Sa lapataia e le Atua ia Noa e uiga i le Lolo ma ta’u atu i tagata amiotonu le ala e sao ai. Sa ta’u atu e le Atua ia Iosefa i Aikupito e uiga i le oo mai o le oge ma le auala e saunia ai. O lena lava Atua o loo fetalai mai ia i tatou i aso nei e ala i Ana perofeta, ma tuuina mai fautuaga e aumaia ai le filemu ma le saogalemu pe a tatou mulimuli i ai.
“Ou te tuuina atu ia te outou le manuia, o lo’u manuia ou te avatu ai ia te outou. … Aua le atuatuvale o outou loto, aua foi tou te matatau” (Ioane 14:27). I le filemu ma le paia o le afeafe pito i luga, na ta’u atu ai e le Faaola i Ana Aposetolo o le a latou feagai ma sauaga ma faanoanoaga. Ona Ia fetalai atu lea: “Ua ou fai atu nei mea ia te outou, ina ia outou maua le manuia ia te au. E maua foi outou e le puapuaga i le lalolagi: a ia outou loto tetele; ua ou manumalo i le lalolagi” (Ioane 16:33).
I Lana faatomuaga i le Mataupu Faavae ma Feagaiga, na lapatai mai ai le Alii e faapea “o le a aveeseina ai le filemu mai le lalolagi, ma o le a pulea e le tiapolo lona lava malo.” Ae na folafola mai foi le Faaola, “E i ai le mana o le Alii i luga o lana au paia, ma o le a nofo tupu i le lotolotoi o i latou” (MFF 1:35–36).
E faatatau i le vevesi o aso mulimuli, ua ta’u mai ai ia i tatou “e loto vaivai tagata” (MFF 45:26; 88:91). Ae o le savali o le talalelei ua avea pea ma savali o le filemu—filemu i le lalolagi ma le filemu mai le, lalolagi, tusa lava po o le a. E moni lava “ia outou lototetele” ua aoao mai ai ia i tatou ia aua nei o tatou loto vaivai.
Na vaaia i tisipenisione uma le vāvāō ma taua, le matatau ma le mativa. Ae na auina mai e le Alii i tisipenisione uma lava ni perofeta e lapatai i tagata amioleaga ma faamafanafana ma saunia tagata amiotonu. E leai foi se eseesega i lenei tisipenisione maoae faaiu. I se laina e le’i motusia o perofeta na suitulaga talu mai Iosefa Samita, ua i ai ia i tatou ni perofeta, aposetolo, tagatavaai ma talifaaaliga, e taiala ma fautuaina i tatou. Latou te saunoa mai i le savali a le Faaola o le filemu ma le faamoemoe. Latou te fesoasoani ia i tatou e saunia o tatou aiga ma o tatou loto ia tatou maua le faamoemoe, ae le o le fefe; filemu, ae le o le atuatuvale.
O le laina o le faasologa o taimi o loo i lalo ua tuuina mai ai se vaaiga mafanafana. E ui lava ina i ai le lalolagi i faigata e tele ma e ui lava foi ina mafatia le Au Paia i sauaga matautia, ae o loo tumau pea Le Ekalesia a Iesu Keriso o le Au Paia o Aso e Gata Ai i lona ala mautu. Ua faatupula’ia tagata auai, ua salalau siteki ma malumalu i le lalolagi, ma o loo faaauau pea ona taialaina i tatou e le Alii e ala i Ana auauna filifilia.
I soo se faigata e taatia mai i o tatou luma, i le avea ai o ni tagata taitoatasi ma se nuu, e tatau ona faalogoina le siufofoga o le Alii i o tatou loto: “Aua le matatau, fanau iti e, aua e a au lava outou, ua ou manumalo foi i le lalolagi, o outou foi o nisi o e ua foai mai e lo’u Tama ia te au” (MFF 50:41).
Taumatau i le pito: ata o Iosefa Samita ma le Malumalu o Katelani mai faaaloaloga a le Faletusi o Talafaasolopito o le Ekalesia
Ata o Polika Iaga, o paionia, Tusi a Mamona FaaTenimaka, ma taua mai faaaloaloga a le Faletusi o Talafaasolopito o le Ekalesia; ata o le fanuamaliu mai faaaloaloga a Samantha Bridge