Sailiga mo le Ekalesia Sa’o

Saunia e Roberto Pinheiro Rocha

Pe sa i ai se ekalesia i le lalolagi na taitaiina e se perofeta soifua?

Sa ma talanoa lava ma la’u uo o Iulieta i luga o le initoneti, ae fai mai loa o loo ia sailia se ekalesia e i ai se perofeta soifua o le na talanoa faafesagai ma le Atua. Sa ou manatu lava ua le toe fetalai mai le Atua i tagata i lenei lalolagi aua o lea ua ia i tatou le Tusi Paia, ma sa ou manatu ua lava lena mo lo tatou faaolataga.

Ae na fai mai o ia, “Afai e le toe valaauina e le Atua se perofeta i lenei lalolagi, ua pepelo o Ia, aua ua Ia folafola mai na te le faia se mea e tasi e aunoa ma le valaauina o perofeta” (tagai Amosa 3:7).

Sa ou fesili atu ia te ia, “O fea la o i ai lenei perofeta soifua?” Na te le’i iloaina.

Sa amata ona ou manatunatu pe mafai faapefea ona ma maua le ekalesia sa’o. Sa ou iloa lava ua tele le mau lotu eseese Kerisiano ma eseese foi a latou aoaoga faavae. Sa ou mafaufau, “Ia, o loo tele lava punaoa i luga o le Initoneti,” o lea na ou saili ai mo le “ekalesia moni na sauaina.” Ou te le iloa pe aisea na ou taina ai i totonu na faamatalaga faapena, ae na feololo ni lisi o ekalesia na maua mai ai, e aofia ai Le Ekalesia a Iesu Keriso o le Au Paia o Aso e Gata Ai. E tele lotu Kerisiano i Pasila, ae ou te le’i faalogo lava i le lotu lenei.

Ina ua ou alu i le Uepi saite [a le ekalesia], sa ou faitau ai i le tala i se taulealea e 14-tausaga o le na vaai faafesaga’i i le Atua ma Iesu Keriso, na ia faaliliuina le Tusi a Mamona e ala i le mana o le Atua. Ou te le’i faalogo muamua i se mea e uiga ia Iosefa Samita po o le Tusi a Mamona, ma sa ou faapea e manaia foi lea manatu. Ae o le mea na tosina atu i ai lo’u mafaufau o le faamatalaga mai le Tusi a Mamona i le faaali atu o Iesu Keriso i tagata anamua o le konetineta o Amerika.

Sa ou naunau lava e faitau i lenei tusi, o lea na ou talosagaina ai se kopi. Sa ou ta’u atu ia Iulieta le saite, ma ina ua uma ona ia faitauina le tala ia Iosefa Samita, sa ia mautinoa lava o le ekalesia lenei o le Ekalesia a Iesu Keriso. Fai mai o ia, sa saunia a’u e le Alii ina ia ou sueina mo ia le Ekalesia.

Sa ou maofa i lona talitonuga maumaututu ma sa ou manao ai ia ou iloa mo a’u lava. Sa ou fesili atu i lo’u tina pe na ia iloaina le Tusi a Mamona. Fai mai o ia, sa i ai se tusi lanumoana a lo’u uso na aumai e ni faifeautalai se toalua. Sa ou nonoina mai lana tusi ma faitau loa mai le amataga e oo i le faaiuga i le vaiaso e tasi; ou te le’i toe manao lava i se isi mea. Oka se lagona o le filemu na ou maua! Sa ou manatua se folafolaga e faapea, o tagata uma e faitauina le tusi e tatau ona ole atu i le Atua pe moni le tusi, ma o le a Ia tali mai (tagai Moronae 10:3–4).

O le taeao po lava na ou alu ai i lo’u potu e fai se tatalo. Sa ou tuuina atu lo’u faatuatuaga i le Atua ma fesili atu ia te Ia pe moni le tusi, ma sa ou lagonaina se mu i totonu o lo’u loto. Ou te le’i iloaina pe o le a lea lagona, ae na ou lagona le fiafia. O le po lena na fai ai sa’u miti e faapea na faaali mai ia te a’u se perofeta o le Tusi a Mamona. Sa ou fesili atu ia te ia pe moni le tusi, ma sa ia fai mai e moni. Ina ua ou ala ae sa ou mafaufau faapea, “O le Tusi a Mamona e sa’o lava e moni.”

Sa ou fesilisili solo seia oo lava ina ou maua se tagata na iloaina le auala e tau atu i le falelotu. I se tasi Aso Faraile, sa vilivili atu ai la’u uila i le falesa, ae sa leai se tasi na i ai. Sa ou tatalo mo le fesoasoani ia ou iloa le taimi e amata ai sauniga. Sa ou toe alu foi [i le falesa] i le vaiaso na sosoo ai. Ina ua ou taunuu atu, sa fai mai se tina matua o sauniga a le Ekalesia e faia i taeao o Aso Sa. Sa ou toe foi atu i le fale ma le fiafia ma le olioli, ma sa tatavale foi lo’u fatu.

Ina ua ou taunuu atu i le lotu i le taeao o le Aso Sa, sa talia lelei a’u e tagata o le au paia. Sa faagaeetia a’u i le faatulagaga o le Ekalesia. Sa ou lagona le filemu ma le olioli i lo’u loto i le taimi o sauniga, ma sa ou fai atu i faifeautalai e susū mai i lo’u fale e aoao a’u. Sa ou toe foi atu i le fale ma ta’u atu i lo’u tina ua ou maua le ekalesia sa’o.

Sa aoaoina a’u e faifeautalai e uiga i le Toefuataiga o le talaelei a Iesu Keriso. Ua uma ona ou iloa le tala ia Iosefa Samita, o lea, ina ua la valaaulia a’u ina ia ou tatalo e iloa ai le moni, sa ou fai atu ia i la’ua ua uma ona ou maua le tali ma faamatala atu i ai lo’u aafiaga. Sa faagaeetia i la’ua i la’u molimau ma fautuaina mai le aso 15 o Me, 2004, mo lo’u papatisoga. Ae o le taimi foi lea, na papatiso ai foi la’u uo o Iulieta. O lo’u papatisoga o le fiafiaga sili lea o lo’u olaga, ma sa ma fiafia lava ma la’u uo ina ua ma maua le Ekalesia moni a Iesu Keriso.

Ata na tusia e Scott Greer; ata o Peresitene Hinckley na pueina e Drake Busath