Mei he Siasí Fakakātoa
Fakataha ʻa e Kau Taki ʻo e Siasí ʻi Tekisisi
Ne toki fakatahá ni ʻa ʻEletā M. Lāsolo Pālati ʻo e Kōlomu ʻo e Toko Hongofulu Mā Uá pea mo Faifekau Havea Kelemani ko e Siʻí., ko ha tangata malanga ʻo e Siasi Papitaiso ʻo Peleseni Hila, pea mo ha kau taki kehe ʻo ha ngaahi siasi pea mo e koló ʻi Tekisisi, USA, ke aleaʻi hono fakamālohia e fāmilí mo e ngaahi koló ʻi he lotolotonga e ngaahi tuʻunga faingataʻa fakaʻekonōmika mo fakasōsialé.
Ne fakahoko e fakatahá ni hili hano poupouʻi ʻe he kau faifekau ʻi he Misiona Hiusitoni Tekisisi Noaté ha fuʻu ngāue tokoni lahi ko ha ola e ngaahi feinga ʻa Faifekau Kelemani ke fakaakeake e feituʻú ni. Ne kau ʻi he ngāué ni ʻa hono langa ha paʻake mo hono fakaleleiʻi ʻo ha ngaahi fale lahi kuo motuʻa.
Ne aleaʻi ʻe ʻEletā Pālati mo Faifekau Kelemani ʻa e meʻa ʻokú na fakatou fakaʻamu ki aí, ke langa ha ngaahi vā fetuʻutaki ʻi he vahaʻa ʻo e Siasí pea mo Peleseni Hilá ke hiki hake e ngaahi koló ʻi hono fakamālohia e ngaahi fāmilí. Ne ʻilo ai ʻe he ongo takí ni ʻoku lahi e ngaahi meʻa naʻá na faitatau ai—tautautefito ki heʻena fakaʻamu ko ia ke muimui ki he Fakamoʻuí ʻi hono ʻofaʻi mo tokoniʻi ʻa kinautolu ʻoku faingataʻaʻiá.
ʻAmanaki ke Hoko ha Akoʻanga Māʻolunga ʻo e Siasí ʻi Mekisikou ko ha MTC Foʻou
ʻI he ʻaho 29 ʻo Sānualí, ne fai ai ha fanongonongo ʻe liliu e ʻapiako māʻolunga ʻa e Siasí ko Penemelito ti lasi ʻAmelika, Mekisikou Siti ʻi Mekisikoú ko ha senitā akoʻanga fakafaifekau.
Ne puleʻi pea lea ʻa ʻEletā Lāsolo M. Nalesoni mo ʻEletā Sefilī R. Hōlani ʻo e Kōlomu ʻo e Kau ʻAposetolo ʻe Toko Hongofulu Mā Uá ʻi ha ngaahi fakatahaʻanga ʻi he ʻaho 29 ʻo Sānualí ʻi he ʻapiako Penemelitó ʻa ia ne fanongonongo ai e palani ko ia ki he MTC ʻi he kahaʻú. Ko e liliu ko ʻeni mei he ʻapiakó ki he MTC ʻoku ʻamanaki ke hoko ia hili e ʻosi e taʻu fakaako ʻa Penemelitó ʻi Sune ʻo e 2013. Kuo taʻu e fāngofulu tupu ʻa e hoko ʻa e ʻapiako Penemelito ti lasi ʻAmeliká ko ha ʻapiako nofomaʻu—ko ia ai kuo ʻosi ʻi ai pē ʻa e ngaahi fale mohe mo e ngaahi fale kehe ʻe fie maʻu ki he MTC.
ʻE hanga ʻe he MTC foʻou ko ʻení ʻo akoʻi ha kau ʻeletā, sisitā, pea mo ha ngaahi hoa mali ʻa ia ʻe ʻikai te nau ngāue pē ʻi Mekisikou, ka te nau ngāue foki ʻi ha ngaahi founa kehe ʻi ʻAmelika Noate, Lotoloto mo Saute. ʻE lava foki ke akoʻi ʻi Mekisikou Siti ʻa e kau faifekau mei he ʻIunaiteti Siteití kuo uiuiʻi ki ha ngaahi misiona lea faka-Sipeini ʻi honau fonuá. ʻE kei hokohoko atu pē foki hono akoʻi e lea faka-Sipeiní ʻi he MTC ʻi Polovo, ʻIutaá ki ha kau faifekau tokolahi.
Maʻu ʻe he Kuaea Tāpanekalé ha Aleapau ke Hiki ʻEnau Ngaahi Hivá pea Ola Lelei mo e ʻInitanetí
ʻI hono vakaiʻi e paaki fakamuimuitaha ʻo e makasini Billboard, ʻa ia ko e pulusinga fakakautaha ʻa e ngaahi kautaha hiki hivá, ne ʻi ai e ngaahi hiki manakoa taha ʻo e 2012. ʻI he taha ʻo e ngaahi saati ko iá, ne Fika 1 ai ʻa e kuaeá fakataha mo e ʻŌkesitulā ʻi Temipale Sikueá ʻi he ʻAlapama ʻo e Ngaahi Hiva Motuʻá.
Ko hono fakakātoá, ne kau e kuaeá mo e ʻōkesitulaá ʻi he manakoa taha ʻi he lisi ʻe nima ʻi he fakaʻosinga ʻo e taʻú pea tuʻo ua ʻi he lisi ʻo ha ʻalapama. Naʻe fika 3 mo 9 ʻi he ʻAlapama ʻo e Ngaahi Hiva Fakafonua Motuʻá (maʻá e ongo ʻalapama Glory! Music of Rejoicing mo e This Is the Christ); 4 ʻi he ʻAlapama ʻo e Ngaahi Hiva Fakafonua Motuʻá Imprint; 5 ʻi he Label ʻAlapama ʻo e Ngaahi Hiva Fakafonua Motuʻá; pea fika 12 ʻi he Classical Crossover Albums (maʻá e ʻalapama Glad Christmas Tidings (ne kau atu ki ai ʻa Tēvita ʻAsuleta (David Archuleta).
Tānaki atu ki he ola lelei ʻene lavameʻa ʻi he ngaahi kautaha hikí, ne fika ʻuluaki ai e kuaeá ʻi he ʻaho 17 ʻo Sānualí ʻi hono mamataʻi ʻe ha toko taha miliona tupu ʻi he YouTube ʻa ia ne tuku atu ʻi ha māhina ʻe tolu nai, ʻi he ʻaho 30 ʻo ʻOkatopa 2012. Ne fakafuofuaʻi ʻe he sēnoló ne mamataʻi ʻe ha toko 3.23 miliona tupu ʻi he fakaʻosinga ʻo e 2012. Ke lava ʻo hū ki he sēnolo ko ʻení, ʻalu ki he www.YouTube.com/user/MormonTabChoir.
Ne māʻolunga ʻaupito ʻa e tuʻunga ʻo e Kuaea ʻa e Tāpanekale Māmongá pea mo e ʻŌkesitulā ʻi Temipale Sikueá ʻi he ngaahi saati ʻi he fakaʻosinga ʻo e taʻú mei he makasini Billboard pea naʻe laka hake ʻi he tolu milioná ʻa e niʻihi ne mamata ai ʻi he YouTube ʻi he fakaʻosinga ʻo e 2012.
© IRI