Ngaahi Fakakaukau ki he Efiafi Fakafāmili ʻi ʻApí

ʻOku ʻi he pulusinga ko ʻení ha ngaahi fakamatala mo ha ngaahi ʻekitivitī ʻe lava ke fakaʻaongaʻi ki he efiafi fakafāmili ʻi ʻapí. Ko ha ngaahi sīpinga pē ʻeni ʻe niʻihi.

“Ko ha Meʻaʻofa maʻá e Kuifefiné,” peesi 58: Fakakaukau ke lau ‘a e fakamatala ki he meʻaʻofa ‘a Kimipeli ki heʻene kuifefiné. Te ke lava ‘o ngāue ʻaki ‘a e ngaahi fehuʻi ko ‘ení ke tokoni atu kiate koe ‘i hoʻo fakamatalaʻi ‘a e talanoá: “Okú ke pehē ko e hā naʻe mahuʻinga pehē ai ‘ene tohí ki heʻene kuifefiné? Ko e hā nai ha faʻahinga ongo ‘okú ke maʻu he taimi ‘oku fakamālō atu ai ha taha kiate koe ‘i ha meʻa naʻá ke fai? Ko e hā nai e finangalo ‘o e Tamai Hēvaní ‘o fekauʻaki mo e loto houngaʻiá? Te ke lava ‘o lau ʻo kau ki he loto houngaʻiá ‘i he Ki Hono Fakamālohia ‘o e Toʻu Tupú ʻi he peesi 18. Fakakaukau ke ke fai ‘a e talanoa ki hono fakamoʻui ‘e Sīsū Kalaisi ‘a e kau kilia ‘e toko hongofulú ‘i he Luke 17:11–19 pea aleaʻi e meʻa ‘oku akoʻi mai ‘e he talanoá ni ‘o kau ki he loto houngaʻiá. Ko ha kiʻi ‘ekitivitī, ʻe lava ke fai ʻe he mēmipa takitaha ‘o e fāmilí ha kiʻi tohi fakamālō ‘o ‘ave ki ha taha ‘i he uike ko iá.

“Ko ha Tāpuaki ‘o e Papitaisó,” peesi 66: Te mou lava ‘o kamata hoʻomou efiafi fakafāmilí ‘aki haʻamou hivaʻi ‘a e “Loto-toʻa ‘a Nīfaí” (Tohi Hiva ‘a e Fānaú, 120). Lau leva e talanoa ki hono ikunaʻi ‘e Taleva ‘ene manavahē ki he vaí, pea mou fakakaukau ki he ngaahi fehuʻi ko ʻení: Kuo mou manavahē nai ‘i hono fai ha meʻa? Ko e hā ha meʻa naʻá ne tokoniʻi koe ke ‘oua te ke manavahē? Fakaafeʻi e kau mēmipa ‘o e fāmilí ke fakamatala ki ha ngaahi meʻa ‘oku fie maʻu ke nau fai ‘a ia ‘oku nau hohaʻa ki ai. Mou aleaʻi fakafāmili ha ngaahi founga te mou lava ‘o fetokoniʻaki ai ke fakatupulaki ‘a e loto-toʻá. Ko ha kiʻi ‘ekitivitī, te ke lava ʻo faʻu ‘i he lokí ha kiʻi hala ‘oku lahi hono ngaahi faingataʻá. Haʻihaʻi e mata ‘o ha taha ‘i homou familí. Tokoniʻi ‘a e tokotaha ko iá ke ne ako ‘a e falalá ‘i haʻane lue takai ‘i he kiʻi halá ʻaki ʻene fakafanongo mo talangofua ki he ngaahi fakahinohino ‘oku fai ange kiate iá. Te mou lava ‘o aleaʻi ‘a e founga ‘e tataki mo fakafiemālieʻi ai kitautolu ‘e he Laumālié ‘i he ngaahi tūkunga ‘oku tau ongoʻi manavahē ai.

ʻI Hoʻo Lea Fakafonuá

ʻOku maʻu ʻa e Liahoná mo e ngaahi nāunau kehe ʻa e Siasí ʻi ha ngaahi lea fakafonua lahi ʻi he languages.lds.org.