Ennaan eo an Būreejtōnji eo Kein Kajuon
Eddo eo Ad n̄an Lo̧mo̧o̧ren
N̄an Armej ro Rekwojarjar, aikuj eo n̄an lo̧mo̧o̧ren ro jeid im jatid im sister ro raar, ilo juon un ak bar juon, kar etal ettoļo̧k jān iaļ eo an m̧akūtkūt ko an Kabun̄ in ej aorōk ko ejjeļo̧k jemļo̧kin. Ewōr ke jet armej ro kar juon iien raar kwaļo̧k en̄jake kōn ko̧jpeļ eo? Eļan̄n̄e aaet, ta eddo eo ad n̄an lo̧mo̧o̧ren er?
Ļōmņak kōn ro rejako ilubwilijin rūtto ro, eo ejako pāleen, rinan̄inmej eo. Emakijkij loe er ilo āne jam̧den ko rōmōrā im ejjeļo̧k kāer ņae etaer jikin ajimakeke. N̄e jodikdik ro rej em̧m̧akūt, n̄e ājmour ej nana ļo̧k, n̄e kajoor ej m̧ōjņoļo̧k, n̄e meram in kōjatdikdik eo ad ej marokļo̧k, remaron̄ bōk jipan̄ im rejtak jen pā eo me ej jipan̄ im bōro eo ejeļā tiramo̧.
Ewōr, aaet em̧ool, ro jet rej aikuj lo̧mo̧o̧ren. Jet rej en̄taan kōn jerawiwi barāinwōt ewōr ro rej jōbābwe ilo mijak ak ejjeļo̧k aer itoklimo ak ejjeļo̧k aer kea. Kōn jabdewōt un, rej katoļo̧k er make jān m̧akūtkūt ko ilo Kabun̄ in. Im renaaj pād wōt im jabābwe m̧ae iien ewōr iruj ilo kōj—membōr ro reniknik an Kabun̄ in—juon ikdelel n̄an lo̧mo̧o̧ren im n̄an lo̧mo̧o̧r.
Juon armej n̄an Kwaļo̧k Iaļ eo
Jet iien rem̧ootļo̧k iaar bōk juon leta kar jeje jān juon em̧m̧aan eo eaar etal jān Kabun̄ in. Eaar je elōn̄ iaan membōr ro am. Ālkin an kar kōmeļeļeik wāween an kar erom janiknik, eaar je:
“Eaar lukkuun in lōn̄ aō im kiiō elukkuun in iiet. Iaar jab m̧ōņōņō im en̄jake āinwōt iaar ļōmņak bwe ij likjab ilo men otemjej. Ko̧jpeļ eo eaar jab em̧m̧akūt jān būruwō, men̄e eaar em̧m̧akūt jen mour eo aō. Ij kajjitōk kōn jar ko ami.
“Jouj jab meļo̧kļo̧k jabdewōt ro rej pād ijoko jabdewōt—Armej ro Rekwojarjar ilo Raan-ko Āliktata. Ijeļā ijo Kabun̄ in ej pād ie, ak jet iien ij ļōmņak bwe ij aikuji bar juon armej n̄an kwaļo̧k n̄an n̄a iaļ eo, rōjan̄ eō, bōkļo̧k mijak eo aō, im kwaļo̧k naan in kam̧ool eo n̄an eō.”
Ke iaar riiti leta in, ļōmņak ko aō raar oktakļo̧k n̄an juon loļo̧k iaar kōm̧m̧ane n̄an juon iaan im̧ōn pijak ko reļļap ilo laļ in—ebun̄bun̄ Victoria im Albert Museum ilo London, England. Ijin, ej juon pija em̧m̧an im kar bōreim, kar unoik ilo 1831 jen Mallord William Turner. Pija ko ilo jin̄a eo raar kōdo̧ ko rekilmeej im mijel im kajoor an juon ņo̧ in lo̧jet ej kwaļo̧k kauwōtata im mej. Juon meram jān juon tima ekalbuuj ej kabōlbōl jen ettoļo̧k. Ilo pija eo, kar kom̧ti lōn̄ļo̧k jen ņo̧ ko rej bun̄tok jen ibeb in dān, ej juon tima ekilep. Em̧m̧aan ro rej lukkuun iuun jōbwe ko ke tima eo ej kijone juon ļan̄ enana. Ioon pārijet ej jutak juon kōrā im ruo ajri, remeļļawi im metak jen an kar wōt im ekkōtoto. Rej kalimjekļo̧k lo̧jet. Ilo kōļmenļo̧kjeņ eo aō iaar kwaļo̧k ilo tukadu in etan jin̄a eo. N̄an n̄a eaar erom N̄an Lo̧mo̧o̧ren.1
Ilubwilijin lan̄ ko an mour, kauwōtata ko retiņo. Em̧m̧aan im kōrā ro, ļaddik ro im leddik ro rej lo aer make kalbuuj im jelm̧ae kakkure. Wōn enaaj jipan̄ rein rej en̄taan, likūt jokne ko an m̧weo im baam̧le eo, im etal n̄an lo̧mo̧o̧ren?
Jerbal eo ad ejjab pen. Jej pād ilo ijilōk an Irooj; jej ribōk jipan̄ eo An.
Ilo kwaļo̧k eo an, Eaar kūr riān̄wōd ro ilo Galilee n̄an joļo̧k ok ko aer im ļoor E, kwaļo̧k, “Inaaj likūt kom̧ro ri eo̧n̄ōd armej.”2 Jemaron̄ ke kobaļo̧k ippān jar in riān̄wōd em̧m̧aan im kōrā ro, bwe jen maron̄ leļo̧k jadewōt jipan̄ eo jemaron̄e.
Ad eddo ej n̄an pukōtļo̧k n̄an lo̧mo̧o̧ren jabdewōt ro raar em̧m̧akūt jen m̧akūtkūt in kōjparok, bwe ren maron̄ bōktok im̧aan tabōļ an Irooj n̄an kwojkwoj ioon naan ko An, n̄an lan̄lōn̄ kōn jem̧jerā an Jetōb Kwojarjar, im n̄an erom “jab bar ruwamāejet im ri ito-itak, a kom̧ citizen ippān ro rem̧m̧an, im kom̧ nukun Anij.”3
Pedped in Katak an Iakwe
Iaar loe bwe ruo un ko raorōk reļļap jeje n̄an an juon jepļaaktok n̄an m̧akūtkūt im n̄an oktak in m̧wil ko, imminene ko, kōm̧man ko. Juon, armej ro rej ro̧o̧ltok kōnke ewōr armej eaar kwaļo̧k n̄an er kōtmāne ko aer indeeo im kar jipan̄ er pepe n̄an būki. Eo ejaniknik ejjab maron̄ jelm̧ae men eo em̧m̧an m̧ae iien rej loe men eo ewājepdik ilowaan wōt jon̄ok eo aer.
Ruo, ro jet rej ro̧o̧ltok kōnke ro jitōn bōro ak “a kom̧ citizen ippān ro rem̧m̧an” raar ļoor kean̄ in an Rilo̧mo̧o̧r eo, raar iakwe rituri er āinwōt er make,4 im raar jipan̄ ro jet bōktok ettōņak ko aer n̄an kakūrm̧ool im ikdelel ko aer n̄an bōk kōtmāne eo.
Wāween eo edim ilo jerbal in eaar baj wōt—im enaaj baj wōt—pedped in katak an iakwe.
Ilo juon en̄jake em̧ool, armej ro rej kalbuuj ilo lan̄ bun̄to bun̄tak ilo̧maļo ilo pija eo an Turner rej āinwōt elōn̄ iaan membōr ro rejaniknik ro rej kōttar lo̧mo̧o̧ren jen ro rej tōl tim̧a in lo̧mo̧o̧r ko. Būruweer rej aikuj kōn jipan̄. Ro jinen im jemān rej jar kōn ļaddik ro nejier im leddik ro nejier. Kōrā ro rej akweļap n̄an lan̄ bwe ļōm̧aro pāleer maron̄ tōpar er. Jet iien ajri ro rej jar kōn jineer im jemāer.
Ej aō jar bwen wōr juon ad ikdelel n̄an lo̧mo̧o̧ren eo ejaniknik im n̄an kōro̧o̧ltok er n̄an lan̄lōn̄ eo an ko̧jpeļ eo an Jisōs Kraist, bwe ren maron̄ bōk m̧ōttan ippād aolep likio in jem̧jerā eo ej letok.
Jen maron̄ pukōtļo̧k n̄an lo̧mo̧o̧ren ro rejako ro rej pād ipeļaakid: eo erūtto, eo ejako pāleen, eo enan̄inmej, eo ewōr uwam̧we ilo ānbwin, eo ejaniknik, im ro rejjab kōjparok kien ko. Jen maron̄ leļo̧k n̄an er pā eo ej jipan̄ im bōro eo ejeļā tiriam̧o. Jen kōm̧m̧ane menin, jenaaj bōktok lan̄lōn̄ ilo būruwōd, im jenaaj en̄jake ju bōro eļap eo ej itok n̄an kōj n̄e jej jipan̄ bar juon ilo iaļ in ļo̧k n̄an mour indeeo.
Katakin jān Ennaan In
Ļōmņak in kajjitōk ippān armej ro kwoj loļo̧k eļan̄n̄e rejeļā kajjeen ro rej kakkōt wōt n̄an etal im jar. Komaron̄ kālet juon armej im ekōnono kōn wāween ko n̄an kwaļo̧k iakwe, baj karuwaineneik tok er n̄an bōk kuņaan ilo juon nokon in jota an baam̧le ak n̄an itok im m̧ōn̄ā.
Life-Boat and Manby Apparatus Going Off to a Stranded Vessel Making Signal (Blue Lights) of Distress, jen Joseph Mallord William Turner © Victoria and Albert Museum, London, www.vandaimages.com