Maʻá e Fānau Īkí
Ko e Tauhi Sipi mo e Sipi naʻe Heé
Mei he Mātiu 18:12–14 mo e Luke 15:3–7.
Naʻe akoʻi ʻe Sīsū ʻa e kakaí ʻaki ʻene fai kiate kinautolu ha ngaahi talanoa. Naʻá Ne fai ha talanoa ʻi ha ʻaho ʻe taha ʻo kau ki ha tauhi sipi naʻe ʻi ai ʻene fanga sipi ʻe toko 100. Naʻe angalelei mo ʻofa ʻaupito ʻa e tauhi sipí. Naʻá ne maluʻi ʻene fanga sipí mei he fanga manu kaivaó. Naʻá ne leʻohi kinautolu ʻi he poʻulí.
Naʻe ai ʻa e ʻaho ʻe taha naʻe mole ai ha sipi ʻe taha. Naʻe tuku ʻe he tauhi sipí ʻene sipi ʻe 99 ʻi ha feituʻu malu pea ʻalu atu ʻo kumi ʻa e sipi naʻe heé. Naʻá ne kumi ʻi he feituʻu kotoa pē, ʻi he ngaahi moʻungá pea ʻi he ngaahi potu mamaʻo ʻo e toafá.
Naʻe fiefia lahi ʻa e tauhi sipí ʻi he faifai peá ne maʻu ʻa e sipí. Naʻá ne hili ʻa e sipí ʻi hono umá ʻo ne ʻomi ia ki hono ʻapí.
Naʻe ui mai ʻe he tauhi sipí ʻa hono ngaahi kaumeʻá ʻo ne fakahā kiate kinautolu ʻa e anga ʻo ʻene toe maʻu mai ʻene sipí. Naʻa nau fakafiefia fakataha.
ʻOku hangē ʻa Sīsū Kalaisi ko e tauhi sipi ʻi he talanoá, pea tau hangē kitautolu ko e fanga sipí. ʻOku tokangaʻi kitautolu ʻe Sīsū pea ʻokú Ne tokoni ki hono maluʻi kitautolu mei he ngaahi faingataʻá. ʻOku ʻikai te Ne liʻaki kitautolu ʻi he taimi ʻoku tau fai ai ha ngaahi fehalākí. Pea ʻokú Ne fiefia ʻi heʻetau fakatomala pea foki mai ki Heʻene ongoongoleleí. Ko e ʻuhinga ia ʻoku ui ai Ia ʻe he folofolá ko e Tauhi Sipi Leleí.
Ngaahi tā fakatātaa ʻa David Habben