Ko ha Lotu ʻi he Kātaki
Naʻá ku tupu hake ʻi Mekisikou mo hoku ngaahi tokouá, ʻeku faʻeé, mo ʻeku Kuifefiné. Ko e ʻosi pē ʻeku fai ʻeku lēsoni mei he akó, mo ʻeku ngaahi ngāue fakaʻapí, naʻá ku ʻalu leva ʻo vaʻinga soka. Naʻá ku manako ʻi he soká! Naʻá ku fakakaukau ko hoku vaʻe ʻe tahá ko e timi ia ʻe taha, pea vaʻe ʻe tahá ko e timi ia ʻe tahá.
Ne u vaʻinga soka ʻi ha ʻaho ʻe taha pea fakafokifā ʻa e faingataʻa ke u mānava. Naʻá ku mālōlō ʻi ha ngaahi miniti siʻi ka naʻe kei faingataʻaʻia pē ʻeku mānavá. Naʻe fakaʻau ke u puke lahi ʻaupito pea ʻave au ki fale mahaki.
Naʻe tokolahi ʻa e fānau iiki ʻi he fale mahakí, ka naʻá ku taʻelata au koeʻuhi ko e ʻikai ke ʻi ai hoku fāmií. Naʻá ku tui ki he ʻOtuá neongo naʻe teʻeki ke u kau ki he Siasí. Naʻá ku lotu he ʻaho kotoa pē ke fakamoʻui au, ka naʻe ʻalu pē ʻa e taimí ia mo ʻeku puke lahi angé. Naʻe pehē ʻe he kau toketaá, mahalo he ʻikai te u moʻui.
Naʻe faifai pea fakaʻatā au ʻe he kau toketaá mei he fale mahakí, peá u tokoto pē ʻi ʻapi ʻi he taʻu hono hokó. Naʻá ku folo ha ngaahi foʻi ʻakau lahi pea huhu tuʻo ua he ʻaho. Peá naʻá ku kei lotu loto pē. Naʻá ku fakahā ki he Tamai Hēvaní, kapau te u sai, te u tauhi kiate Ia ʻi he kotoa ʻeku moʻuí.
Naʻe ʻi ai ha ʻaho ʻe taha ne fai ai haʻaku lau tohi, pea tō ʻeku tohí ki he falikí mei he mohengá. ʻI heʻeku punou hifo ke toʻo hake ʻa e tohí, ne u fakatokangaʻi ʻoku ou mānava lelei. Naʻá ku toe lī ʻa e tohí ki lalo. Peá u toe toʻo hake ka naʻe ʻikai pē ha palopalema!
Naʻá ku hifo leva mei he mohengá. Naʻá ku ʻuluaki ninimo he kuo fuoloa foki ʻeku tokotó. Ne u sio ki he sioʻatá ʻoku ou malimali. Naʻá ku ʻiloʻi kuó u ma’u ha tali mei he Tamai Hēvaní.
Naʻe talu mei ai mo ʻeku feinga ke u fai ha meʻa ke fakahā ʻeku loto houngaʻia ki he Tamai Hēvaní. ʻI heʻeku tupu haké ne u hoko ko ha toketā ke tokoni ki hono tali e ngaahi lotu ʻa e fānau kehé. ʻOku ou feinga he taimí ni ke tauhi ki he Tamai Hēvaní ʻi hoku fatongia ʻi he Siasí.
ʻOku ʻikai faingofua hono tali ʻo e ngaahi lotú, pea ʻoku ʻikai tali vave mai ia he taimi kotoa pē. Ka ʻoku ou ʻiloʻi ʻoku tali mai ʻe he Tamai Hēvaní etau ngaahi lotú. ʻOkú Ne ʻafioʻi ʻetau ngaahi fie maʻu, peá Ne ʻafioʻi ʻa e meʻa ʻoku lelei tahá.
Tā fakatātaaʻi ʻe Dan Burr