Autalavou
E Leai se Isi e Atoatoa
Na ta’ua e Nifae le mea tonu lava na ou mafaufau i ai: “E fiafia lo’u agaga ia te oe, lo’u Atua, o le papa foi o lo’u olataga.”
Sa ou moomoo i taimi uma ia ou pei o Nifae: e usiusitai lelei, matuai faamaoni, ma tumu i le faaleagaga. I la’u vaai o Nifae o le faataitaiga aupito maualuga lea o le amio lelei. E i ai ni nai mea na sili atu na manaia ia te a’u nai lo le manatu o le ola ae ia pei lava o ia—pe tau lava ia amata ona ou maua sina vaega o lana amiolelei.
I se tasi aso na i ai ni o’u faafitauli laiti, na mafua mai ona o lagona o le le atoatoa. Sa i ai o’u faanaunauga faapena ma ni sini se tele. Ae na foliga mai sa leai lava so’u alualu i luma. Sa ou faailoa atu nei lagona i lo’u tamā faatasi ai ma loimata o le leai o se faamoemoe. Sa vave ona tu a’e o ia, ma savali atu i le fatatusi, ma se’i mai se tasi o ana kopi o le Tusi a Mamona. E aunoa ma se upu na fai mai, ae sa ia tatalaina le tusi i le 2 Nifae 4 ma amata ona faitau le fuaiupu e 17.
Na maniti atoa lo’u tino e pei o le eletise ao o’u faalogologo i nei upu mamana: “Aue, o a’u o le tagata malaia!” Na fesoloa’i solo o’u mafaufauga. E faapefea ona fai mai Nifae, la’u tama autu ma le faataitaiga, o ia o se tagata “malaia”? Afai o ia o se tagata malaia, o le a la a’u?
Sa toe, maniti atoa foi lo’u tino ao faitau e lo’u tamā le fuaiupu e 28: “Lo’u agaga e, ina ala mai ia! Aua le toe vaivai i le agasala.” Na ou lagonaina le pei e fofo’e ese atu ma mou atu ai ni ao pogisa o lo’u mafaufau, ae faaali mai le mafanafana ma le matagofie o le lagi avanoa lanumoana ma le la susulu. Sa le mafai ona faamatala le tulaga na faamalamalamaina ai e lenei fuaiupu lo’u agaga. E i ai ni nai fuaiupu o mau na faatumulia ai a’u i le tele o le faamoemoe, musumusuga, ma le olioli e pei ona faia ai e lenei mau.
I le fuaiupu e 30, o loo ta’ua ai e Nifae le mea tonu lava na ou mafaufau i ai, i ni upu e sili atu ona faagaeetia: “E fiafia lo’u agaga ia te oe, lo’u Atua, le papa foi o lo’u olataga.” O lenei fuaiupu na aumai faatasi ai ma lagona o le toafilemu ma le lotofaafetai i le agalelei ma le alofa tunoa o le Alii.
Na tapuni e lo’u tamā le tusi ma faamalamalama mai o nei fuaiupu e ta’ua i nisi o taimi o le salāmo a Nifae. Ona ia aoao mai lea o a’u ma le agamalu e faapea, e oo lava foi i tagata maoae o le lalolagi e le atoatoa foi, ma e tatau ona iloa e nei tagata o latou lē atoatoa ina ne’i o latou faamaualuluga ai, ona lē maoae ai lea.
Sa ou malamalama. E le faapea a i ai o’u vaivaiga ona ou le gafatia ai lea ona avea e faapei o Nifae. O le iloaina o o’u vaivaiga na ou latalata atu ai i uiga o Nifae. Na maoae Nifae aua, e le gata ina usiusitai ma faamaoni, ae sa lotomaulalo foi ma naunau e talia ona sese.
Talu mai lava lena aafiaga, ua ou teufatuina ai lava upu nei a Nifae. O taimi uma ou te faitauina ai, ou te mauaina lava lena olioli e tasi ma musumusuga e pei o le taimi muamua na ou faitauina ai. Na ta’u mai e fuaiupu ia te a’u o a’u o se afafine o le Atua, e tele mea e mafai ona ou faia nai lo mea e mafai ona ou mafaufauina. Ou te iloa a ou faamaoni ma fetaomi atu i luma, o le a tele ni faamanuiaga o le a faatalitali mai mo a’u.