooran ro rewūjļepļo̧k an Kraist im mijenede ro rewājabdik—n̄an jipan̄ ro rej katakin n̄an kōbpopo n̄an bōk kain̄i ko rekwojarjar an tampeļ kōn er make.
Kōmļeļe jen Steve Kropp