Ko ha Meʻaʻofa MAʻÁ E Kuifefiné
ʻOku nofo ʻa e tokotaha naʻá ne fai e talanoá ʻi Kalefōnia, USA.
Naʻe mahuʻinga lahi ʻaupito ki heʻeku Kuifefiné ha kiʻi mahinongofua ʻo e fakamālō.
Tā fakatātaaʻi ʻe Roger Motzkus
ʻI heʻeku kei siʻí ne faʻa fakataha ʻeku Kuifefiné mo au mo e kāingá. Naʻa mau toko 14 nai pea naʻa mau fiefia maʻu pē ʻi hono fakaafeʻi kimautolu ʻe heʻemau Kuifefiné ki hono ʻapí ke mau kai efiafi, pea mau mohe ai mo pō vaʻinga ʻi he poʻulí, mo e ngaahi ʻaho malōloó. Naʻe hoko ʻa e ʻapi ʻo ʻemau Kuifefiné ko e ʻapi ia ʻoku mau fie ʻalu ki aí!
Naʻe fakafiefia ʻa e ʻekitivitī kotoa pē naʻe fai ʻi he ʻapi ʻo ʻemau Kuifefiné. Ka naʻe ʻikai te u fakakaukau au ki he taimi mo e ngāue naʻe fie maʻu ki hono teuteuʻi ʻo e ʻekitivitī taki taha. Naʻá ku pehē pē ʻe au ko e meʻa pē ia ʻoku fai ʻe he ngahi Kuifefiné pea naʻá ku fiefia pē au ai.
Naʻe hiki homau fāmilí hili ha ngaahi taʻu lahi mo manatu fiefia ki he fakakaukau ʻa e kāinga he ʻapi ʻo e Kuifefiné. Naʻe ʻalu ange ki mui ʻeku Kuifefiné ki homau ʻapi foʻoú ke mau kiʻi nofo ai ʻi ha ʻaho makehe. Naʻe fakakaukauʻi fuoloa ʻe homau fāmilí ʻa e meʻaʻofa lelei taha ʻe feʻunga mo iá. ʻOku lahi ange ʻene ngaahi meʻa ʻi hono ʻapí ʻi ha toe taha ʻoku ou ʻiloʻi. Ko e hā ha meʻa te mau kumi mai maʻá e Kuifefine ko ʻeni ʻokú ne maʻu e meʻa kotoa pē?
Naʻá ku fehuʻi ki heʻeku tangataʻeikí pe ʻoku ʻi ai haʻane fakakaukau, pea naʻá ne tala mai ʻa e meʻa tatau kiate au ʻi he taʻu kotoa pē: Ko e hā ʻoku ʻikai te ke fai ai ha tohi lelei kiate iá? Naʻe ʻikai ke toe ʻi ai haʻaku fakakaukau, ko ia naʻá ku ʻā hengihengi he pongipongi hono hokó ʻoku te’eki ʻā ha taha. Naʻá ku tangutu ʻi he tēpile ʻi peitó, pea tuʻu hoku vaʻé ʻi he taila momoko ʻo e faliki, peá u fai tohi makehe ki heʻeku Kuifefiné.
Ne u ʻuluaki fakakaukau ki ha meʻa ke u tohí, ʻa ia ʻoku kehe mei he “ʻOkú ke fakaʻofoʻofa moʻoní. Fakamālō atu koeʻuhi ko e meʻa kotoa pē.” Naʻá ku fakakaukau ʻi heʻeku sio atu ki tuʻa ʻi he matapā sioʻata ʻo e peitó ki he langí mo e ʻulu pāmé, naʻá ku fakakaukau ki he ngaahi meʻa lahi kuo fai ʻe heʻeku Kuifefiné maʻamautolu ʻi he ngaahi taʻu lahi kuo hilí. Naʻá ku manatuʻi ne teʻeki te u fakahā ki heʻeku Kuifefiné ʻa e mahuʻinga lahi kiate au ʻemau faʻa fakataha fakafāmili ki hono ʻapí.
Naʻá ku fakahā ki heʻeku kuí ʻi heʻeku tohí ʻa hoku ʻofa kiate ia mo ʻeku fakamālō koeʻuhi ko e ngaahi meʻa makehe ʻoku ou manatu fiefia ki aí. Naʻá ku fakahā ange ki ai ʻoku kei mahuʻinga kiate au ʻa e ngaahi meʻa ko iá, neongo kuo ʻosi ha ngaahi taʻu lahi mei ai. Hili ia peá u faʻo ʻa e tohí ʻi ha sila, pea nonoʻo ʻaki ia ha līpine kulokula peá u foki leva ki hoku loki ʻoku fakakāpeti māfaná.
ʻI he taimi ke foaki ai ʻa e ngaahi meʻaʻofa ki heʻeku Kuifefiné, naʻá ku toʻo māmālie hake ʻeku tohí. Naʻe ʻikai te u ʻiloʻi pe ko e hā haʻaku ongo ki heʻeku meʻaʻofa ki heʻeku kuí.
Naʻá ne ʻohovale ʻi heʻeku ʻoatu kiate ia ʻeku tohí. Naʻá ku siofi ʻene hae fakalelei hake ʻa e tohí, ʻo ne fakaava ʻa e muiʻi silá ʻo ne tohohake ki tuʻa ʻa e tohi naʻe ʻi ha pepa lanu pingikī lausiʻi. Naʻe kamata ke ne malimali ʻi heʻene lau ʻa e tohí pea kamata ke tafe hifo ʻa e loʻimatá ʻi hono matá. Kuo teʻeki ke u sio kuo tangi ʻeku Kuifefiné. Naʻá ne sio māmālie hake pea tafoki mai kiate au mo hono fofonga ʻofa lanu melomeló. Naʻá ne fanafana mai, “Mālō, mālō. ʻOku ʻikai te u tui ʻoku manatuʻi ia ʻe ha taha.”
Naʻe ʻikai fakakaukau ʻeku Kuifefiné, ʻa ia naʻá ne fai ʻa e meʻa kotoa pē ke langa hake ʻa e ngaahi fetuʻutaki ʻoku mālohí, te u manatuʻi pe hounga kiate au ʻemau faʻa fakatahá. Naʻá ne holoholoʻi hono matá peá ne pehē mai, “Mālō Kimipelī. Ko e meʻaʻofa lelei taha ʻena ʻe foaki mai ʻe ha taha maʻaku.”
Naʻá ku fāʻofua kiate ia peá u ongoʻi hono kili molemolé ʻi hoku kouʻahé mo nāmuʻi e meʻa fakanamulelei ʻa e “Kuifefiné” ko e pauta pēpē mo e kaloni. Naʻá ku fakamālō koeʻuhi ko e fakakaukau ne ʻomi ʻe heʻeku tamaí ke fai ha tohi ki heʻeku kuí. Naʻe ʻikai te u ʻilo ʻe mahuʻinga ange ki heʻeku Kuifefiné ʻa ʻeku fakamāloó ʻi he lolé, kaloní, mo e ngahi keke fuaʻi ʻakau ʻe lava ʻo fakatau ʻaki ha paʻangá.